جولداردى جوندەۋ جانە اۆتوبۋستاردى جاڭارتۋ...

الماتى اكىمىمەن كەزدەسۋدە قالا تۇرعىندارى ايتقان ماسەلەلەر قالاي شەشىلىپ جاتىر

الماتى اكىمى ەربولات دوسايەۆتىڭ تۇركسىب اۋدانى تۇرعىندارىمەن كەزدەسۋىنەن كەيىن اكىمدىكتىڭ باسپا ءسوز قىزمەتى الدىڭعى كەزدەسۋ بارىسىندا بەرىلگەن تاپسىرمالاردىڭ قالاي ورىندالىپ جاتقانىن حابارلادى.

اۋدان تۇرعىندارى قوعامدىق كولىكتىڭ ەسكى ەكەنىنە شاعىمداندى. 2023 جىلدىڭ قورىتىندىسى بويىنشا №8، 13، 17، 38، 46، 47، 69 مارشرۋتتاعى اۆتوبۋستار جاڭارتىلدى. بارلىعى 130 اۆتوبۋس. مىسالى، №17 مارشرۋتتاعى ISUZU ماركالى 8 مەترلىك اۆتوبۋستار 2023 جىلعى ZhongTong ماركالى 10 مەترلىك اۆتوبۋستارعا اۋىستىرىلدى. 

سونىمەن قاتار، تۇرعىندار بەلگىلى ءبىر اۋماقتارداعى جولداردى جوندەۋ ماسەلەسىن كوتەردى. وتكەن جىلى رىسقۇلوۆ داڭعىلىنان الماتى-1 تەمىرجول ۆوكزالىنا دەيىنگى سەيفۋللين داڭعىلىندا پوليمەرلى قوسپالاردى قولدانا وتىرىپ، ۇزىندىعى 5،4 شاقىرىم جول جابىنىنا ورتاشا جوندەۋ جۇرگىزىلدى. «Vision Zero» باعدارلاماسى اياسىندا تروتۋارلار ءىشىنارا جوندەلىپ، ارىق ناۋالارى اۋىستىرىلىپ، قاۋىپسىزدىك ارالدارى ورناتىلدى. ءارى ارال جانە بايرون كوشەلەرىنىڭ اۋماعىنا اسفالتبەتون جابىنى توسەلدى.

«قايرات» شاعىن اۋدانىندا كەيبىر تۇرعىن ۇيلەر مەن مەكتەپكە باراتىن جولداردا شاعىم بار. جوندەۋ اياسىندا ۇزىندىعى 3 كم ۋچاسكەدە اسفالتبەتون جابىنى توسەلىپ، جاياۋ جۇرگىنشىلەر تروتۋارلارى جابدىقتالدى.

بۇعان قوسا، قالا اكىمىنىڭ تاپسىرماسىمەن اۋدانداعى رىسقۇلوۆ داڭعىلى، ءسۇيىنباي، مايلين، شولوحوۆ، اقان سەرى سىندى 5 ماگيسترالدىق كوشە بويىندا ۇزىندىعى 23 كم تەحنيكالىق تروتۋارلار جاسالدى.