بۇگىن «ALTAI-NEWS» مەديا-ورتالىعىنىڭ ۇجىمى كومپانياعا قاراستى «DIDAR» جانە «رۋدنىي التاي» گازەتتەرىنىڭ ارداگەرلەرىمەن جۇزدەسىپ، ولارعا زاماناۋي تەحنولوگيالاردى، سونىڭ ىشىندە جاساندى ينتەللەكتتى قولدانا وتىرىپ اقپارات جەتكىزۋدىڭ جاڭا تاسىلدەرىن كورسەتتى، دەپ حابارلايدى aqshamnews.kz Altainews.kz--كە سىلتەمە جاساپ.
«ALTAI-NEWS» مەديا ورتالىعى – وڭىردەگى مەملەكەتتىك اقپاراتتىق ساياساتتى جۇزەگە اسىرىپ وتىرعان باستى مەديا-قۇرال. ونىڭ قۇرامىنا Altainews.kz جەلىلىك باسىلىمى، «DIDAR» جانە «رۋدنىي التاي» گازەتتەرى، «NEW-media» پروديۋسەرلىك ستۋدياسى، الەۋمەتتىك جەلىلەردەگى پابليكتەر، پوليگرافيالىق قىزمەت باعىتى كىرەدى.
قوس باسىلىمدا ۇزاق جىلدار بويى ەڭبەك ەتكەن ارداگەرلەر «ALTAI-NEWS» مەديا-ورتالىعىنىڭ بۇگىنگى تىنىس-تىرشىلىگىمەن تانىستى.
اقپارات سالاسىنداعى زامانۋي تەحنولوگيالاردى پايدالانا وتىرىپ، جۇمىسىن جۇرگىزىپ كەلە جاتقان ورتالىقتا ءقازىر 75 ادام جۇمىس ىستەيدى. وڭتايلاندىرۋ جالاقىنىڭ ءبىرشاما وسۋىنە ىقپال ەتىپ، قالاماقى تولەۋ جۇيەسى دە تۇبەگەيلى وزگەردى.
- قازىرگى ۋاقىت تالابىنا جانە اقپارات اعىنىنىڭ جىلدامدىعىنا سايكەس گازەتتەر جاڭالىقتاردى، اسىرەسە بەلگىلى ءبىر وقيعالار تۋرالى اقپاراتتى دەر كەزىندە جەتكىزە المايدى. گازەتتى شىعارۋدىڭ ءوزى ۇلكەن قارجىلىق شىعىندار مەن قىرۋار ەڭبەكتى قاجەت ەتەتىن جۇمىس. اقپاراتتى تاراتۋدىڭ ەلەكتروندى ادىستەرى گازەتتەردىڭ باسەكەگە قابىلەتتىلىگىن ايتارلىقتاي تومەندەتىپ وتىر. ويتكەنى، گازەت باسپاحانادان شىعىپ، وقىرمانعا جەتىپ، وقيعا تۋرالى حابارلاعانشا، سايتتار مەن ەلەكتروندى ب ا ق حابار تاراتىپ ۇلگەرەدى جانە سايكەسىنشە گازەت جاڭالىعى ەسكىرىپ قالادى. «DIDAR» جانە «رۋدنىي التاي» گازەتتەرى شىعىس قازاقستان وبلىسىنىڭ ومىرىندە ماڭىزدى ورىن الاتىن تاريحي باسىلىمدار ەكەندىگى داۋسىز. سوندىقتان گازەت وقىرماندارىنىڭ اۋديتورياسىن كەڭەيتۋدىڭ جولدارىن قاراستىرۋدى كوزدەپ وتىرمىز. تاراتۋدىڭ ءبىر ءتۇرى – گازەتتەردىڭ قاعاز نۇسقاسىمەن قاتار ەلەكتروندى نۇسقاسىن دا شىعارۋ. بۇگىندە كەز كەلگەن ادام سمارتفونىندا ينتەرنەت بار ەكەنىنە ۇيرەنىپ قالعان. ءومىردىڭ كوپتەگەن سالالارى ەلەكتروندى فورماتقا الدەقاشان كوشكەن. سول سياقتى گازەت تە نارىقتان ءوز ورنىن تابۋدى كوزدەيدى، - دەدى كومپانيا باسشىسى ارسەنيي دۇيسەنوۆ.
جالپى، گازەت اتاۋلىعا وقىرمانداردىڭ قىزىعۋشىلىعىنىڭ تومەندەۋى قازىرگى تاڭدا تەك وڭىردە عانا ەمەس، بۇكىل الەمدە بايقالىپ وتىر. مىسالى، رەسەيدە سوڭعى 10 جىلدا جۋرنالدار مەن گازەتتەر سانى 40 پايىزعا قىسقارعان. گازەتتەر جەدەل جاڭالىقتاردىڭ كوزى رەتىندە ءوز ءرولىن تولىق اتقارا الماۋى اقيقات. گازەتتەر تەك اناليتيكالىق جانە سالالىق تاقىرىپتارداعى اۆتورلىق ماتەريالداردى، جۋرناليستىك زەرتتەۋلەردى كوپتەپ جازۋعا يتەرمەلەۋدە. وسى تۇسى گازەتتىڭ باسىمدىلىعى بولماق.
ەڭبەك ارداگەرلەرىنە قازاقى قوناقجايلىقپەن شاپان جابىلىپ، قۇرمەت كورسەتىلدى. ءوز كەزەگىندە ارداگەرلەر كورسەتىلگەن قۇرمەتكە العىستارىن ايتىپ، ريزاشىلىقتارىن ءبىلدىردى. سونىمەن قاتار، وزدەرى ەڭبەك ەتكەن گازەتتىڭ بولاشاعىنا بەي-جاي قارامايتىندىعىن جەتكىزىپ، ۇسىنىس-پىكىرلەرىن دە ايتتى.