ۇلتتىق سپورت قاۋىمداستىعى جۋرناليستەر اراسىندا بايقاۋ جاريالادى.
جۋرناليستەر اراسىندا «Alaman» مەديا بايقاۋى وتەدى. بايقاۋدا 7 نوميناسيا بويىنشا جەڭىمپازدار انىقتالادى، دەپ حابارلايدى Almaty-akshamy.kz Elorda.info-عا سىلتەمە جاساپ.
بۇل تۋرالى ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ جۋرناليستەرمەن وتكىزگەن كەزدەسۋ كەزىندە ايتتى.
ۇلتتىق سپورتتى كەڭىنەن ناسيحاتتاۋ ماقساتىندا وتەتىن شارادا 7 نوميناسيا بويىنشا جەڭىمپازدار انىقتالادى.
1. ۇزدىك باعدارلاما (تەليەۆيزيا، راديو)
2. ۇزدىك اناليتيكالىق ماتەريال (ءداستۇرلى باسپا ءسوز: گازەت، جۋرنال)
3. ۇزدىك تانىمدىق ماتەريال (ينتەرنەت، ب ا ق)
4. ۇزدىك سۇحبات (YouTube ارنا)
5. ۇزدىك فوتوسۋرەت (ب ا ق، الەۋمەتتىك جەلى)
6. شەتەلدىك باق-تا جاريالانعان ۇزدىك ماتەريال (قازاقتىڭ ۇلتتىق سپورتى تۋرالى)
7. الەۋمەتتىك جەلىدەگى ۇزدىك ماتەريال (بلوگينگ، موبيلوگرافيا)
ءار نوميناسيا بويىنشا ءۇش ۇزدىك اۆتورعا اقشالاي سىيلىق بەرىلەدى:
1-ورىنعا – 1 000 000 تەڭگە؛
2-ورىنعا – 700 000 تەڭگە؛
3-ورىنعا – 500 000 تەڭگە.
بايقاۋ جەڭىمپازدارى 2024 جىلدىڭ ناۋرىز ايىندا ماراپاتتالادى.
باسقا دا اقپاراتتاردى ۇيىمداستىرۋ كوميتەتى نەمەسە كورسەتىلگەن سايت ارقىلى بىلۋگە بولادى.
ايتا كەتەيىك، كونكۋرسقا وسى جىلدىڭ 1 قىركۇيەگى مەن 2024 جىلدىڭ 1 ناۋرىز ارالىعىندا جاريالانعان ماتەريالدار قاتىسا الادى.