الماتى مۋزەيى مۇحتار اۋەزوۆ اتىنداعى قازاق ۇلتتىق دراما تەاترىنىڭ 100 جىلدىعىنا وراي «عاسىر جاساعان ۇلت تەاترى» كورمەسىن ۇسىندى، دەپ حابارلايدى Aqshamnews.kz ءتىلشىسى.
«كۇنى كەشە سىر وڭىرىندە وتكەن ۇلتتىق قۇرىلتايدا مەملەكەت باسشىسى اۋەزوۆ تەاترىن اسقان ىلتيپاتپەن اتاپ وتكەنى دە جايدان-جاي ەمەس. ەلىمىزدە 76 تەاتر بار بولسا، سولاردىڭ ىشىندە «اكەمتەاتردى» ءبارىنىڭ تەمىرقازىعى، بايتەرەگى دەپ اسپەتتەسەك ارتىق ەمەس. جانە ونىڭ ءبىزدىڭ الماتىدا ورنالاسۋىنىڭ ءوزى زور ماقتانىش. بىزگە رۋحاني بايلىق سىيلاپ جۇرگەن ونەر ادامدارى، ولاردىڭ ءجۇرىپ وتكەن تاعىلىمدى جولى تۋرالى وسىنداي كورمەلەر ارقىلى دا ءبىلىپ، تانىسۋ، اسىرەسە، جاستار ءۇشىن ۇلكەن ولجا دەپ ويلايمىن»، – دەدى الماتى قالاسى مادەنيەت باسقارماسىنىڭ باسشىسى دانيار الييەۆ.
تەاتر مۇراجايىنىڭ جەتەكشىسى نارگيز تامابەك قىزى 100 جىلدىققا 100 جادىگەر الىپ كەلگەندەرىن اتاپ ءوتتى.
«وتكەن تاريحىمىزدى، اسىرەسە، مادەني تاريحىمىزدى ءبىلۋ – بۇل ءوسۋدىڭ، جوعارىلاۋدىڭ كەپىلى. قازىرگى جاس جەتكىنشەك تەحنولوگياعا، جاساندى ينتەللەكت دەيمىز، سوعان بەيىم بولىپ ءوسسىن دەيمىز. دەيتۇرعانمەن، كەشەگى اتا-باسىنىڭ قانىندا، جانىندا نە بار ەدى، ونىڭ ءسۇيىپ تىڭداعان اۋەزدى ءانى، ەرتەگى، جىر-داستانى قانداي ەدى؟ مىنە، سودان وركەندەپ-وسكەن بالا تولىققاندى ادام بولادى. بۇل اباي ايتقان انىقتاما. وسىناۋ كورمەدەگى ءاربىر ەكسپونات، ءار كادر اۋەزوۆ تەاترىنىڭ عانا ەمەس، قازاقتىڭ ءجۇرىپ وتكەن جولى، ابىرويى سياقتى كورىنەدى ماعان»، – دەدى مۇحتار اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.
كورمەدەن ورىن العان ەكسپوناتتار اراسىندا تەاتر تاريحىنا قاتىستى ارحيۆتىك قۇجاتتار مەن فوتوسۋرەتتەر، 1940 جىلداردان بۇگىنگى كۇنگە دەيىنگى سپەكتاكل افيشالارى، سونداي-اق كورنەكتى تەاتر مايتالماندارىنىڭ ساحنالىق كوستيۋمدەرى بار. اتاپ ايتقاندا، ءا.مولدابەكوۆتىڭ «ۆانيا اعا» سپەكتاكلىندەگى، ش.جانداربەكوۆانىڭ «اقان سەرى – اقتوقتى» قويىلىمىنداعى، ز.ءشارىپوۆانىڭ «وتەللو» سپەكتاكلىندە دەزدەمونا رولىندە كيگەن كيىمى، سونداي-اق ت.جامانقۇلوۆتىڭ ابىلاي حان بەينەسىندەگى ساحنالىق كوستيۋمى بار.
«بۇگىنگى ءىس-شارادان جاستاردى كورىپ قۋانىپ تۇرمىن. تەاتر دا، مۋزەي دە بىزگە رۋحاني ازىق بەرە الاتىن وردا دەپ ەسەپتەيمىن. مەن كوبىنە تاكسيمەن جۇرەمىن. سوندا قاراپ وتىرماي جۇرگىزۋشىنى اڭگىمەگە تارتاتىنىم، تەاترعا شاقىراتىنىم بار. ونداعى ويىم – كۇيكى تىرلىكتىڭ جەتەگىندە كەتپەسەك ەكەن دەيمىن. «وعان ۋاقىت جوق قوي» دەيدى كوبى. «تىم بولماسا ەكى ايدا ءبىر رەت بالالارىڭىزدى ادەمى كيىندىرىپ الىپ، جۇبايىڭىزدى قولتىقتاپ تەاترعا نەگە كەلىپ تۇرماسقا؟! جاننىڭ جادىراپ، رۋح الىپ تۇرعانى ابزال»، – دەيمىن. ايتەۋىر جۇرگەن جەرىمىزدە جاقسىلىقتى ناسيحاتتاۋدان شارشاماۋىمىز كەرەك»، – دەدى ادەبيەت جانە تەاتر سىنشىسى ءاليا بوپەجانوۆا.
كورمەنىڭ نەگىزگى ماقساتى – عاسىرلىق تاريحى بار ۇلت تەاترىنىڭ شىعارماشىلىق جولىن كەڭىنەن ناسيحاتتاۋ، كورەرمەنگە قازاق تەاتر ونەرىنىڭ دامۋىن تانىستىرۋ جانە جاس ۇرپاقتىڭ رۋحاني-مادەني قۇندىلىققا دەگەن قىزىعۋشىلىعىن ارتتىرۋ.
كورمە الماتى مۋزەيىنىڭ تورىندە اقپاننىڭ سوڭىنا دەيىن تۇرادى.