بيىل 42 ەرىكتى مەن ۆولونتەرلەر ۇيىمى جەڭىمپاز اتاندى
حالىقارالىق ۆولونتەرلەر كۇنى ەلوردادا «جىل ۆولونتەرى» سىيلىعىنىڭ جەڭىمپازدارى ماراپاتتالدى. بۇل سىيلىق 2020 جىلى مەملەكەت باسشىسى قاسىم-جومارت توقايەۆتىڭ باستاماسىمەن تاعايىندالدى. ول الەۋمەتتىك باعىتتاعى جانە قوعامدىق پايدالى مىندەتتەردى شەشۋگە ۇلەس قوسقان ەرىكتىلەرگە بەرىلەدى.
بيىل 42 ەرىكتى مەن ۆولونتەرلەر ۇيىمى جەڭىمپاز اتاندى.
ماراپاتتاۋ راسىمىندە AMANAT پارتياسىنىڭ اتقارۋشى حاتشىسى اسحات ورالوۆ ۆولونتەرلەر كوروناۆيرۋسپەن كۇرەس كەزىندە، ارىستاعى، ماقتاارالداعى، اۋليەكولدەگى، ەكىباستۇزداعى وقيعالار بارىسىندا قازاقستاندىقتارعا العاشقىلاردىڭ ءبىرى بولىپ كومەك كورسەتكەنىن اتاپ ءوتتى.
«ۆولونتەرلەردىڭ قىزمەتى شىنايى ءپاتريوتيزمنىڭ كورىنىسى سانالادى. ولار – كەز كەلگەن قيىن جاعدايدا كومەك قولىن سوزاتىن مەيىرىمدى جۇرەكتىڭ يەلەرى. قازاقستانداعى ۆولونتەرلىك قوزعالىستىڭ بەلسەندى جۇمىس ىستەۋى – كەمەل قوعامنىڭ كەلبەتى»، – دەدى اسحات ورالوۆ.
اقپارات جانە قوعامدىق دامۋ ءمينيسترى دارحان ءقىدىرالىنىڭ ايتۋىنشا، بيىل ۆولونتەرلەردى قولداۋ ماقساتىندا 255-تەن استام شاعىن گرانت تابىستالدى.
«مەيىرىمدىلىك پەن قامقورلىق – حالقىمىزعا ءتان قاسيەتتەر. بۇگىندە ەلىمىزدە ۆولونتەرلەر قوزعالىسى تۇراقتى دامىپ كەلەدى. ۆولونتەرلەردى ىنتالاندىرۋ جانە قۇقىعىن كەڭەيتۋ بويىنشا شارالار قابىلداندى. ۆولونتەرلىك قىزمەتتى قولداۋ ستاندارتتارى ازىرلەندى»، – دەدى مينيستر.
ءسويتىپ، «حابار-وشارسىز كەتكەن ادامداردى ىزدەۋگە بەلسەندى قاتىسقانى ءۇشىن» نوميناسياسى بويىنشا «VITA» پاۆلودار قالاسىنىڭ ىزدەۋشىلەرى» ۇيىمى ماراپاتقا يە بولدى. ۇيىم باسشىسى ەكاتەرينا كۋدرياۆسيەۆانىڭ ايتۋىنشا، بۇل سىيلىقتىڭ ماقساتى – ۆولونتەرلەر قوزعالىسىنا مۇمكىندىگىنشە كوپ ادامدى تارتۋ.
«ۇيىمىمىز جۇزدەن استام ادامدى ىزدەپ تاپتى. ولاردىڭ اراسىندا بالالار دا، ەرەسەكتەر دە بار. تالاي ادامنىڭ العىسىن الدىق. تۋىستارى مەن دوستارى ريزاشىلىعىن ءبىلدىردى. قوعامعا پايدامىز تيسە ەكەن دەيمىز. جاقسىلىق جاساعىمىز كەلەدى. حابار-وشارسىز كەتكەن ادامداردى ىزدەۋمەن قاتار، ۆولونتەرلەرىمىز قايىرىمدىلىق جۇمىسىمەن دە اينالىسادى»، – دەدى ول.
«توتەنشە جاعدايلاردى جويۋعا بەلسەندى قاتىسقانى ءۇشىن» نوميناسياسى بويىنشا ولجاس مامىر ەسىمدى ۆولونتەر ماراپاتتالدى. ونىڭ ايتۋىنشا، ەرىكتىلەردىڭ باسىم كوپشىلىگى ءۇشىن ەڭ ماڭىزدىسى – وزگەگە كومەكتەسۋ.
«ۆولونتەر بولۋ – العىس الۋدى نەمەسە ماتەريالدىق سىياقىعا يە بولۋدى ويلاماي كومەك كورسەتۋگە دايىن بولۋ دەگەن ءسوز. وزگەنىڭ جان قايعىسىنا بەيجاي قاراۋعا بولمايدى. بىرەۋگە قامقورلىق جاساي الاتىن بولساڭ، ودان تارتىنباۋ كەرەك»، – دەيدى ول.
سالتاناتتى ءىس-شارا بارىسىندا AMANAT پارتياسىنىڭ اتقارۋشى حاتشىسى ياروسلاۆ ستەپانەسكە، دامير ابدينگە، دارحان ايدارحانۇلىنا، ولجاس مامىرعا، سونداي-اق «VITA» پاۆلودار قالاسىنىڭ ىزدەۋشىلەر» قب جانە «Lider.kz استانا ۆولونتەرلەرى» قب وكىلدەرىنە سىيلىق تابىستادى.