الماتى قالاسىنىڭ اكىمى ەربولات دوسايەۆ «التىن بەلگى» يەگەرلەرىن قۇتتىقتادى
الماتىدا، رەسپۋبليكا سارايى الدىنداعى اباي الاڭىندا شاھار باسشىسى ەربولات دوسايەۆتىڭ قاتىسۋىمەن ۇزدىك تۇلەكتەرگە «التىن بەلگىنى» تابىستاۋ ءراسىمى ءوتتى.
سالتاناتتى ءىس-شاراعا سونداي-اق اباي اتىنداعى قازاق ۇلتتىق پەدوگوگيكالىق ۋنيۆەرسيتەتى ديرەكتورلار كەڭەسىنىڭ ءتورايىمى گۇلميرا ەسىمبايەۆا، ەڭبەك ارداگەرلەرى، ۇزدىك پەداگوگتار قاتىستى.
اشىق اسپان استىنداعى مەرەكەلى كەشتى حالىقارالىق «بوزتورعاي» بايقاۋىنىڭ جەڭىمپازدارى «قازاقستانىم» انىمەن اشتى.
بيىل قالا مەكتەپتەرىن 12 مىڭنان استام تۇلەك بىتىرسە، ولاردىڭ 605ء-ى «التىن بەلگى» يەگەرى اتاندى.
الماتى قالاسىنىڭ اكىمى ەربولات دوسايەۆ ۇلكەن ومىرگە قادام باسقالى تۇرعان ۇزدىك تۇلەكتەرگە دەگەن ىزگى تىلەگىن ارنادى، ولاردىڭ جاڭا قادامدارىنا تابىس تىلەدى.
«قۇرمەتتى مەكتەپ ءبىتىرۋشى جاس تۇلەكتەر!
سىزدەر بالالىق شاقتىڭ مەكەنى التىن ۇيالارىڭىزبەن قوشتاسىپ، جاڭا ومىرگە قادام باسقالى تۇرسىزدار. وسىناۋ قۋانىشتى ساتتە بارشالارىڭىزدى شىن جۇرەكتەن قۇتتىقتايمىن! بيىلعى جىلدى مەملەكەت باسشىسى بالالار جىلى دەپ جاريالادى. وسىناۋ تاريحي جىلدا ۇلكەن ومىرگە قانات قاققالى تۇرسىزدار. مەن دە وسىدان وتىز بەس جىل بۇرىن ءدال وسىنداي قۋانىشقا تولى ءساتتى باسىمنان كەشكەن ەدىم. وسىناۋ قۋانىشقا تولى ساتتەرىڭىز سىزدەردى ءاردايىم بيىكتەرگە باستاي بەرسىن!
مەملەكەت باسشىسى قاسىم-جومارت توقايەۆ دارىندى جاستارمەن كەزدەسكەندە: «قازىرگى زامان ءبىلىم مەن عىلىمنىڭ ءداۋىرى، ءاربىر تالانتتى، ەڭبەكقور ادام وسى زاماننىڭ باتىرى جانە ۇلت ماقتانىشى بولا الادى. مەن قازاق ەلىنىڭ جاستارىنا سەنەمىن» دەپ ۇلكەن سەنىم بىلدىرگەن ەدى. ون ءبىر جىلعى ءبىلىمنىڭ بەلگىسى – ورتا ءبىلىم اتتەستاتىن بيىل قالا مەكتەپتەرىن بىتىرگەن 13 مىڭنان استام تۇلەك السا، ولاردىڭ 574ء-ى قالانىڭ جالپى ءبىلىم بەرۋ مەكتەپتەرىنەن، 31ء-ى رەسپۋبليكالىق ءبىلىم وشاقتارىنان جۇزدەن جۇيرىك شىعىپ، «التىن بەلگى» يەگەرى اتانىپ وتىر. ۇلى اباي بابامىز «اتاڭنىڭ بالاسى بولما، ادامنىڭ بالاسى بول» دەپ ايتقانداي، سىزدەردى بولاشاقتا جوعارعى ءبىلىمدى، بىلىكتى مامان بولىپ، قالامىزدىڭ وركەندەۋىنە لايىقتى ۇلەس قوسادى دەپ سەنەمىز. جولدارىڭىز اشىق، كەلەشەكتەرىڭىز جارقىن بولسىن!»،– دەدى شاھار باسشىسى.
ماراپات يەلەرى اراسىندا رەسپۋبليكالىق، حالىقارالىق وليمپيادا جەڭىمپازدارى بار. سالتاناتتى مەرەكە سوڭىندا مەكتەپ بىتىرۋشىلەر قازاق ۇلتتىق وپەرا جانە بالەت تەاترى ۆوكاليستەرىنىڭ مۋزىكالىق سۇيەمەلدەۋىمەن «تۇلەكتەر ءۆالسىن» بيلەدى. شارا سوڭى مەرەكەلىك وتشاشۋعا ۇلاستى.
