بيىل وتاندىق دەنساۋلىق ساقتاۋ ءۇشىن ماڭىزدى جىل بولدى: «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋ باستالدى، استانادا بىرەگەي جابدىقتارمەن جاراقتاندىرىلاتىن ۇلتتىق عىلىمي ونكولوگيالىق ورتالىقتىڭ قۇرىلىسى اياقتالۋدا، ازاماتتار ءۇشىن مەديسينالىق سكرينينگتەر كەڭەيتىلدى جانە تاعى باسقاسى. Primeminister.kz اتالعان سالادا 2023 جىلى اتقارىلعان جۇمىستارعا شولۋ جاسادى، دەپ حابارلايدى almaty-akshamy.kz.
مەملەكەت باسشىسى قاسىم-جومارت توقايەۆ حالىققا جولداۋىندا ۇكىمەتكە دەنساۋلىق ساقتاۋ مەن جالپى الەۋمەتتىك سالانى قارجىلاندىرۋ تاسىلدەرىن قايتا قاراۋدى تاپسىردى.
«مەديسينالىق ينفراقۇرىلىمدى كەشەندى تۇردە جاقسارتۋعا باسا نازار اۋدارۋ كەرەك. مەملەكەت پەن جەكەمەنشىكتىڭ سەرىكتەستىگىن ءتيىمدى پايدالانعان ءجون. مەديسينا – ينۆەستيسيا سالۋعا قولايلى سالا. تەك وعان دۇرىس جاعداي جاساۋ قاجەت»، — دەدى ق ر پرەزيدەنتى.
بيىل قازاقستاننىڭ دەنساۋلىق ساقتاۋ سالاسىندا قول جەتكىزىلگەن جەتىستىكتەر:
- رەسپۋبليكا وڭىرلەرىندە 90 جاڭا دەنساۋلىق ساقتاۋ نىسانى سالىندى، ونىڭ ىشىندە 59-ى «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە ىسكە قوسىلدى. سونىمەن قاتار 80 مەديسينالىق مەكەمە جوندەلىپ، 4 كوپسالالى ورتالىق اۋداندىق اۋرۋحانانى كۇردەلى جوندەۋ جۇمىستارى باستالدى.
- ستاسيونارلاردا 3 ملن-عا جۋىق ادام كومەك الدى، العاشقى مەديسينالىق-سانيتاريالىق كومەك جەلىسى 90 مل-نان استام ادامدى قابىلدادى، 360 مىڭنان استام جاڭا تۋعان نارەستە دۇنيەگە كەلدى (11 ايدىڭ قورىتىندىسى بويىنشا)، جەدەل مەديسينالىق جاردەم كۇشتەرىمەن 8 ملن شاقىرتۋ بويىنشا كومەك كورسەتىلدى.
- وتكەن جىلدىڭ سايكەس كەزەڭىمەن سالىستىرعاندا 10 اي ىشىندە حالىقتىڭ جالپى ءولىم-جىتىمىنىڭ كورسەتكىشى 5،7%، قان اينالىمى جۇيەسى اۋرۋلارىنان ءولىم-جىتىم – 6،9%، قاتەرلى ىسىكتەردەن – 0،6%، تىنىس الۋ ورگاندارى اۋرۋلارىنان – 4،7%، تۋبەركۋلەزدەن 22،1% تومەندەدى. 11 ايدا نارەستە ءولىمى 9،6%، انا ءولىمى 24،4% تومەندەدى.
- وسى جىلى دەنساۋلىق ساقتاۋ جۇيەسىن قارجىلاندىرۋ 2،5 ترلن تەڭگە بولدى. امبۋلاتوريالىق دەڭگەيدەگى شىعىندار ۇلعايتىلىپ، جالپى كولەمنىڭ 56% قۇرادى. بۇل رەتتە مەديسينالىق وڭالتۋدى قارجىلاندىرۋ 13 ەسەگە – 2019 جىلعى 6 ملرد تەڭگەدەن 2023 جىلى 78،1 ملرد تەڭگەگە دەيىن ۇلعايدى. جالپى قازاقستان 2027 جىلعا قاراي مەديسيناعا جۇمسالاتىن شىعىستاردىڭ ۇلەسىن ءجىو-نىڭ 5% دەيىن جەتكىزۋ جونىندەگى ماقساتقا جەتۋ ءۇشىن سەنىمدى تۇردە قادام باسىپ كەلەدى.
