قازاقستاننىڭ توتەنشە جاعدايلار مينيسترلىگى بالالاردىڭ قاۋىپسىزدىگىنە الاڭداۋشىلىق ءبىلدىرىپ، اتا-انالاردى بارىنشا مۇقيات بولۋعا شاقىرادى.
2025 جىلدىڭ باسىنان باستاپ (22 ساۋىردەگى جاعداي بويىنشا) 112 ءبىرىڭعاي كەزەكشى-ديسپەچەرلىك قىزمەتىنىڭ پۋلتىنە تۇرعىن ۇيلەردىڭ تەرەزەلەرىنەن بالالاردىڭ قۇلاعانى تۋرالى 34 حابارلاما كەلىپ ءتۇستى. سونىڭ سالدارىنان ءۇش بالا قايتىس بولدى، قالعاندارى ءتۇرلى جاراقات الىپ، اۋرۋحاناعا جاتقىزىلدى، دەپ حابارلايدى aqshamnews.kz.
تجم مالىمەتىنشە، وقىس وقيعالار استانا، شىمكەنت قالالارىندا، سونداي-اق اقمولا، اتىراۋ، شىعىس قازاقستان، قاراعاندى، قوستاناي، قىزىلوردا، جامبىل، ماڭعىستاۋ، پاۆلودار، اباي جانە ۇلىتاۋ وبلىستارىندا ورىن الدى. الدىڭعى جىلدارداعىداي، باستى سەبەپ — ەرەسەكتەر تاراپىنان باقىلاۋدىڭ از بولۋى. قاراۋسىز قالعان بالالار تەرەزە الدىنا شىعىپ، جيھازدى تىرەۋىش رەتىندە پايدالانادى نەمەسە سالماقتى كوتەرە المايتىن موسكيت تورلارىنا سۇيەنەدى.
وتكەن جىلى ەرەسەكتەردىڭ قاراۋىنسىز قالعان 2 مەن 13 جاس ارالىعىنداعى بالالار تەرەزەدەن قۇلاعان 173 جاعداي تىركەلدى.
ۇيدە بولعان كەزدە بالالار، ەڭ الدىمەن ولاردىڭ اتا-انالارى قاۋىپسىزدىك ەرەجەلەرىن ساقتاۋى كەرەك. ءاربىر اتا-انا بالانىڭ تەرەزەدەن نەمەسە بالكوننان قۇلاپ كەتۋ ءقاۋپىن ازايتۋ شارالارىن ءبىلۋى كەرەك:
1. ۇيدە كىشكەنتاي بالا بولسا، تەرەزەلەردى اشىق قالدىرماڭىز.
2. تەرەزەنى ءتيىستى قورعاۋمەن جابدىقتالماعان موسكيت تورلارىن پايدالانباڭىز - بالالار مۇنداي تورلارعا سۇيەنىپ، ناتيجەسىندە ولارمەن بىرگە قۇلاپ تۇسەدى.
3. بالالار وزدىگىنەن تەرەزەنى اشا المايتىنداي ەتىپ، قاۋىپسىزدىك قۇلىپتارىن ورناتىڭىز.
4. بالانى قاراۋسىز قالدىرماڭىز، اسىرەسە تەرەزەلەر مەن شىنى ەسىكتەردىڭ جانىندا ويناۋعا جول بەرمەڭىز.
5. بالالار تەرەزەنىڭ الدىنا شىعا المايتىنداي، جيھازداردى ونىڭ جانىنا قويماڭىز.