«Alatau Aqparat» مەدياحولدينگى مەن ەۋرازيا عىلىمي-زەرتتەۋ ينستيتۋتى اراسىنداعى ىنتىماقتاستىق تۋرالى مەموراندۋم شەڭبەرىندە جۋرناليستەر تۇرىك ءتىلىن تەگىن ۇيرەندى. قازان ايىندا باستالعان كۋرستار اياقتالىپ، قاتىسۋشىلارعا قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتى لينگۆيستيكالىق ورتالىعىنىڭ ارنايى سەرتيفيكاتى بەرىلدى. 
سەرتيفيكات تابىستاۋ سالتاناتىنا تۇركيا رەسپۋبليكاسىنىڭ الماتى قالاسىنداعى باس كونسۋلى ەۆرەن مۇدەررىسوعلۋ، «Alatau Aqparat» مەدياحولدينگىنىڭ باس ديرەكتورى ەرجان قالىمباي ۇلى، ەۋرازيا عىلىمي-زەرتتەۋ ينستيتۋتىنىڭ ديرەكتورى سۋات بەيليۋر، تۇركسوي جازۋشىلار وداعىنىڭ ءتوراعاسى ۇلىقبەك ەسداۋلەت، سونداي-اق ب ا ق وكىلدەرى قاتىستى.
جۋرناليستەر تۇرىك ءتىلىن مەڭگەرە وتىرىپ، تۇركيا مەن وزگە دە تۇركىتىلدەس ەلدەردىڭ باق-تارىندا تاعىلىمدامادان وتۋگە مۇمكىندىك الدى. 
ەۋرازيا عىلىمي-زەرتتەۋ ينستيتۋتىنىڭ ديرەكتورى سۋات بەيليۋر جۋرناليستەردى كۋرستىڭ اياقتالعانىمەن قۇتتىقتاپ، ىزگى تىلەگىن ءبىلدىردى:
«العان بىلىمدەرىڭىز قايىرلى بولسىن! ۇيرەنگەندەرىڭىزدى ۇمىتپاي، ءارىقاراي جەتىلدىرسەڭىزدەر، پايداعا اساتىنىنا سەنىمىم مول. يگىلىككە جاراسىن!»، – دەدى ول.
ايتا كەتەتىن ءجايت، بىلتىر مامىردا «Alatau Aqparat» مەدياحولدينگى مەن ەۋرازيالىق عىلىمي-زەرتتەۋ ينستيتۋتى اراسىندا ىنتىماقتاستىق تۋرالى مەموراندۋمعا قول قويىلعان ەدى. جۋرناليستەرگە تۇرىك ءتىلىن تۇركيادان الماتىعا ارنايى كەلگەن وقىتۋشى ۇيرەتتى.
«ۋاقىتىمدى بوس وتكىزبەگەنىمە قۋانىپ تۇرمىن. مىنە، بۇگىن تۇرىك ءتىلىن تەگىن ۇيرەنىپ، قوجا احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتى لينگۆيستيكالىق ورتالىعىنىڭ ارنايى سەرتيفيكاتىن الىپ وتىرمىن. مەنىڭ ويىمشا، ءتىل ۇيرەنۋ ەشقاشان كەش ەمەس. بۇگىنگە دەيىنگى ۇيرەنگەندەرىم الداعى ۋاقىتتا ماعان پايداسىن تيگىزەتىنىنە سەنەمىن. وسى ءساتتى پايدالانا وتىرىپ، بىزگە تەگىن ءتىل ۇيرەنۋگە مۇمكىندىك جاساعان «Alatau Aqparat» مەدياحولدينگىنىڭ باسشىسى ەرجان قالىمبايۇلىنا جانە ەۋرازيا عىلىمي-زەرتتەۋ ينستيتۋتىنىڭ قولداۋىمەن تۇركيادان ارنايى كەلىپ، ءبىزدى وقىتقان نەشە يىلدىرىم حانىمعا العىس ايتامىن»، – دەيدى «Almaty aqshamy» گازەتىنىڭ ءجۋرناليسى قۇرالاي يمانبەك قىزى.