- امبۋلاتوريالىق دارى-دارمەكپەن قامتاماسىز ەتۋ كولەمى 2019 جىلمەن سالىستىرعاندا 2 ەسەدەن استام ۇلعايدى جانە 237 ملرد تەڭگەنى، ونىڭ ىشىندە ورفاندىق اۋرۋلاردى ەمدەۋ 51،8 ملرد تەڭگەنى قۇرادى. بارلىعى 3،9 ملن پاسيەنت دارى-دارمەكپەن قامتاماسىز ەتىلدى.
- رەسپۋبليكانىڭ 20 مەديسينالىق ۇيىمىندا دارىلىك زاتتاردىڭ پاسيەنتكە دەيىن (تاڭبالاۋ، كودتاۋ) جەتۋىن قاداعالاۋعا مۇمكىندىك بەرەتىن دارىلىك زاتتاردى ءبولۋدىڭ تولىق سيكلى ىسكە قوسىلدى.
- ق ر مەديسينالىق مەكەمەلەرى ءۇشىن 58،8 ملرد تەڭگەگە 514 بىرلىك مەديسينالىق تەحنيكا ساتىپ الىندى. مەديسينالىق ۇيىمداردىڭ مەديسينالىق جابدىقتارمەن جاراقتاندىرىلۋى 2023 جىلى 2022 جىلمەن سالىستىرعاندا 2،5% ۇلعايىپ، 84،15% دەيىن جەتتى.
- 2023 جىلى كورسەتىلگەن كونسۋلتاسيالىق-دياگنوستيكالىق قىزمەتتەردىڭ سانى 2،5 ەسەگە ارتىپ، 324 ملن-نان استى. بيىل 1،1 ملن ادام قىمبات دياگنوستيكالىق قىزمەت تۇرلەرىن (كت/مرت) الدى.
- فارماسيەۆتيكالىق جانە مەديسينالىق ونەركاسىپتى دامىتۋ شەڭبەرىندە مىناداي جۇمىستار جۇرگىزىلدى:
– الماتى وبلىسىندا وڭتۇستىك كورەيانىڭ SGP فيرماسىمەن بىرلەسىپ شپريستەر ءوندىرۋ جوباسى ىسكە اسىرىلدى؛
– الماتىدا وڭتۇستىك كورەيانىڭ Samsung Madison كومپانياسىنىڭ جوعارى جانە ساراپتامالىق كلاستارىنىڭ ۋلترادىبىستىق ستاسيونارلىق دياگنوستيكالىق جۇيەلەرىن شىعارۋ جولعا قويىلعان؛
– ماڭعىستاۋ وبلىسىندا ەستۋ اپپاراتتارىنىڭ ءوندىرىسى ىسكە قوسىلدى؛
– سولتۇستىك قازاقستان وبلىسىندا ساۋلەلەندىرگىشتەر مەن باكتەريسيدتىك اۋا رەسيركۋلياتورلارىنىڭ ءوندىرىسى ىسكە قوسىلدى؛
– شىمكەنتتە سۇزگىش جارتىلاي ماسكالار ءوندىرىسى ىسكە قوسىلدى؛
– قاراعاندىدا كلاپانى بار KN95 مەديسينالىق رەسپيراتور ماسكالارىن ءوندىرۋ جەلىسى تولىعىمەن دايىندالدى؛
– جامبىل وبلىسىندا قۋاتتىلىعى جىلىنا 270 ملن بىرلىككە دەيىن ءبىر رەت قولدانىلاتىن ستەريلدى شپريستەر ءوندىرىسى ىسكە قوسىلدى.
- بيىل 48 امبۋلاتوريالىق-ەمحانالىق كومەك ۇيىمدارىندا ۇزدىك تاجىريبەلەر ورتالىقتارى اشىلىپ، 160-تان استام مامان وقىتىلدى.
