توقتاربەكوۆا لاۋرا نيازبەك قىزى،فيلوسوفيا، ساياساتتانۋ جانە ءدىنتانۋ ينستيتۋتىنىڭ ءدىنتانۋ ورتالىعىنىڭ جەتەكشى قىزمەتكەرى، PhD
- جاستارعا جان-جاقتى قولداۋ كورسەتۋ. جاڭا قازاقستاننىڭ بولاشاعى جاستار بولعاندىقتان، ولاردى جۇمىسپەن قامتاماسىز ەتۋ، كاسىپكەرلىك باستامالارى ءۇشىن 2،5 پايىزبەن نەسيە بەرۋ قۇپتارلىق. الايدا تەك كاسىپكەرلىك ءۇشىن عانا ەمەس، جاستاردىڭ باستى ماسەلەسى باسپانا بولعاندىقتان، ولارعا ءتۇرعىن-ۇي جاعدايىن تۇزەتۋ ءۇشىن دە 2،5 پايىزدا نەسيە بەرىلگەن دۇرىس.
- ءاربىر بالاعا كامەلەتتىك جاسىنا تولعانعا دەيىن ۇلتتىق قوردان قاراجات ءبولۋ. بۇل جيناقتالعان قاراجات جەتكىنشەكتىڭ ءبىلىم الۋى مەن ءۇي ساتىپ الۋىنا جۇمسالادى. ەگەر بۇل باستاما شىنىمەن ىسكە اسىرىلاتىن بولسا، كوپتەگەن الەۋمەتتىك جاعدايى تومەن وتباسى ءۇشىن ۇلكەن كومەك بولاتىنى انىق.
- 32 اۋداندىق اۋرۋحانانى تولىق مودەرنيزاسيادان وتكىزۋ. دەنى ساۋ ۇلت - ساۋ مەملەكەت دەگەندەي، ەمحانالار مەن اۋرۋحانالاردىڭ قازىرگى جاعدايى ءماز ەمەس ەكەندىگى بارشاعا ءمالىم. سونداي-اق كەيبىر اقىلى نەمەسە اقىلى ەمەس ەمدەۋ ورتالىقتارىندا وتىرعان جاس دارىگەر مامانداردىڭ كاسىبي دەڭگەيلەرىنىڭ تومەندىگى دە بەلگىلى. بۇل ورايدا رەزيدەنتۋرا ءۇشىن گرانتتاردى 70 پايىزعا كوبەيتۋ وڭ شەشىم.
- ورتا ءبىلىم بەرۋ ساپاسىن ارتتىرۋ. ءالى تولىقتاي شەشىلمەگەن ماسەلە - الماتى، نۇر-سۇلتان جانە ت.ب. قالالارىنىڭ كەيبىر اۋداندارىندا مەكتەپ تاپشىلىعى. سىنىپتاردا وقۋشى سانى 30-32-دەن اسىپ كەتكەن، باستاۋىش سىنىپتا وقيتىن وقۋشىلار سانىنىڭ كوپتىگىنەن ءۇش اۋىسىمنان وقيدى. ءبىز «100 مەكتەپ، 100 اۋرۋحانا» باعدارلاماسىن شارتتى ورىنداۋ بارىسىندا، 150-200 تۇتىننەن اسپايتىن شاعىن اۋىلداردا 1000 ورىندىق مەكتەپتەر سالىنىپ، قاڭىراپ بوس تۇرعانىن دا بىلەمىز. وسى قاتەلىكتى قايتالاماۋ ءۇشىن حالىق سانى كوپ اۋداندار مەن اۋىلدارعا عانا مەكتەپتەر مەن اۋرۋحانالار سالۋ كەرەك.
- مەكتەپكە دەيىنگى تاربيە ماسەلەسىن باستى نازارعا الۋ. بالاباقشا تاربيەشىلەرىنىڭ الەۋمەتتىك مارتەبەسىن ارتتىرىپ، جالاقىسىن كوبەيتىپ، جۇمىس جۇكتەمەسىن ازايتۋ، ەڭ باستىسى، بالاباقشانى ەمەس، سوندا قىزمەت ەتەتىن تاربيەشىنى اتتەستاسيادان وتكىزۋ جۇمىس بەرۋشىنىڭ بىلىكتى ماماندى جۇمىسقا الۋىنا كەپىلدىك بەرەدى. ويتكەنى سوڭعى كەزدەرى الەۋمەتتىك جەلىلەردەن بالاباقشا تاربيەشىسىنىڭ نەمەسە كۇتۋشىسىنىڭ بالاعا جاساعان پسيحولوگيالىق، فيزيكالىق قىسىم كورسەتۋلەرىنىڭ كۋاسى بولۋدامىز. ونىڭ سەبەبى – مەملەكەتتىك نەمەسە مەملەكەتتىك ەمەس بالاباقشاعا پەداگوگيكالىق ءبىلىم بار نەمەسە ۋنيۆەريسيتەتتى ەندى بىتىرگەن جۇمىس تاپپاي جۇرگەن كەز كەلگەن ادامدى جۇمىسقا قابىلداي بەرەدى. ويتكەنى تاربيەشىلەر مەن تاربيەشى كومەكشىلەرىنىڭ جالاقىسى از بولعاندىقتان، وعان ارنايى مەكتەپكە دەيىنگى ءبىلىم بار مامان وزدىگىمەن كەلمەيدى. سوندىقتان، تاربيەشىلەر مەن تاربيەشى كومەكشىلەرىنىڭ بىلىكتىلىگىن تەكسەرۋ ءۇشىن اتتەستاسيادان وتكىزۋ ماڭىزدى.