اقتوبە وبلىسىندا جول اپاتىنان كولىگى ەكىگە ءبولىنىپ كەتكەن جۇرگىزۋشى امان قالدى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
13 اقپاندا سامارا-شىمكەنت اۆتوجولىنىڭ 705 شاقىرىمىندا ەكى كولىكتىڭ قاتىسۋىمەن جول-كولىك وقيعاسى ورىن الدى. ۆاز-21144 كولىگىنىڭ جۇرگىزۋشىسى جول جانە مەتەورولوگيالىق جاعدايلاردى ەسكەرمەي، قارسى جولاقتاعى اۆتوكولىكپەن سوقتىعىسقان. جول اپاتى سالدارىنان ۆاز اۆتوكولىگى قاق ايىرىلعان.
ەكىگە ءبولىنىپ قالعان كولىكتىڭ جۇرگىزۋشىسى اپات بولعان ساتتە ارتقى ورىندىعىنا ۇشىپ كەتكەن. سول ارقىلى جۇرگىزۋشى امان قالعان.
ال Opel Vectra كولىگىنىڭ جۇرگىزۋشىسى مەن جولاۋشىسى ءتۇرلى جاراقاتتارمەن اقتوبە قالاسىنىڭ جەدەل مەديسينالىق جاردەم اۋرۋحاناسىنا جاتقىزىلدى.