پرەزيدەنت جولداۋىنا قاتىستى ءۇن بىلدىرۋشىلەردىڭ ءبىرىنىڭ پىكىرىن Almaty-akshamy.kz Assembly.kz-كە سىلتەمە جاساپ ۇسىنىپ وتىر.
مەملەكەت باسشىسى ق.توقايەۆ التىنشى شاقىرىلىمداعى پارلامەنتتىڭ 6-سەسسياسىنا قاتىسىپ، قازاقستان حالقىنا ارناعان كەزەكتى جولداۋىن جاريالادى.
ساياسي قۇجاتتا پرەزيدەنتىمىز جاھاندىق پاندەميا جاعدايىندا الدىڭعى ساپتا تىنىمسىز ەڭبەك ەتكەن ماماندارعا العىس ايتتى. سونداي-اق باستى مىندەتتىڭ الەۋمەتتىك-ەكونوميكالىق تۇراقتالىقتى ساقتاۋعا باعىتتالاتىنىن اتاپ ءوتتى.
مەملەكەت باسشىسى جولداۋدا «ۇلت جوسپارى – بەس ينستيتۋسيونالدىق رەفورمانى» نەگىزگى باعدار ەتىپ، ۇستانۋىمىز قاجەتتىگىنە ايرىقشا توقتالدى.
قوعامدا كوپتەن بەرى تالقىلانىپ كەلە جاتقان جەرگە بايلانىستى جەرىمىزدىڭ شەتەلدىكتەرگە ساتىلمايتىنىن مالىمدەپ، ەل ۇكىمەتىنە اۋىل شارۋاشىلىعى جەرلەرىن تولىققاندى ەكونوميكالىق اينالىمعا ەنگىزۋدىڭ وزگە ادىس-تاسىلدەرىن ازىرلەۋ بويىنشا ناقتى تاپسىرما بەردى.
مەملەكەت باسشىسى قازاقستاننىڭ ەكونوميكالىق باعىتى 7 نەگىزگە سۇيەنۋ كەرەكتىگىن مەڭزەپ، ەكونوميكا حالىقتىڭ ءال-اۋقاتىن جاقسارتۋعا جۇمىس ىستەۋى تيىستىگىنە توقتالدى. پرەزيدەنتىنىڭ ايتۋىنشا، يگىلىك پەن مىندەتتى تەڭ ءبولۋ، جەكە كاسىپكەرلىكتىڭ جەتەكشى ءرولى، جاڭا كاسىپكەرلەرگە ارنالعان نارىقتى قالىپتاستىرىپ، ءادىل باسەكەلەستىككە جاعداي جاساۋ – نەگىزگى باعىتتار قاتارىندا بولماق. سونىمەن قاتار، ءوندىرىستى ارتتىرۋ، كۇردەلى ءارى تەحنولوگيالىق ەكونوميكاعا يەك ارتۋ؛ ادام كاپيتالىن دامىتىپ، ينۆەستيسيا مەن ءبىلىمنىڭ جاڭا ءتۇرىن قالىپتاستىرۋ؛ ەكونوميكانى جاسىلداندىرىپ، قورشاعان ورتانى قورعاۋ؛ مەملەكەتتىڭ نەگىزدەلگەن شەشىمدەر قابىلداپ، قوعام الدىندا سول ءۇشىن جاۋاپ بەرۋىن قامتاماسىز ەتۋ – باسىمدىقتار قاتارىنا كىرەدى.
قوعامدا قوردالانعان تۇيتكىلدى جايتتار مەن ولاردىڭ شەشۋ جولدارى تۋرالى ايتقان پرەزيدەنتىمىز بارلىق سالاداعى تۇيىندەردىڭ جۇيەلى تارقالاتىنىن جەتكىزدى.
ق.ك.توقايەۆ: «ىشكى جالپى ءونىمنىڭ ابستراكتىلى وسىمىمەن جۇرتتى قۋانتا المايمىز. حالىققا تۇراقتى جۇمىس ورىندارى، قولايلى جول، اۋرۋحانالار مەن مەكتەپتەر، ساپالى ازىق-تۇلىك كەرەك. ەكونوميكالىق رەفورمالار ازاماتتاردىڭ تابىسىن ارتتىرىپ، تۇرمىس ساپاسىنىڭ جوعارى ستاندارتىن قامتاماسىز ەتكەندە عانا ءوزىن-وزى اقتاپ، قولداۋعا يە بولادى. وسىنى ءاردايىم ەستە ۇستاۋىمىز قاجەت»، دەدى.
ەندەشە، ەل تۇرعىندارى مەملەكەت باسشىسى مەجەلەپ بەرگەن باعىتتى نىق ۇستاپ، ەكونوميكامىزدى جاقسارتۋ جولىندا جۇمىلعان جۇدىرىقتاي جيناقى جۇمىس ىستەۋىمىز قاجەت. اسىرەسە، جەتى ەكونوميالىق نەگىزگە سۇيەنىپ، سەنىمدى ارەكەت ەتكەنىمىز ابزال.