ينۆەستورلارمەن الدىن الا كەلىسىمدەر جاسالۋدا.
2026 جىلعا دەيىن بۇكىل ەل كولەمىندە ستۋدەنتتىك جاتاقحانالاردا 30 مىڭ ورىن ۇيىمداستىرۋ جوسپارلانىپ وتىر، دەپ حابارلايدى Almaty-akshamy.kz
بۇل تۋرالى پرەمەر-مينيستردىڭ ورىنباسارى التاي كولگىنوۆتىڭ توراعالىعىمەن وتكەن جيىندا ايتىلدى.
"قاراعاندى جانە ماڭعىستاۋ وبلىستارىندا 900 ورىندىق ەكى جاتاقحانا پايدالانۋعا بەرىلدى. رەسپۋبليكادا جىل سوڭىنا دەيىن 8،3 مىڭ ورىنعا ەسەپتەلگەن تاعى 26 جاتاقحانا پايدالانۋعا بەرىلەدى"، - دەپ حابارلادى ۇكىمەتتىڭ باسپا ءسوز قىزمەتى.
كەزەكتى مونيتورينگ بارىسىندا استانا، الماتى جانە كوكشەتاۋ قالالارىندا قارجىنىڭ بولماۋىنان جانە باسقا دا سەبەپتەردەن قۇرىلىس مەرزىمىنىڭ بۇزىلۋ ءقاۋپى بار 2،1 مىڭ ورىنعا شاقتالعان 6 جاتاقحانا انىقتالدى، سونداي-اق پاۆلودار وبلىسىندا جاتاقحانانى رەكونسترۋكسيالاۋ جۇمىستارى كەشەۋىلدەگەن.
جيىندا جوسپارعا 1600-دەن استام ورىنعا ارنالعان 8 الەۋەتتى نىساندى ەنگىزۋ ۇسىنىلدى. ولاردى پايدالانۋعا بەرۋ وسى جىلدىڭ سوڭىنا دەيىن استانا، شىمكەنت قالالارى مەن جامبىل وبلىسىندا جۇزەگە اسىرىلادى. بۇگىنگى تاڭدا ينۆەستورلارمەن الدىن الا كەلىسىمدەر جاسالۋدا، اكىمدىكتەر جول كارتالارىنا وزگەرىستەر ەنگىزۋدە.
"ستۋدەنتتەردى جاتاقحانامەن قامتۋ بويىنشا بارلىق جوسپار قاتاڭ ساقتالۋى ءتيىس. بۇل رەتتە سالىنىپ جاتقان جاتاقحانالار سانىن كوبەيتۋ باستاماسى قۇپتالادى"، — دەدى پرەمەر-مينيستردىڭ ورىنباسارى.