مەملەكەتتىك قىزمەت ءبىر كۇن ىشىندە تەگىن كورسەتىلەدى.
سودان كەيىن جۇمىس ىزدەۋشى رەتىندە تىركەلۋ تۋرالى حابارلاما نەمەسە باس تارتۋ تۋرالى دالەلدى جاۋاپ كەلەدى ، دەپ حابارلايدى Almaty-akshamy.kz
ەڭبەك جانە الەۋمەتتىك قورعاۋ ءمينيسترى 2024 جىلعى 27 ماۋسىمداعى بۇيرىقپەن جۇمىس ىزدەپ جۇرگەن ادامداردى، جۇمىسسىزداردى تىركەۋ جانە مانساپ ورتالىقتارى كورسەتەتىن ەڭبەك دەلدالدىعىن جۇزەگە اسىرۋ قاعيدالارىنا وزگەرىستەر ەنگىزدى.
اتاپ ايتقاندا، جۇمىس ىزدەپ جۇرگەن ادامداردى، جۇمىسسىزداردى تىركەۋ جانە مانساپتىق ورتالىقتار كورسەتەتىن ەڭبەك دەلدالدىعىن جۇزەگە اسىرۋ قاعيدالارىنا بىرنەشە قوسىمشالار جاڭا رەداكسيادا باياندالعان.
مەملەكەتتىك قىزمەت كورسەتۋ تاسىلدەرى:
- تىكەلەي ورتالىقتا؛
- eGov.kz ەلەكتروندىق ۇكىمەت ۆەب-پورتالى ارقىلى؛
- enbek.kz پورتالدى اقپاراتتاندىرۋ وبەكتىسى ارقىلى.
مەملەكەتتىك قىزمەت كورسەتۋ ءۇشىن كورسەتىلەتىن قىزمەتتى الۋشىدان تالاپ ەتىلەتىن قۇجاتتار مەن مالىمەتتەردىڭ تىزبەسى:
- ءوتىنىش؛
- كورسەتىلەتىن قىزمەتتى الۋشىنىڭ جەكە باسىن كۋالاندىراتىن قۇجات نە سيفرلىق قۇجاتتار سەرۆيسىنەن ەلەكتروندىق قۇجات (جەكە باسىن سايكەستەندىرۋ ءۇشىن)؛
- ەڭبەك قىزمەتىن راستايتىن قۇجات (بار بولسا)؛
- ءبىلىمى، بىلىكتىلىگى، ارنايى ءبىلىمىنىڭ نەمەسە كاسىپتىك دايارلىعىنىڭ بولۋى تۋرالى قۇجات (بار بولسا).
جەكە باستى كۋالاندىرعاننان جانە "ەڭبەك نارىعى" ااج-عا دەرەكتەردى ەنگىزگەننەن كەيىن قۇجاتتار كورسەتىلەتىن قىزمەتتى الۋشىعا قايتارىلادى.
Egov.kz پورتالىندا مەملەكەتتىك كورسەتىلەتىن قىزمەت ناتيجەسىن العان كۇنىن كورسەتە وتىرىپ، ءوتىنىمنىڭ قابىلدانعانى تۋرالى حابارلاما كورسەتىلەتىن قىزمەتتى الۋشىنىڭ "جەكە كابينەتىنە" جىبەرىلەدى.
بۇيرىق 2024 جىلعى 11 شىلدەدەن باستاپ قولدانىسقا ەنگىزىلەدى.