40 مىڭ ادامنىڭ ىشىندە 1 رەت كەزدەسەتىن پاتولوگيا
الماتى قالاسىنىڭ № 7 قالالىق كلينيكالىق اۋرۋحاناسىنا تۇركىستان وبلىسىنان «پرەساكرالدى جىلاۋىق» (تىك ىشەك ماڭىنداعى ىسىك) دياگنوزى قويىلعان 21 جاستاعى ناۋقاس كەلدى. № 7 قالالىق كلينيكالىق اۋرۋحانانىڭ كولوپروكتولوگيا ءبولىمىنىڭ مەڭگەرۋشىسى مارات قالەنبايەۆتىڭ ايتۋىنشا، جىلاۋىقتىڭ ەرەكشەلىگى ونىڭ وتە ۇلكەن كولەمىندە بولدى – شامامەن 18-دەن 16 سم-گە دەيىنگى دوڭگەلەك پىشىندە، كىشى جامباس اۋماعىندا ورنالاسقان. جىلاۋىقتىڭ ءوسۋى بايقالماعاندىقتان، ول تابيعي جولمەن ءىشتى بوساتۋعا كەدەرگى كەلتىرگەن، ال جاس قىز تىك ىشەك ماڭىنداعى تۇراقتى قولايسىزدىقتان زارداپ شەگىپ كەلگەن.
كىشى جامباس جىلاۋىعى – بۇل سيرەك كەزدەسەتىن پاتولوگيا، ول دىڭشەك پەن تىك ىشەك اراسىندا ورنالاسقان انومالدى قۋىس نەمەسە قالتا. مۇنداي جاعداي 40 مىڭ ادامنىڭ ىشىندە 1 رەت كەزدەسەدى. ادەتتە، جىلاۋىقتار مرت نەمەسە كىشى جامباس اعزالارىنىڭ ۋدز كەزىندە 2 سم شاماسىندا انىقتالادى، ال بۇل جاعدايدا كولەمى ايتارلىقتاي ۇلكەن بولدى»، – دەدى تاجىريبەلى حيرۋرگ-كولوپروكتولوگ مارات قالەنبايەۆ.
حيرۋرگتار جىلاۋىقتى الىپ تاستاۋ ءۇشىن كۇردەلى وپەراسيا جاسادى. قۇيىمشاق بايلامىن الىپ تاستاۋمەن جۇرگىزىلگەن وپەراسيا ءساتتى اياقتالدى. ءبىر عانا وپەراسيا ارقىلى جىلاۋىقتى تولىقتاي الىپ تاستاپ، ناۋقاستى ەمدەۋگە مۇمكىندىك تۋدى. بۇل وپەراسيانى جوعارى بىلىكتى حيرۋرگ-پروكتولوگتار، انەستەزيولوگ-رەانيماتولوگتار جانە تاجىريبەلى وپەراسيالىق مەيىربيكەلەردىڭ كاسىبي شەبەرلىگى مەن بىلىكتىلىگىنىڭ ارقاسىندا ءساتتى وتكىزىلدى. وپەراسيانىڭ تەحنيكالىق كۇردەلىلىگىنە جانە تىك ىشەك اينالاسىنداعى ماي قاباتىنىڭ ىرىڭدەۋگە بەيىمدىلىگىنە قاراماستان، اسقىنۋلاردىڭ الدىن الىندى. ايتا كەتۋ كەرەك، بۇل وپەراسيا مىندەتتى الەۋمەتتىك مەديسينالىق ساقتاندىرۋ اياسىندا جاسالدى.
قازىرگى ۋاقىتتا پاسيەنت اۋرۋحانادان شىعۋعا دايىندالۋدا. دارىگەرلەر حالىقتى مەديسينالىق كومەككە ۋاقتىلى جۇگىنۋگە شاقىرادى، سەبەبى حيرۋرگيالىق ەمدەۋ بولماعان جاعدايدا، پارارەكتالدى تالشىقتىڭ ىرىڭدەۋى، تىك ىشەك جىلانكوزى، ءزار شىعارۋ جانە دەفەكاسيا فۋنكسيالارىنىڭ بۇزىلۋى سياقتى ءقاۋىپتى اسقىنۋلار پايدا بولۋى مۇمكىن. اۋرۋدىڭ ۇزاق ۋاقىت ەمدەلمەۋى نيەۆرالگيا، نيەۆريت جانە انەميا سياقتى اۋرۋلاردىڭ دامۋىنا اكەلۋى مۇمكىن.