كەيىنگى جىلدارى جۇرەگى اۋىراتىن، قان اينالىمى، ياعني قان قىسىمى ناشارلاعان ورتا جاستاعى ادامدار كوبەيىپ بارادى.
بۇرىن تەك 50-60 جاستان اسقان جاندار عانا جۇرەك تۇسىنىڭ اۋىراتىنىن، قان قىسىمىنىڭ ءجيى كوتەرىلىپ كەتەتىنىن ايتىپ شاعىمداناتىن بولسا، كەيىنگى 3-4 جىلدا جۇرەك دەرتىنە شالدىققان 40 جاستان اسقان ناۋقاستار كوبەيدى.
ماسەلەن، 2023 جىلعى مالىمەتتەرگە قاراساق، «Almaty Resort» شيپاجايىنا بارىپ، دەمالىپ ءارى ەمدەلىپ جاتقان ناۋقاستاردىڭ 60%-ىنان جۇرەك-قانتامىر جۇيەسىندە اقاۋ بارى انىقتالعان. پايىزعا شاقساق، 36%-ى 65 جاستان اسقاندار بولسا، 30%-ى 50-65 جاس ارالىعىندا، ال 26%-ى 40-50 جاس ارالىعى جانە 8%-ى 40 جاسقا دەيىنگى ناۋقاستار بولىپ شىققان.
شيپاجايداعى جوعارى ساناتتى دارىگەر كارديولوگ بوتاگوز باقتۇر قىزىنىڭ ايتۋىنشا، كومەك سۇراعان ءار ناۋقاستىڭ ەرەكشەلىگىنە قاراي ەم تاعايىندالادى.
“دەمالۋشى تەك اۋرۋدىڭ الدىن الۋ ءۇشىن كەلگەن بولسا، شيپاجايدا ول باعىتتا ەمدىك ءىس-شارالار كەڭ اۋقىمدا. ەگەر ناۋقاس اۋىرىپ كەلگەن بولسا، دارى-دارمەكتىك ەمنەن باستايمىز، كەيىن دەنساۋلىعى قالپىنا كەلگەننەن كەيىن فيزيوەم، توقپەن، بالشىقپەن ەمدەۋ ت.س.س ەم تۇرلەرىن قوسىپ، ساۋىعىپ شىعۋىنا ۇلكەن ۇلەسىمىزدى قوسامىز”، - دەيدى.
وڭالۋعا كەلگەن ازاماتتارعا «رەدكورد»، «ارتروموت»، «تر.بۋبنوۆسكيي» اتتى جاتتىعۋ اپپاراتتارى ارقىلى ءىس-شارا قولدانىلادى.
سونىمەن قاتار، جقج اۋرۋلارىنىڭ الدىن الۋ ماقساتىندا بيىل «سۋتەكتىك ينگالياسيا» ەمدەۋ ءتاسىلى ەنگىزىلگەن. ياعني انتياگرەگانتتار (كارديوماگنيل، ترومبو اسس، ترومبوپول، اسپيرينكارديو) ورنىنا «سۋتەكپەن بۋلاۋدىڭ» ءبىر كۋرسىن الىپ وتە جاقسى ناتيجەگە جەتۋگە بولادى.
جالپى، جىل باسىنان بەرى I توقساندا «Almaty Resort» شيپاجايىندا 426 ادام جۇرەك قان-تامىر جۇيەسى اۋرۋلارى بويىنشا ەمدەلگەن. ونىڭ ىشىندە ءارتۇرلى كاتەگوريادا تىركەلگەن دەمالۋشىلار دا بار. ال 2023 جىلعى مالىمەتتەر بويىنشا 2 372 دەمالۋشى جۇرەك قان-تامىر جۇيەسى اۋرۋلارى بويىنشا ەم-دوم العان ەكەن. مۇنىڭ ىشىندە جۇرەك قان-تامىر جۇيەسىنە وتا جاسالعان جانە ستاسيونارلىق ەم العان ناقاستار دا تىركەلگەن.
س.د.اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتىنىڭ 2006 جىلعى تۇلەگى بوتاگوز دۇيسەننىڭ كارديولوگيا سالاسىندا قىزمەت ەتىپ جۇرگەنىنە 17 جىلداي ۋاقىت بولىپتى. «وسى سالادا جۇمىس ىستەپ جۇرگەن تالاي جىلدا ۇعىنعانىم، ناۋقاس ازاماتتاردىڭ كوبى ابدەن سىرقاتتانىپ، ەمدەلمەسە بولمايتىنداي جاعدايعا جەتكەندە عانا كەلەدى. ال ءبىزدىڭ شيپاجايدىڭ باسقا شيپاجايلاردان ەرەكشەلىگى – ستاسيونارلىق شيپاجايمىز. ياعني ءبىز اۋرۋدىڭ الۋ ماقساتىندا، ستاسيونارلىق ەم كورسەتۋ جانە دە رەابيليتاسيا جۇرگىزەمىز. وسىنداي جان-جاقتى كومەك كورسەتە الاتىن ورتالىقتا جۇمىس ىستەيتىنىم ماعان ەرەكشە كۇش-قۋات بەرەدى.
«باتامەن ەل كوگەرەدى، جاڭبىرمەن جەر كوگەرەدى» دەمەكشى، ەمدەلىپ، جازىلىپ شىققان ناۋقاستاردىڭ باتاسىنا بولەنىپ وتىرۋدان اسقان باقىت جوق. ارمانداعان ارمانىما، كوزدەگەن ماقساتىما جەتۋ – مەن ءۇشىن ەڭ باستىسى وسى!» - دەيدى بوتاگوز باقتۇر قىزى.