ق ر قارجى مينيسترلىگىنىڭ مەملەكەتتىك كىرىستەر كوميتەتى تۇرعىن ءۇيدى جالعا بەرەتىن تۇلعالارعا سالىق مىندەتتەمەلەرىن ورىنداۋ قاجەتتىگىن ەسكەرتتى، دەپ حابارلايدى اlmaty-akshamy.kz
ۆەدومستۆو مالىمەتىنشە، جەكە كاسىپكەر (بۇدان ءارى - جك) رەتىندە تىركەلمەگەن جالعا بەرۋشىلەر سالىق مىندەتتەمەلەرىن ءبىرىڭعاي جيىنتىق تولەمدى (بۇدان ءارى - بجت) تولەۋ جولىمەن نەمەسە جەكە تابىس سالىعى بويىنشا دەكلاراسيانى (بۇدان ءارى - جتس) ۇسىنۋ جولىمەن ورىنداي الادى. جەكە كاسىپكەر تۇرعىن ءۇيدى جالعا بەرۋ كەزىندە بيۋدجەتپەن ەسەپ ايىرىسۋ كەزىندە پاتەنت نەمەسە وڭايلاتىلعان دەكلاراسيا نەگىزىندە ارناۋلى سالىق رەجيمىن (بۇدان ءارى - اسر) پايدالانۋعا قۇقىلى.
بۇل رەتتە ادىستەردىڭ ءارقايسىسىنىڭ وزىندىك ارتىقشىلىقتارى مەن شەكتەۋلەرى بار. اتاپ ايتقاندا، تۇرعىن ءۇيدى جالعا بەرەتىن جانە جەكە كاسىپكەر رەتىندە تىركەلمەگەن تۇلعالار جىل سايىن ەسەپتى سالىق كەزەڭىنەن كەيىنگى جىلدىڭ 31 ناۋرىزىنان كەشىكتىرىلمەيتىن مەرزىمدە جەكە تابىس سالىعى بويىنشا دەكلاراسيانى (240.00-نىسان) تابىس ەتەدى. دەكلاراسيانى تاپسىرۋ ءۇشىن بەلگىلەنگەن مەرزىمنەن كەيىن كۇنتىزبەلىك ون كۇننەن كەشىكتىرىلمەيتىن مەرزىمدە الىنعان تابىستىڭ 10 پايىز مولشەرىندە جەكە تابىس سالىعىن تولەيدى.
جەكە تۇلعالار جەكە تابىس سالىعى بويىنشا دەكلاراسيانى (240.00-نىسان) «E-Salyq Azamat» ءموبيلدى قوسىمشاسى نەمەسە cabinet.salyk.kz web-پورتالىندا سالىق تولەۋشىنىڭ كابينەتى ارقىلى تاپسىرا الادى. ەگەر تۇرعىن ءۇي سالىق اگەنتىنە (جەكە كاسىپكەر، جەكە پراكتيكامەن اينالىساتىن تۇلعا، زاڭدى تۇلعا، ونىڭ قۇرىلىمدىق بولىمشەلەرى، رەزيدەنت ەمەس زاڭدى تۇلعا) جالعا بەرىلگەن جاعدايدا جەكە تابىس سالىعىن ەسەپتەۋدى، ۇستاپ قالۋدى جانە بيۋدجەتكە تولەۋدى سالىق اگەنتى تولەم كوزىنەن جۇزەگە اسىرادى.
جەكە تۇلعالار سالىق مىندەتتەمەلەرىن رەسپۋبليكالىق جانە وبلىستىق ماڭىزى بار قالالاردىڭ، استانانىڭ تۇرعىندارى ءۇشىن 1 اەك جانە قالعان ەلدى مەكەندەردىڭ تۇرعىندارى ءۇشىن 0،5 اەك مولشەرىندە ءبىرىڭعاي جيىنتىق تولەم تولەۋ ارقىلى جۇزەگە اسىرا الادى. مۇنداي جەكە تۇلعالار تولەم جۇرگىزىلگەن كۇننەن باستاپ تولەم جۇرگىزىلگەن ايدىڭ سوڭعى كۇنىنە دەيىن ءبىرىڭعاي جيىنتىق تولەم تولەۋشىلەر دەپ تانىلاتىن بولادى. بۇل رەتتە ءبىرىڭعاي جيىنتىق تولەم تولەۋشىنىڭ كۇنتىزبەلىك جىل ىشىندەگى تابىس مولشەرى 1 175 ەسەلەنگەن اەك-تەن اسپاۋى ءتيىس.
پاتەنت نەمەسە وڭايلاتىلعان دەكلاراسيا نەگىزىندە ارناۋلى سالىق رەجيمىن قولداناتىن جەكە كاسىپكەر تيىسىنشە الىنعان كىرىستىڭ 1 نەمەسە 3 پايىز مولشەرلەمەسى بويىنشا جەكە تابىس سالىعىن (2023 جىلعا دەيىن جەكە تابىس سالىعىن تولەۋدەن بوساتىلعان) ەسەپتەيدى. سونداي-اق «مىندەتتى الەۋمەتتىك ساقتاندىرۋ تۋرالى»، «زەينەتاقىمەن قامسىزداندىرۋ تۋرالى» جانە «مىندەتتى الەۋمەتتىك مەديسينالىق ساقتاندىرۋ تۋرالى» زاڭداردا بەلگىلەنگەن مولشەرلەمەلەر بويىنشا الەۋمەتتىك تولەمدەردى (الەۋمەتتىك اۋدارىمدار، مىندەتتى زەينەتاقى جارنالارى، ءمامس جارنالارى مەن اۋدارىمدارى) تولەيدى.
ق ر «اكىمشىلىك قۇقىق بۇزۋشىلىق تۋرالى» كودەكسىنىڭ 272 جانە 275-باپتارىنا سايكەس، سالىق ەسەپتىلىگىن ۇسىنباۋ، سونداي-اق سالىق سالۋ وبەكتىلەرىن جانە سالىق ەسەپتىلىگىندە كورسەتىلۋگە جاتاتىن وزگە دە مۇلىكتى جاسىرۋ اكىمشىلىك جازاعا، ونىڭ ىشىندە اقشالاي ايىپپۇل تۇرىندە ءوندىرىپ الۋعا اكەپ سوعادى»، - دەپ ەسكەرتەدى كوميتەتتەن.