اينالىم قاراجاتىن قارجىلاندىرۋ جانە ءبولۋ سحەماسى قايتا قارالماق
الەۋمەتتىك ماڭىزى بار ازىق-تۇلىك تاۋارلارىنىڭ باعاسىن ۇستاپ تۇرۋ باعىتىندا ءبىرقاتار جوسپار بار. ولار بۇگىن ق ر پرەمەر-مينيسترىنىڭ ورىنباسارى – ساۋدا جانە ينتەگراسيا ءمينيسترى سەرىك ءجۇمانعاريننىڭ توراعالىعىمەن وتكەن كەڭەستە تالقىلاندى، دەپ حابارلايدى Almaty-akshamy.kz Inform.kz- سىلتەمە جاساپ.
جىل باسىنان بەرى نەگىزگى ازىق-تۇلىك باعاسىنىڭ ءوسۋى 18،7% بولدى.
ساۋدا جانە ينتەگراسيا مينيسترلىگى ساۋدا كوميتەتىنىڭ ءتوراعاسى ەرجان قازانبايەۆ وبلىستارداعى ساۋدا ۇستەمەسى جونىندەگى كوميسسيالار مەن مونيتورينگتىك توپتاردىڭ جۇمىسى تۋرالى ماسەلەنى كوتەردى. ول كوميسسيالاردىڭ جۇمىسىن تولىعىمەن قايتا قاراپ، ازىق-تۇلىك باعاسىنىڭ قالىپتاسۋىنا تىكەلەي اسەر ەتىپ وتىرعان اراداعى دەلدالداردى انىقتاۋعا جۇمىلدىرۋدى ۇسىندى.
اكىمدەر مەن اۋىل شارۋاشىلىعى مينيسترلىگىنىڭ نەگىزگى ازىق-تۇلىكپەن قامتاماسىز ەتۋ تۋرالى اقپاراتىن تىڭداعان سەرىك جۇمانعارين الداعى كەزەڭگە ارنالعان نەگىزگى مىندەتتەردى بەلگىلەدى.
«نەگىزگى الەۋمەتتىك ماڭىزى بار ازىق-تۇلىك ونىمدەرىن وندىرۋشىلەر قاۋىمداستىقتارىمەن كەزدەسۋ سەسسياسىن وتكىزدىك. اينالىم قاراجاتىن قارجىلاندىرۋ جانە ءبولۋ سحەماسىن قايتا قارايتىن بولامىز، ءامات-تىڭ بەس اتاۋى بويىنشا وندىرۋشىلەرمەن تىكەلەي كەلىسىمشارت جاساسۋ سحەماسىنا كوشۋدى جوسپارلاپ وتىرمىز. ءبىزدىڭ مىندەتىمىز – تاپشىلىققا جول بەرمەۋ جانە نەگىزگى ازىق-تۇلىك ونىمدەرى باعاسىنىڭ ءوسۋ قارقىنىن تومەندەتۋ. ەڭ باستىسى – تولىق باقىلاۋدى، ونىڭ ىشىندە وڭىرلىك كوميسسيالاردىڭ قىزمەتىن باقىلاۋدى قامتاماسىز ەتۋ. دەلدالداردى انىقتاۋ بويىنشا وڭىرلىك كوميسسيالار قۇرۋ – مەملەكەت باسشىسىنىڭ تاپسىرماسى. ولاردىڭ جۇمىسىن ساۋدا جانە ينتەگراسيا مينيسترلىگىنىڭ وڭىرلىك بولىمشەلەرىنىڭ رەسۋرستارى ەسەبىنەن كۇشەيتۋ قاجەت. بۇل جۇمىستى ساۋدا كوميتەتىنە تاپسىرامىن»، - دەدى سەرىك جۇمانعارين.