جاڭادان قۇرىلعان ءۇش وبلىس تالاپكەرلەرىنە گرانت ءبولۋ جالعاسپاق.
ق ر عىلىم جانە جوعارى ءبىلىم ءمينيسترى ساياسات نۇربەك ءبىلىم بەرۋدى دامىتۋدىڭ 2026 جىلعا دەيىنگى تۇجىرىمداماسىن تانىستىردى، دەپ حابارلايدى Almaty-akshamy.kz
«ۇلتتىق ءبىرىڭعاي تەستىلەۋ تالاپكەردىڭ وقۋ جەتىستىكتەرى مەن الەۋمەتتىك جاعدايىن ەسكەرەتىن كورسەتكىشتەر بويىنشا جەتىلدىرىلەدى. اتالعان ءتاسىل گرانت باعاسى جۇيەسىنە (30%دان 100%-عا دەيىن) ديففەرەنسياسيا ەنگىزۋدە دە قولدانىلاتىن بولادى. ءبىلىم الۋشىلارعا 2-3 پايىزدىق جەڭىلدەتىلگەن نەسيە الۋ مۇمكىندىكتەرى دە جوسپارلانىپ وتىر»، - دەدى مينيستر.
ۆەدومستۆو باسشىسىنىڭ ايتۋىنشا، تىعىز قونىستانعان جانە جاڭادان قۇرىلعان ءۇش وبلىس تالاپكەرلەرىنە گرانت ءبولۋ جالعاسپاق.
بۇدان بولەك، كادر دايارلاۋدى الدىن الا بولجاۋ مودەلىنە كوشۋ دە قاراستىرىلۋدا.
«بۇل فورسايتتىق-بولجاۋ نەگىزىندە ءوڭىر مەن ەكونوميكا سالالارىنا قاجەتتى جاڭا كاسىپتەرگە سۇرانىس پەن كادر دايارلاۋ جۇيەسىن ءتيىمدى ۇشتاستىرۋ بولىپ تابىلادى. وسى رەتتە مەملەكەت پەن بيزنەستىڭ، ۋنيۆەرسيتەتتەردىڭ كۇش-جىگەرى بىرىكتىرىلەدى»، - دەدى ول.
ساياسات نۇربەك «جاڭا ماماندىقتار اتلاسى» ازىرلەنگەنىن دە تىلگە تيەك ەتتى.
«وسى رەتتە وڭىرلىك ستاندارتتار ازىرلەنەدى. بۇل حالىقتىڭ تابىسىن ارتتىرۋدىڭ 2025 جىلعا دەيىنگى باعدارلاماسىنا ەنگەن «ماماندىعىم – بولاشاعىم» جوباسىن جۇزەگە اسىرۋعا مۇمكىندىك بەرەدى»، - دەدى ۆەدومستۆو باسشىسى.