زاڭسىز كومەك ۇسىناتىن دەلدالداردىڭ جولىن كەسۋ ماقساتىندا مامانداندىرىلعان حالىققا قىزمەت كورسەتۋ ورتالىقتارىندا جۇرگىزۋشى كۋالىگىن الۋ پروسەدۋرالارى قاتاڭداتىلدى. Almaty-akshamy.kz بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنە سىلتەمە جاساپ حابارلايدى.
سىبايلاس جەمقورلىققا قارسى قىزمەت ىشكى ىستەر مينيسترلىگىمەن بىرلەسىپ، مامانداندىرىلعان حالىققا قىزمەت كورسەتۋ ورتالىقتارى قىزمەتىنە مونيتورينگ جۇرگىزدى. وعان سەبەپ بىرنەشە جىل بويى كولىك قۇرالدارىن زاڭسىز رەسىمدەۋمەن اينالىسقان قىلمىستىق توپقا قاتىستى قىلمىستىق ىستەر بولدى.
مونيتورينگ بارىسىندا اۆتوكولىكتەردى تىركەۋ مەن جۇرگىزۋشى كۋالىكتەرىن زاڭسىز بەرۋدىڭ شارتتارى انىقتالعان.
اقپاراتتىق جۇيەلەردىڭ وسالدىعى، پروسەستەردىڭ جەتكىلىكسىز سيفرلاندىرىلۋى، كولىكتى تىركەۋ پروسەدۋراسىنىڭ جەتىلدىرىلمەگەندىگى، ەمتيحانداردى قابىلداۋداعى قۇقىقتىق ولقىلىقتار، اۆتومەكتەپتەردە ءاتۇستى وقىتۋ – وسى فاكتورلاردىڭ بارلىعى زاڭسىز دەلدالدىق قىزمەتتەردىڭ پايدا بولۋىنا ىقپال ەتكەن، - دەلىنگەن انتيكور مالىمەتىندە.
مونيتورينگ ناتيجەلەرى بويىنشا سىبايلاس جەمقورلىققا قارسى ءىس-قيمىل اگەنتتىگى ۋاكىلەتتى مەملەكەتتىك ورگانداردىڭ اتىنا 22 ۇسىنىس جولداعان. قازىرگى تاڭدا ۇسىنىستاردىڭ جارتىسىنان كوبى ورىندالعان.
ماسەلەن، ءىىم ءوزىنىڭ بارلىق اۋماقتىق بولىمشەلەرىندە اۆتوكولىك قۇرالدارىنىڭ دەرەكقور بازاسىنا تۇزەتۋ ەنگىزۋ مۇمكىندىگىن جاپتى.
سونىمەن قاتار ىشكى ىستەر ءمينيسترىنىڭ بۇيرىعىمەن جۇرگىزۋشى كۋالىكتەرىن بەرۋ ءراسىمى كۇشەيتىلدى. وندا ەمتيحان الۋشىلاردىڭ مىندەتتى بيومەترياسى مەن تەستىلەۋدىڭ بارلىق پروسەسىن ۆيدەوتىركەۋ ەنگىزىلدى، ەمتيحانداردى قايتا تاپسىرۋ رەگلامەنتى وزگەرتىلدى.
بۇدان بولەك، پيلوتتىق رەجيمدە اۆتوحقكو مەن ىىم-دە جاڭا اقپاراتتىق جۇيەلەر ىسكە قوسىلدى. جۇيەدە اۆتوموبيلدەردىڭ دەرەكتەرىن، مىندەتتى تولەمدەر مەن الىمداردى، ايىپپۇلداردى اۆتوماتتى سيفرلىق سالىستىرۋ تەتىكتەرى كوزدەلگەن، كەز كەلگەن تۇزەتۋلەر ءۇشىن مۇمكىندىكتەر الىنىپ تاستالدى.
وسى رەتتە مامانداندىرىلعان حقكو قىزمەتكەرلەرىن سىبايلاس جەمقورلىق قۇقىق بۇزۋشىلىق سۋبەكتىلەرىنە جاتقىزۋ ۇسىنىلدى. زاڭ جوباسى ق ر پارلامەنتىندە قارالۋدا. قابىلدانىپ جاتقان شارالارعا قاراماستان، مامانداندىرىلعان حقكو-لاردا قۇجاتتاردى رەسىمدەۋگە كومەك ۇسىناتىن تۇلعالار ءالى دە بولۋى مۇمكىن. «كومەكشىلەردىڭ» زاڭسىز قىزمەتتەرىنە جۇگىنبەۋدى سۇرايمىز. وسىنداي فاكتىلەرگە تاپ بولعان جاعدايدا 1424 قىسقا ءنومىرى بويىنشا انتيكورعا دەرەۋ حابارلاۋ قاجەت، - دەدى انتيكوردان.