بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە «ەڭبەك رەسۋرستارىن دامىتۋ ورتالىعى» اق پرەزيدەنتى داۋلەت ارعىندىقوۆ ايتتى، دەپ حابارلايدى almaty-akshamy.kz
ءوز ءسوزىنىڭ باسىندا سپيكەر COVID-19 پاندەمياسىنان تۋىنداعان داعدارىس جاعدايىندا مەملەكەتتىك جۇمىسپەن قامتۋ قىزمەتتەرىنىڭ جۇمىسى حالىققا جۇمىس ىزدەۋگە بايلانىستى ماسەلەلەردى شەشۋگە كومەكتەسۋ ءۇشىن ماڭىزدى ەكەنىن اتاپ ءوتتى.
«اۋداندار مەن قالالارداعى 203 جۇمىسپەن قامتۋ ورتالىعى جۇمىس ىزدەۋشىلەر ءۇشىن جۇمىسسىز رەتىندە تىركەلۋگە، جۇمىس ىزدەۋگە جانە جۇمىسىنان ايىرىلۋ بويىنشا الەۋمەتتىك تولەم مەن اتاۋلى الەۋمەتتىك كومەك الۋعا قولداۋ كورسەتەدى. ءتۇرلى سەبەپتەرمەن تەز جۇمىس تابا المايتىن ازاماتتارعا «ەڭبەك» مەملەكەتتىك باعدارلاماسى بويىنشا بيۋدجەتتەن سۋبسيديالاناتىن ۋاقىتشا جۇمىستار ۇسىنادى. 2021 جىلدىڭ باسىنان بەرى جۇمىس تاجىريبەسى جوق 16 مىڭ جاس ازامات وقۋ ورىندارىن بىتىرگەننەن كەيىن جاستار پراكتيكاسىنا جىبەرىلدى. بىلىكتىلىگى تومەن 110 مىڭنان استام ادام قوعامدىق جۇمىستارعا تارتىلعان. 16 مىڭ ادام الەۋمەتتىك جۇمىس ورىندارىنا ورنالاستىرىلدى. 14 مىڭ جۇمىسسىز ازامات قىسقا مەرزىمدى وقۋعا جىبەرىلدى. 2021 جىلى جۇمىسپەن قامتۋ ورتالىقتارىنا بارلىعى 432 مىڭ ادام جۇگىنگەن»، – دەدى داۋلەت ارعىندىقوۆ.