- قر-دا ەرەسەكتەر ءۇشىن 8 اۋرۋ ءتۇرىن (ارتەريالىق گيپەرتونيا، جۇرەكتىڭ يشەميالىق اۋرۋى، قانت ديابەتى، گلاۋكوما، ءسۇت بەزى وبىرى، جاتىر موينى وبىرى، كولورەكتالدى وبىر، ۆيرۋستىق گەپاتيت) ەرتە انىقتاۋعا ارنالعان سكرينينگتىك باعدارلاما ىسكە اسىرىلۋدا. 2023 جىلى سكرينينگتىك تەكسەرۋلەرمەن قامتۋ 2022 جىلمەن سالىستىرعاندا 19،7% ارتىپ، 8،5 ملن ادامدى قۇرادى.
- اۋىل تۇرعىندارى ءۇشىن بۇيرەك، اسقازان-ىشەك جولدارى، تىنىس الۋ ورگاندارى جانە قۋىقاستى بەز وبىرى اۋرۋلارىن ەرتە انىقتاۋعا ارنالعان سكرينينگ كەڭەيتىلدى. جالپى پروفيلاكتيكالىق تەكسەرۋلەرمەن شامامەن 2،6 ملن اۋىل تۇرعىنى قامتىلدى. سونداي-اق شالعاي اۋىلداردىڭ 50 مىڭنان استام تۇرعىنى مەديسينالىق پويىزداردىڭ قىزمەتىمەن قامتىلدى، بۇل 2022 جىلعى قامتۋدان 58% ارتىق.
- بيىل 688 مىڭ قاشىقتىقتان مەديسينالىق قىزمەت كورسەتىلدى، بۇل 2022 جىلمەن سالىستىرعاندا 6،7 ەسە كوپ.
- مەملەكەت باسشىسىنىڭ تاپسىرمالارىن ىسكە اسىرۋ شەڭبەرىندە قر-دا 2023-2027 جىلدارعا ارنالعان ونكولوگيالىق اۋرۋلارمەن كۇرەس جونىندەگى كەشەندى جوسپار بەكىتىلدى.
- ەلىمىزدە ترانسپلانتولوگيا، كارديوحيرۋرگيا، ونكولوگيا، يننوۆاسيالىق جاسۋشالىق تەحنولوگيالار سالاسىندا 80 جاڭا تەحنولوگيا ەنگىزىلدى، ولار بويىنشا 20 مىڭعا جۋىق ادام ەمدەلدى.
ورتالىق جۇيكە جۇيەسىنىڭ اۋرۋلارىن راديوحيرۋرگيالىق ەمدەۋ جۇزەگە اسىرىلاتىن استانا قالاسىنداعى ۇلتتىق نەيروحيرۋرگيا ورتالىعىنىڭ «گامما-نوج» ورتالىعىندا 233 وپەراسيا جاسالدى. 2021 جىلى اشىلعاننان بەرى بارلىعى 1037 وپەراسيا جاسالدى.
سەمەي قالاسىنداعى يادرولىق مەديسينا ورتالىعى راديونۋكلەيدتىك تەراپيانىڭ 776 كۋرسىن وتكىزدى.
دارىگەرلەرگە، ونىڭ ىشىندە اسا تاپشى ماماندىقتار بويىنشا قاجەتتىلىكتى قامتاماسىز ەتۋ ءۇشىن 2023 جىلى رەسپۋبليكالىق بيۋدجەت ەسەبىنەن 6 مىڭعا جۋىق ءبىلىم بەرۋ گرانتى ءبولىندى.
جەرگىلىكتى بيۋدجەت قاراجاتى ەسەبىنەن 16،5 مىڭ مامان بىلىكتىلىگىن ارتتىرۋمەن قامتىلدى.
2023 جىلى ق ر مەديسينالىق جوعارى وقۋ ورىندارىن 7 مىڭعا جۋىق دارىگەر ءبىتىرىپ شىقتى. 23 مىڭنان استام ورتا مەديسينالىق قىزمەتكەر دايىندالدى.