قاعيدا الماتى قالاسىن سۋمەن قامتۋ، سۋ بۇرۋ، جىلۋمەن جابدىقتاۋ، گازبەن جابدىقتاۋ جانە ەلەكترمەن جابدىقتاۋ جۇيەلەرىن پايدالانۋ ءتارتىبىن ايقىندايدى.
الماتى ءماسليحاتى ينجەنەرلىك كوممۋنيكاسيالاردى ۇستاۋ قاعيدالارىنىڭ قايتا وڭدەلگەن جوباسىن ماقۇلدادى، دەپ حابارلايدى Almaty-akshamy.kz
VIII شاقىرىلعان الماتى قالاسى ءماسليحاتىنىڭ XV سەسسياسى بارىسىندا جاڭارتىلعان «الماتى قالاسىندا ينجەنەرلىك كوممۋنيكاسيالاردى كۇتىپ-ۇستاۋ قاعيدالارىن» بەكىتۋ ماسەلەسى قارالدى.
قالانىڭ ەنەرگەتيكا جانە سۋمەن جابدىقتاۋ باسقارماسىنىڭ باسشىسى تالعات مالىبايەۆ قاعيدالار قۇقىقتىق اكتىلەر تۋرالى زاڭعا جانە ادىلەت دەپارتامەنتىنىڭ نۇسقامالارىنا سايكەس قايتا وڭدەلگەنىن جانە ولاردا اپاتتىق-قالپىنا كەلتىرۋ جۇمىستارىن شۇعىل جۇرگىزۋ كەزىندە جول جابىندارىن اشۋ، كوشەلەردى، الاڭداردى جانە باسقا دا اباتتاندىرىلعان جالپى پايدالانىمداعى اۋماقتاردى قازۋ جونىندەگى جۇمىستاردى جۇرگىزۋ ءتارتىبىن سيپاتتايتىن جاڭا تاراۋ پايدا بولعانىن اتاپ ءوتتى.
«قاعيدالار جوباسىندا تۇتىنۋشى مەن قىزمەت كورسەتۋشى اراسىنداعى جاۋاپكەرشىلىك شەكارالارىن سيپاتتاۋ؛ تەڭگەرىمدىك تيەسىلىگىن ءبولۋ شەكارالارىن ايقىنداۋ؛ تۇتىنۋشى مەن قىزمەت كورسەتۋشىنىڭ قۇقىقتارى مەن مىندەتتەرى بولىگىندەگى نورمالار قامتىلادى»، - دەدى ول.
اتاپ ايتقاندا، جەراستى ينجەنەرلىك كوممۋنيكاسيالارىن توسەۋ ءۇشىن جول جابىندارىن اشۋ، كوشەلەردى، الاڭداردى جانە جالپى پايدالانىمداعى اۋماق بەلگىلى ءبىر شارتتاردى ساقتاي وتىرىپ قازىلادى. شۇڭقىرلار مەن ترانشەيالاردىڭ ۋچاسكەلەرى كوشەلەردە، اۋلالاردا، سونداي-اق قوعامدىق جانە جول ءجۇرۋ ورىندارىندا قورشالۋعا ءتيىس. قورشاۋلاردا تۇندە جارىق شاعىلىستىرعىش مەن دابىلى بار ەسكەرتۋ جازۋلارى مەن بەلگىلەرىن ورناتۋ قاجەت. ەرەجەگە سايكەس، ادامداردىڭ جاپپاي وتەتىن جەرلەرىنە ىرگەلەس ۋاقىتشا قۇرىلىس قورشاۋلارى ۇزدىكسىز قورعانىش قالقانمەن جابدىقتالادى، ال جۇمىس جۇرگىزۋ ايماعىنا تۇسەتىن اعاشتاردىڭ ءدىڭى زاقىمدانۋدان قورعالۋعا ءتيىس. بۇدان باسقا، كەيىنگى ۋچاسكەلەردەگى جۇمىستاردى قالپىنا كەلتىرۋ جۇمىستارى مەن اۋماقتى جيناۋدى قوسقاندا، الدىڭعى ۋچاسكەدەگى بارلىق جۇمىس اياقتالعاننان كەيىن عانا باستاۋعا رۇقسات ەتىلەدى. كوشەلەر بويىنشا ينجەنەرلىك جەلىلەردى سالۋ كەزىندە اسفالتبەتون جابىنى قولدانىستاعى جولدىڭ بويىنا – جيەكتەن جيەككە دەيىن قالپىنا كەلتىرىلەدى.