2023 جىلعى 1 قاڭتارداعى جاعداي بويىنشا، قازاقستان حالقىنىڭ سانى 19 765 004 ادامعا جەتتى.
مۇنداي دەرەكتى ۇلتتىق ستاتيستيكا بيۋروسى كەلتىرگەن، دەپ حابارلايدى Almaty-akshamy.kz.
اتاپ ايتقاندا، 12 ملن 208،2 مىڭ ادام قالادا تۇرسا، اۋىل تۇرعىندارىنىڭ سانى – 7 ملن 556،7 مىڭ ادام.
«بىلتىر رەسپۋبليكادا 403،5 مىڭ ءسابي ومىرگە كەلدى. ونىڭ ىشىندە 208 مىڭى – ۇل بالا، 195،5 مىڭى – قىز بالا. ال 134،7 مىڭ ادام قايتىس بولدى. حالىقتىڭ تابيعي ءوسىمى وتكەن جىلدىڭ 12 ايىندا 268،8 مىڭ ادامدى قۇرادى»، - دەلىنگەن حابارلامادا.
بالا تۋۋ كورسەتكىشىنىڭ ەڭ جوعارى دەڭگەيى ماڭعىستاۋ، تۇركىستان وبلىستارىندا جانە شىمكەنت قالاسىندا بايقالدى.
ءولىم-جىتىمنىڭ ەڭ جوعارى دەڭگەيى سولتۇستىك قازاقستان، شىعىس قازاقستان جانە قوستاناي وبلىستارىندا تىركەلدى.