2025 جىلعى 1 شىلدەدەگى جاعداي بويىنشا «كۇمىس جاس» جوباسى بويىنشا 12،4 مىڭ ادام جۇمىسقا ورنالاستىرىلدى.
2025 جىلى وسى باعىت بويىنشا بارلىعى 23،8 مىڭ ادامدى جۇمىسقا ورنالاستىرۋ جوسپارلانۋدا، دەپ حابارلايدى aqshamnews.kz.
«كۇمىس جاس» جوباسى بويىنشا جۇمىسقا ورنالاسقانداردىڭ ەڭ كوپ سانى كەلەسى وبلىستاردا بايقالادى: الماتى – 1 118 ادام، جامبىل – 1 032 ادام، اقتوبە – 1 007 ادام، قاراعاندى – 1 004 ادام جانە جەتىسۋ وبلىسىندا – 1 040 ادام.
قاتىسۋشىلاردىڭ باسىم بولىگى اۋىل شارۋاشىلىعى سالاسىندا – 36%، قىزمەت كورسەتۋدە – 23%، قوعامدىق تاماقتاندىرۋدا – 21% جۇمىسپەن قامتىلعان.
بۇل جوباعا 50 جاستان اسقان جۇمىسسىز ازاماتتار زەينەتكەرلىك جاسقا تولعانعا دەيىن قاتىسا الادى. جوباعا قاتىسۋ ءۇشىن مانساپ ورتالىعىنا ءوتىنىش بەرۋ قاجەت.
«كۇمىس جاس» جوباسىنا قاتىسۋ مەرزىمى اياقتالعاننان كەيىن جۇمىس بەرۋشى زەينەتكەرلىك جاسقا تولماعان ادامدى كەمىندە 1 جىل مەرزىمگە تۇراقتى جۇمىس ورنىنا، سونداي-اق زەينەتالدى جاستاعى ادامدى زەينەتكەرلىككە شىققانعا دەيىن جۇمىسقا ورنالاستىرۋعا مىندەتتى.
جوباعا قاتىسۋ ۇزاقتىعى 36 ايدان (3 جىل) اسپايدى جانە وسى ۋاقىت ارالىعىندا قاتىسۋشىلاردىڭ جالاقىسى مەملەكەت تاراپىنان سۋبسيديالانادى.
«كۇمىس جاس» جوباسىن قارجىلاندىرۋدى ەڭبەك موبيلدىلىگى ورتالىعى جۇمىس بەرۋشىنىڭ جوبا اياسىندا جۇمىسقا ورنالاستىرىلعان جۇمىسسىزدارعا ەڭبەكاقى تولەۋگە جۇمساعان شىعىندارىنىڭ ءبىر بولىگىن وتەۋگە سۋبسيديالار بەرۋ جولىمەن جۇزەگە اسىرادى. سۋبسيديالار مولشەرى: جۇمىستىڭ ءبىرىنشى جىلىندا جالاقى مولشەرىنىڭ 70%-ىن (ءبىراق 30 اەك-تەن اسپايتىن)، جۇمىستىڭ ەكىنشى جىلىندا جالاقى مولشەرىنىڭ 65%-ىن (ءبىراق 30 اەك-تەن اسپايتىن)، جۇمىستىڭ ءۇشىنشى جىلىندا جالاقى مولشەرىنىڭ 60%-ىن (ءبىراق 30 اەك-تەن اسپايتىن) قۇرايدى.
كوپتەگەن قازاقستاندىقتار جوبا تۋرالى وڭ پىكىر بىلدىرۋدە.
سولاردىڭ ءبىرى – اقتوبە وبلىسىنىڭ تۇرعىنى اليەۆتينا پەلەحان «كۇمىس جاس» جوباسى بويىنشا جاڭا جۇمىستا زەينەتكەرلىك جاسقا دەيىن ەكى جىل جۇمىس ىستەپ، لايىقتى دەمالىسقا شىقتى.
«2023 جىلى جۇمىس ىزدەپ، مانساپ ورتالىعىنا حابارلاستىم، وندا ماعان «كۇمىس جاس» جوباسىنا قاتىسۋدى ۇسىندى. جولداما بويىنشا «قۇرىلىس-مۇعابيا» جشس-نە قۇجات مامانى بولىپ جۇمىسقا ورنالاستىم. ال اقپان ايىندا زەينەتكەرلىك جاسقا تولىپ، زەينەتكە شىقتىم»، – دەپ وتكەنىمەن ءبولىستى ول.
اقتوبە وبلىسىندا 2025 جىلى «كۇمىس جاس» جوباسى بويىنشا 1 205 ادامدى جۇمىسقا ورنالاستىرۋ جوسپاردا بار.