كوكتەم كەلىپ كوشەلەردىڭ وپىرىلعان جەرلەرىن قازىپ، اعىمداعى جوندەۋ جۇمىستارى قارقىندى جۇرگىزىلۋدە. وسى رەتتە جول اكتيۆتەرىنىڭ ۇلتتىق ساپا ورتالىعى الماتى فيليالىنىڭ ديرەكتورى ماۋلەن توقتارباي ۇلى ءالىپوۆتىڭ جول ساپاسىنا قاتىستى ساۋالدارىمىزعا قاتىستى پىكىرىن ءبىلىپ ەدىك.
- جالپى بيىلعى جىلعا قانداي جاڭالىقتارىڭىز بار؟ اسفالتتىڭ ساپاسىن ارتتىرۋ جاعىن قارادىڭىزدار ما؟
- الماتى قالاسى بويىنشا ناۋرىزباي، المالى، مەدەۋ اۋداندارىمەن اعىمداعى جوندەۋ جۇمىستارى باستالىپ كەتتى. قازىرگى تاڭدا جالپىعا ورتاق پايدالانىلاتىن كوشە جەلىسى جولدارىن ورتاشا جوندەۋگە ۆەدومستۆولىق ساراپتاما جۇرگىزۋ جۇمىستارى جۇرگىزىلىپ جاتىر. قالالىق اۆتوبۋس جۇرەتىن جولاقتار مەن تۇراقتاردىڭ جازعى ۋاقىتتا اۋا تەمپەراتۋراسىنىڭ جوعارلاۋ كەزىندەگى اۋىر كولىكتەردىڭ سالماعىنان جولتابان (كولەيا)، ياعني ويىلىپ كەتۋ اقاۋلارىنىڭ الدىن الۋ ماقساتىندا ءار ءتۇرلى پوليمەر قوسپالارىن قوسۋ ارقىلى ەكسپەريمەنتالدى اسفالتبەتون جابىندىسىن توسەۋ تاجىريبەسى قارالۋدا. وعان قوسا، اكىمدىكتىڭ تىكەلەي تاپسىرماسىمەن عالىمدار توبى جۇمىلىپ، گيبريدتىك اسفالتبەتون قوسپاسىن ويلاپ تابۋدى قولعا العان. بيىل اسفالتبەتون جابىندىسىنىڭ ساپاسىنا اعىمداعى جانە ورتاشا جوندەۋ جۇمىستارىنا ەرەكشە نازار اۋدارىلۋدا.
- وتكەن جىلى الماتى قالاسى اۋداندارىمەن كەلىسىمشارتقا قول قويدىڭىزدار. ەندى كوشەلەردى تەكەرۋگە شىعىپ جاتىرسىزدار ما؟
- الدىڭعى 2023 جىلعا قاراعاندا بيىلعى جىلى الماتى قالاسى بويىنشا 8 اۋدانمەن كەلىسىمشارتقا وتىردىق، سايكەسىنشە تەكسەرۋ اۋقىمى دا جوعارىلادى. قازىرگى تاڭدا كوشە جەلىلەرىنە اعىمداعى جوندەۋ جۇمىستارى بويىنشا تەكسەرۋلەر جۇرگىزىلىپ جاتىر. بارلىق جۇمىستار كەلىسىمشارت نەگىزىندە، جوسپار بويىنشا ىسكە اسۋدا. جوعارىدا اتاپ وتكەندەي، ۆەدومستۆولىق ساراپتاما، اۆتوموبيل جولدارىن تەحنيكالىق قۇجاتتاماسىن دايارلاۋ جۇمىستارى دا ورىندالىپ جاتىر.
- ماسەلەن، تومەنگى كەمەل شاعىن اۋدانى جاقتاعى كوشەلەردى وتكەن جىلى جاماعان ەدى. بيىلعى جىلى سىن كوتەرمەي، ويىلىپ، كەتتى. بۇل وتكەن جىلى ساپاسىز جاماۋدىڭ سالدارى ەكەنى انىق. قانداي شارا قولداندىڭىزدار؟
- ساپانى باقىلاپ ۇستاۋ جۇمىستارى ارنايى رەتپەن جۇزەگە اسادى. جول سالىنىپ جاتقان نىسانعا ينجەنەرلەرىمىز بارىپ سىناما الادى، سودان كەيىن زەرتحانادا الىنعان سىنامالارعا ساراپتاما جاسالادى. تەكسەرۋ قورىتىندىسى بويىنشا جول سالعان مەردىگەر كومپانيا مەن تاپسىرىس بەرۋشىگە حات جولدانادى. زەرتتەۋ بارىسىندا الىنعان سىناما نورماتيۆتىك تالاپتارعا سايكەس بولماعان جاعدايدا مەردىگەر كومپانيا ءوز قاراجاتىنا قايتا جوندەۋ جۇمىستارىن جۇرگىزەدى. سوعان مىندەتتەلەدى. وسىلايشا، باقىلاۋ جۇمىستارى ەگجەي-تەگجەيلى جۇرگىزىلەدى.
ال كەمەل شاعىناۋدانى بويىنشا ءبىزدىڭ مەكەمەگە جەتىسۋ اۋدانى اكىمدىگىنەن تەك جول قۇرىلىس ماتەريالدارىن الۋعا ۇسىنىس تۇسكەن. الىنعان ماتەريالدار سىناقتان ءوتىپ، وڭ باعا بەرىلگەن. ال جۇمىستىڭ تەحنولوگياسىن تەكسەرۋگە مۇمكىندىك بولمادى. سەبەبى اۋداننان ۇسىنىس بولمادى. ءبىز ءوز ەركىمىزبەن نىسانعا تەكسەرىس جۇرگىزە المايمىز، وكىنىشكە قاراي.