مۇنداي قىزمەتتەردى سمارتفون ارقىلى قولجەتىمدى ەتۋ قاجەت.
پرەمەر-مينيستر ءاليحان سمايىلوۆ جۇمىسسىزدارعا بوس جۇمىس ورىندارى تۋرالى ەلەكتروندى حابارلامالار جىبەرۋ ماسەلەسىن پىسىقتاۋدى تاپسىردى، دەپ حابارلايدى Almaty-akshamy.kz.
ول بيىل ۇلتتىق جوبالاردى ىسكە اسىرۋ اياسىندا 269 مىڭنان اسا جۇمىس ورنى قۇرىلۋى ءتيىس ەكەنىن اتاپ ءوتتى. ءقازىر 203 مىڭنان استام ادام جۇمىسقا ورنالاسقان. الايدا 175 مىڭى – ۋاقىتشا جۇمىس.
«ءبىز تۇراقتى جۇمىس ورىندارىن كوبەيتۋگە كۇش سالۋىمىز كەرەك. ول ءۇشىن سيفرلىق تەحنولوگيالارعا سۇيەنۋ ماڭىزدى. مەملەكەتتىك ورگانداردىڭ جۇيەلەرىن تولىق ينتەگراسيالاي وتىرىپ، جۇمىسپەن قامتۋ سەرۆيستەرىنىڭ بارلىعىن سيفرلاندىرۋ قاجەت»، - دەدى سمايىلوۆ.
وتباسىنىڭ سيفرلىق كارتاسى، ەلەكتروندى ەڭبەك بيرجاسى مەن جۇمىس ورىندارىن قۇرۋدىڭ ينتەگراسيالانعان كارتاسىن بىرىكتىرگەننەن كەيىن، جۇمىسسىز جۇرگەندەرگە ەلەكتروندى حابارلامالار ارقىلى ۆاكانسيالار ۇسىنۋعا بولادى، - دەپ جالعاستىردى ءسوزىن پرەمەر-مينيستر.
«جۇمىسسىزدارعا ءوتىنىش جازباي-اق بوس جۇمىس ورىندارىن ۇسىنۋ ماڭىزدى. مۇنداي قىزمەتتەردى سمارتفون ارقىلى قولجەتىمدى ەتۋ قاجەت»، - دەدى ۇكىمەت باسشىسى.
سمايىلوۆ پرەزيدەنتتىڭ تاپسىرماسىمەن مەملەكەتتىك ورگاندار مەن بارلىق دەڭگەيدەگى اكىمدەردىڭ جۇمىسى جاڭا جۇمىس ورىندارىن قۇرۋ بويىنشا KPI كورسەتكىشى نەگىزىندە باعالاناتىنىن ەسكە سالدى.
سونداي-اق ول جاستاردى جۇمىسپەن قامتۋدىڭ جاڭا تاسىلدەرى مەن مەحانيزمدەرىن ەنگىزۋگە ەرەكشە نازار اۋدارۋدى تاپسىردى.
«جىل سايىن ەڭبەك نارىعىنا 300 مىڭعا جۋىق جاس شىعادى. ولاردىڭ جۇمىس تاجىريبەسى جوق، سوندىقتان جاستارعا ءبىرىنشى كەزەكتە جۇمىسقا ورنالاسۋعا كومەكتەسۋ كەرەك»، - دەدى پرەمەر-مينيستر.
سمايىلوۆ ءتيىستى مينيسترلىكتەرگە ەڭبەك ادامىنىڭ وڭ ءيميدجىن قالىپتاستىرۋدى تاپسىردى.