الماتى ءسان جانە ديزاين كوللەدجىندە قازاق پوەزياسىنىڭ مۇزبالاعى، حالقىمىزدىڭ اياۋلى پەرزەنتى مۇقاعالي ماقاتايەۆتىڭ شىعارماشىلىعىنا ارنالعان "مۇقاعالي وقۋلارى" اتتى ادەبي كەش ءوتتى، دەپ حابارلايدى aqshamnews.kz
بۇل رۋحاني شارانى كىتاپحانا قىزمەتكەرلەرى جاندار س.ي.، چالديبەكوۆا ج.ب. جانە قازاق ءتىلى مەن ادەبيەتى ءپانىنىڭ وقىتۋشىلارى سمايلوۆا ا.ق.، بايمۋراتوۆا ا.ك.، نۇرسەيت ە.ر ۇيىمداستىرىپ، ونى كوركەمدىك دەڭگەيى جوعارى ادەبي باسقوسۋعا اينالدىردى.
اقىن جىرلارى جۇرەكتەردى ەلجىرەتىپ، جان دۇنيەنى تەربەدى. ولەڭ وقىلعان سايىن زالداعى اتموسفەرا وزگەشە ءبىر كۇيگە ەندى. قازىلار القاسى قاتارىندا وتىرعان قازاقستاننىڭ قۇرمەتتى ازاماتى، اقىن گۇلنار راقىمجان قىزى، "قۇرمەت يەسى" سىيلىعىنىڭ يەگەرى، اقىن سەرىكبول ەرماحان، كوللەدج ادىسكەرى، قازاق ءتىلى مەن ادەبيەتى ءپانىنىڭ وقىتۋشىسى كەرىمبەكوۆا ج.ر. جانە قالامگەر، كىتاپحاناشى ايجامال جولداس قىزى – ءبارى دە اقىن جۇرەگىنىڭ نازىكتىگىن، جىردىڭ شەكسىز قۇدىرەتىن جان-تانىمەن سەزىنىپ وتىردى. ولار ءاربىر ولەڭ وقىلعان سايىن كوزىنە جاس الىپ، پوەزيانىڭ شىنايى قۋاتىن جۇرەكپەن قابىلدادى. بۇل كەش – جاي عانا سايىس ەمەس، جىرمەن سىرلاسۋ، ولەڭ ارقىلى جۇرەكتەردى تابىستىرۋ ءساتى بولدى. مۇقاعالي: "اقىن بولۋ – جۇرەك ءىسى!" دەيدى.
وسى كەشتە جاس وقىرماندار سول اقىندىق جۇرەكتىڭ نازىكتىگى مەن تەرەڭدىگىن ايقىن سەزىندى. ولەڭ – جالاڭ ءسوز ەمەس، جۇرەكتىڭ ءۇنى ەكەنىن ۇعىندى. ستۋدەنتتەر اقىننىڭ مۇرالارىن جاتقا وقىپ قانا قويماي، ونىڭ شىعارماشىلىعىنا ارنالعان ەسسەلەرىن ۇسىندى، مانەرلەپ وقۋدىڭ شەبەرلىگىمەن ەرەكشەلەندى. كەش بارىسىندا قويىلىمدار قويىلىپ، اقىن جىرلارىنىڭ كوركەمدىگى جاڭا قىرىنان تانىلدى. ولەڭگە دەگەن سۇيىسپەنشىلىك - جۇرەك بايلىعى. كوللەدج ستۋدەنتتەرىنىڭ مۇقاعالي وقۋلارىنا دەگەن تالپىنىستارىن كورىپ، شىنايى قۇرمەتىمدى بىلدىرگىم كەلەدى. اقىن جىرلارىن جۇرەكتەرىڭىزبەن وقىپ، ونىڭ ءار ءسوزىن سەزىنە ءبىلۋ – ۇلكەن ونەر. كەيدە ادام ءوز ەڭبەگىنىڭ باعالانباعانىن سەزىنىپ، ساعى سىنىپ، جىگەرى قۇم بولۋى مۇمكىن. ءبىراق مۇقاعالي دا ءبىر كەزدەرى مويىندالماعان، ونىڭ جىرلارىن تۇسىنبەگەندەر بولدى. سوعان قاراماستان، ول توقتامادى. ەگەر ول جازۋدى دوعارعاندا، ءبىز بۇگىن وسىنداي ۇلى پوەزيادان ايىرىلىپ قالار ەدىك. سىزدەرگە تىلەرىم – وزدەرىڭىزگە سەنىڭىزدەر، ارماندارىڭىزدان باس تارتپاڭىزدار! بۇگىن وقىعان ءار ولەڭىڭىز – ءسىزدىڭ بولاشاعىڭىزعا جازعان ءىزىڭىز.
ەگەر مۇقاعالي: "مەن ءومىردى جىرلاۋ ءۇشىن كەلگەنمىن!" – دەپ ايتسا، سىزدەر دە ءوز جولدارىڭىزدى تاۋىپ، ونى سۇيىسپەنشىلىكپەن جۇرىڭىزدەر. قانشا قيىندىق كەزدەسسە دە، وسى الەمگە ءوز ءىزىڭىزدى قالدىرۋعا كەلگەنىڭىزدى ۇمىتپاڭىز! بۇگىنگى شابىت – ەرتەڭگى جەتىستىككە باستار جول. كەش سوڭىندا قازىلار القاسى جاستاردىڭ ولەڭگە دەگەن سۇيىسپەنشىلىگىن جوعارى باعالاپ، ءاربىر ونەرپازدىڭ جۇرەگىنەن شىققان جىردىڭ وزىندىك بوياۋى مەن اسەرىن اتاپ ءوتتى. ولار ءۇشىن بۇل كەشتىڭ قازىلار القاسىندا بولۋدىڭ ءوزى ءبىر باقىت ەدى. سەبەبى اقىن جۇرەگى – جىردىڭ مەكەنى، ال جىردى تىڭداي ءبىلۋ – جۇرەكتىڭ ەڭ اسىل قاسيەتى. مۇقاعالي جىرلارى عاسىردان عاسىرعا جالعاسىپ، قازاق رۋحانياتىنىڭ شامشىراعى بولىپ قالا بەرمەك!