مەديسينا قىزمەتكەرلەرىنىڭ كوروناۆيرۋستان بولعان ءولىمى تۋرالى اشىق رەسمي ستاتيستيكا جوق
دۇنيەجۇزىلىك دەنساۋلىق ساقتاۋ ۇيىمىنىڭ قازان ايىنداعى ەسەبىنە سايكەس، الەمدە كەم دەگەندە 115 مىڭ مەديسينا قىزمەتكەرى كوروناۆيرۋستان قايتىس بولعان، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
«2020 جىلدىڭ قاڭتارىنان 2021 جىلدىڭ مامىرىنا دەيىنگى ارالىقتا 80-نەن 180 مىڭعا دەيىن دارىگەر CوVID -19 ينفەكسياسىنان قايتىس بولۋى مۇمكىن. دەمەك، قازىرگى ۋاقىتتا ورتاشا ەسەپپەن بۇل كورسەتكىش 115 500-نان اسادى»، - دەلىنگەن ۇيىم سايتىندا جاريالانعان مالىمەتتە.
رەسەيدە مەديسينا قىزمەتكەرلەرىنىڭ كوروناۆيرۋستان بولعان ءولىمى تۋرالى اشىق رەسمي ستاتيستيكا جوق. سوڭعى رەت وتكەن جىلدىڭ قىركۇيەگىندە رەسەي فەدەراسياسىنىڭ دەنساۋلىق ساقتاۋ مينيسترلىگى ۆيرۋس جۇقتىرعان 258 دارىگەردىڭ قايتىس بولعانىن حابارلاعان ەدى.
وسى رەتتە، حالىقتىڭ قايتىس بولعان اق حالاتتىلار تۋرالى دەرەكتەردى دەربەس ەنگىزۋىنە مۇمكىندىك بەرەتىن ءبىرقاتار تاۋەلسىز ينتەرنەت-جوبالار بار. سونىڭ ءبىرى – «ەستە قالار تىزىمدە» بۇگىندە 1459 ادامنىڭ ءاتى-جونى جازىلعان.
بيىلعى 17 قىركۇيەكتە ماسكەۋدەگى سەچەنوۆ ۋنيۆەرسيتەتىنىڭ اۋماعىنداعى ءومىر اللەياسىندا ىندەتكە قارسى كۇرەسكەن مەديسينا قىزمەتكەرلەرىنىڭ ەرلىگىنە ارنالعان مونۋمەنتتىڭ اشىلۋى كوز جۇمعان قاھارمانداردى ەسكە الۋعا ارنالعان سيمۆولدىق شارالاردىڭ ءبىرى بولدى.