ەڭبەك نارىعىنىڭ باسەكەگە قابىلەتتىلىگىن ارتتىراتىن جۇيەلى قادام.
ق ر پرەمەر-مينيسترى اسقار مامين ەلدەگى جۇمىسسىزدىقپەن كۇرەسكە قاتىستى ءبىرقاتار تاپسىرما بەردى، دەپ حابارلايدى Almaty-akshamy.kz
«ءبىرىنشى، ەڭبەك مينيسترلىگى سالالىق مەملەكەتتىك ورگاندارمەن، اكىمدىكتەرمەن بىرلەسىپ، ەكونوميكانىڭ ساپالى جانە ورنىقتى ءوسۋى ءۇشىن كادر قاجەتتىلىگىن انىقتاۋ ماسەلەسىن قاراسىن.
ەكىنشى، سيفرلاندىرۋ - جۇمىسپەن قامتۋدىڭ تۇبەگەيلى جاڭا فورمالارىنىڭ پايدا بولۋىنا اكەلىپ وتىر. جۇمىسپەن قامتۋدىڭ جاڭا فورمالارىن رەتتەۋ جانە ەكونوميكالىق بەلسەندىلىككە تارتۋ مەحانيزمىن ازىرلەۋدى جەدەلدەتۋ قاجەت»، - دەدى پرەمەر-مينيستر ۇكىمەتتىڭ بۇگىنگى وتىرىسىندا.
ۇشىنشىدەن، ۇكىمەت باسشىسى بىلىكتىلىكتى رەتتەۋدى – ەڭبەك نارىعىنىڭ باسەكەگە قابىلەتتىلىگىن ارتتىراتىن جۇيەلى قادام دەپ باعالادى. وسىعان وراي، ەڭبەك مينيسترلىگى سالالىق مەملەكەتتىك ورگاندارمەن، «اتامەكەن» كاسىپكەرلەر پالاتاسىمەن، كاسىپوداقتارمەن، ساراپشىلىق قوعامداستىقپەن بىرلەسىپ، «كاسىپتىك بىلىكتىلىكتەر تۋرالى» زاڭ جوباسىن ازىرلەپ، تالقىلاۋدى جىلدامداتۋ جۇكتەلدى.
«ءتورتىنشى، باتىس قازاقستان جانە قىزىلوردا وبلىستارىنىڭ اكىمدىكتەرى قىسقا مەرزىمدە ميكروقارجىلىق ۇيىمداردىڭ جارعىلىق كاپيتالىن تولىقتىرۋدى قامتاماسىز ەتسىن.
بەسىنشى، ەڭبەك مينيسترلىگى «اتامەكەن» كاسىپكەرلەر پالاتاسىمەن جانە اكىمدىكتەرمەن بىرلەسىپ، «باستاۋ بيزنەس» جوباسىن كاسىپكەرلىك جونىندەگى ۇلتتىق جوبا اياسىندا ىسكە اسىرۋدى جالعاستىرۋ قاجەت. كاسىپكەرلىك جونىندەگى جوبالىق وفيس اياسىندا مينيستر سەرىك شاپكەنوۆتىڭ جەتەكشىلىگىمەن جۇمىسپەن قامتۋ بويىنشا باعىت جاساۋ قاجەت»، - دەدى اسقار مامين.