ۇلتى ورىس، جانى قازاق ميحايل
جولداستارى ميحايلدى ءمادي دەپ اتاپ كەتكەن. ول «قاراجورعا» ءبيىن ءوزى قىزىعىپ، تەلەديداردان كاسىبي بيشىلەردىڭ ءىس-قيمىلىن قاراپ وتىرىپ ۇيرەنگەن، دەپ حابارلايدى Almaty-akshamy.kz
ال قازاقشاسىن وسكەن ورتاسىندا قالىپتاستىرىپتى. ول كىشكەنتايىنان قازاق وتباسىنىڭ بالالارىمەن دوس بولعان، بىرگە ويناعان.
ارىس تۇرعىنى ميحايل كروكۋس ۇلتى ورىس بولا تۇرا، قازاقشا تازا سويلەيدى. ءتىپتى ولەڭ شىعارىپ، "قاراجورعا" بيلەيتىن ونەرى دە بار. ول 4 جىلدان بەرى ورازا ۇستاپ، جۇما سايىن مەشىتكە بارادى.
«1998 جىلى دۇنيەگە كەلدىم. 9-سىنىپقا دەيىن لەڭگىر قالاسىنداعى قازاق مەكتەبىندە ءبىلىم الدىم. ال كەيىننەن ارىسقا قونىس اۋدارىپ، وسىنداعى ورتا مەكتەپتى ءبىتىردىم. ءقازىر ەكى تىلدە دە ەركىن سويلەيمىن»، – دەيدى ميحايل كروكۋس.
ميحايل كروكۋس — ىىم-گە قاراستى الماتى اكادەمياسىنىڭ تۇلەگى. ەڭبەك جولىن ارىس قالالىق پوليسيا بولىمىندە «جەدەل ارەكەت ەتۋ» بولىمىندە باستاعان. ءقازىر ۋچاسكەلىك پوليسيا ينسپەكتورى قىزمەتىن اتقارىپ ءجۇر.
«مەن قارايتىن اۋماقتا 3000-عا جۋىق حالىق، مەكتەپ، تويحانا، دۇكەن جانە وزگە دە الەۋمەتتىك نىساندار مەن كاسىپكەرلىك قۇرىلىمدار بار. تاڭەرتەڭ ەرتە كوشەنى ارالاپ، اقساقالدارمەن كەزدەسەمىن. قوعامدىق تىنىشتىقتى ساقتاۋ ماقساتىندا قىزمەت ەتىپ كەلەمىن»، – دەيدى لەيتەنانت.
سونىمەن قاتار ميحايل مادەني سپورتتىق ءىس-شارالارعا دا ۇنەمى قاتىسىپ وتىرادى. وبلىستىق «پاراساتتى پوليسەي» بايقاۋىندا باس جۇلدەنى جەڭىپ العان. ال رەسپۋبليكالىق سايىستا ءۇشىنشى ورىندى ەنشىلەپتى.
«جاقىندا نۇر-Cۇلتاندا وتكەن «تاتۋلىق – تاۋەلسىزدىكتىڭ تىرەگى» اتتى رەسپۋبليكالىق سايىسقا قاتىستىم. مەملەكەتتىك ءتىلدى مەڭگەرگەن وزگە ۇلت وكىلدەرىنە قولداۋ كورسەتۋ، مەملەكەتتىك ءتىلدى ناسيحاتتاۋمەن قاتار ىشكى ىستەر ورگاندارىندا تىلدىك ورتانى قالىپتاستىرۋ ماقساتىندا وتكەن بايقاۋعا 19 پوليسيا قىزمەتكەرى قاتىستى. سوندا ءوزىم شىعارعان ولەڭمەن تانىستىرۋىمدى ايتىپ، قاراجورعا بيلەدىم. كورەرمەن كوزايىمىنا اينالىپ، ءىىم العىس حاتىمەن ماراپاتتالدىم»، - دەيدى ول.
ميحايل كروكۋس جاقىندا وتباسىن قۇرعان. بۇگىندە جۇبايى ايدانا ەكەۋى العاشقى ءسابيىن كۇتىپ وتىر.