الماتى قالاسىنىڭ اكتيۆىمەن وتكەن كەزدەسۋدە قالا اكىمى دارحان ساتىبالدى كونستيتۋسيالىق رەفورمانى ىسكە اسىرۋدىڭ نەگىزگى باسىم باعىتتارىن ايقىندادى. ءىس-شاراعا ءماسليحات دەپۋتاتتارى، اۋدان اكىمدەرى، باسقارما باسشىلارى جانە قالالىق قىزمەتتەردىڭ جەتەكشىلەرى قاتىستى.
دارحان ساتىبالدى مەملەكەت باسشىسى قاسىم-جومارت توقايەۆتىڭ ۇسىنىسىمەن ەلىمىزدە اۋقىمدى كونستيتۋسيالىق رەفورما جۇرگىزىلىپ جاتقانىن اتادى. جاڭا كونستيتۋسيا جوباسى ەگەمەندىك پەن تاۋەلسىزدىكتى نىعايتۋعا، ازاماتتاردىڭ قۇقىعى مەن بوستاندىعىن قورعاۋعا، زاڭ ۇستەمدىگىن قامتاماسىز ەتۋگە، ۇلتتىق بىرلىكتى دامىتۋعا جانە قازاقستاندىقتاردىڭ ءال-اۋقاتىن ارتتىرۋعا باعىتتالعان.
الماتى اكىمى قۇجاتتا ادامي كاپيتالدى، ءبىلىم بەرۋدى، عىلىم مەن يننوۆاسيانى مەملەكەتتىك ساياساتتىڭ ستراتەگيالىق باعىتتارى رەتىندە دامىتۋ بەكىتىلگەنىن ەرەكشە اتاپ ءوتتى.
سونىمەن قاتار ازاماتتاردىڭ مەملەكەتتىك باسقارۋعا ارالاسۋ مۇمكىندىگى كەڭەيتىلىپ، جەرگىلىكتى ءوزىن-وزى باسقارۋدىڭ ءرولى كۇشەيتىلەدى، شەشىم قابىلداۋ ۇدەرىسىنىڭ اشىقتىعى مەن مەملەكەتتىك ورگانداردىڭ جاۋاپكەرشىلىگى ارتادى.
قالالىق ءماسليحات ءتوراعاسى مەيىرجان وتىنشييەۆ قازاقستان رەسپۋبليكاسىنىڭ جاڭا كونستيتۋسياسى جوباسىن قولدايتىنىن ءبىلدىرىپ، ونىڭ ەلدىڭ ودان ءارى دامۋى ءۇشىن ماڭىزىن جەتكىزدى.
«قۇجات ازاماتتار، ساياسي پارتيالار، قوعامدىق ۇيىمدار مەن ساراپشىلار قاتىسقان اۋقىمدى قوعامدىق تالقىلاۋدىڭ ناتيجەسى. جاڭا كونستيتۋسيا جوباسى قوعامنىڭ ساياسي جۇيەنى جاڭارتۋعا جانە مەملەكەت پەن ازاماتتار الدىنداعى ادىلەتتىلىك پەن جاۋاپكەرشىلىك قاعيداتتارىن نىعايتۋعا دەگەن سۇرانىسىن كورسەتەدى»، — دەدى مەيىرجان وتىنشييەۆ.
كەزدەسۋ سوڭىندا الماتى اكىمى جاڭا كونستيتۋسيا جوباسى بويىنشا تۇپكىلىكتى شەشىم رەسپۋبليكالىق رەفەرەندۋمدا قابىلداناتىنىن ايتىپ، كونستيتۋسيالىق وزگەرىستەردىڭ نەگىزگى ەرەجەلەرى مەن ءمانىن حالىققا ءتۇسىندىرۋ باعىتىندا بارلىق دەڭگەيدەگى اتقارۋشى جانە وكىلدى ورگاننىڭ ۇيلەسىمدى جۇمىسىنىڭ ماڭىزدىلىعىنا نازار اۋداردى.