ماۋسىم ايىنىڭ قورىتىندىسى بويىنشا بۇل سالادا باعا ءبىر ايدا 2،6%-عا قىمباتتاعان.
باعانىڭ ەڭ جوعارى جىلدىق ءوسىمى شىعىس قازاقستان، قاراعاندى، قوستاناي وبلىستارىندا تىركەلدى، دەپ حابارلايدى Almaty-akshamy.kz ەnergyprom.kz پورتالىنا سىلتەمە جاساپ.
ۇلتتىق ستاتيستيكا بيۋروسىنىڭ مالىمەتىنشە، بىلتىر ەلدە ساۋالناماعا قاتىسقان ءۇي شارۋاشىلىقتارىنىڭ 90،2%-ى جۇمساق جيھازعا يەلىك ەتتى. تاعى 80،6%-ىندا جاتىن بولمە جيھازى، 94،4%-ىندا اس ءۇي جيھازى، 97%-ىندا كىلەمدەر بولسا، 3،4%-ىندا ونەر تۋىندىلارى، 36،7%-ىندا باسقا دا جيھاز بار.
قالا تۇرعىندارى اۋىلدىقتارعا قاراعاندا جۇمساق جيھاز، اس ءۇي جيھازى، ونەر زاتتارىمەن جاقسى قامتاماسىز ەتىلگەن. ءوز كەزەگىندە اۋىل تۇرعىندارىنىڭ جاتىن بولمە جيھازى، كىلەمدەرمەن قامتاماسىز ەتۋ دەڭگەيى جوعارى.
وڭىرلىك بولىنىستە جۇمساق جيھازبەن قامتۋ كورسەتكىشى الماتىدا جوعارى (99،4%)، ەڭ تومەن كورسەتكىش – ماڭعىستاۋ وبلىسىندا (53،6%).
جاتىن بولمە جيھازىمەن قامتاماسىز ەتۋ بويىنشا ءبىرىنشى ورىندا الماتى وبلىسى (98،6%) تۇر، ەڭ تومەنگى دەڭگەي ماڭعىستاۋ وبلىسىندا تىركەلدى (43،2%).
اس ءۇي گارنيتۋراسىمەن الماتى، سولتۇستىك قازاقستان جانە اقمولا وبلىستارىنىڭ ءۇي شارۋاشىلىقتارى 100 پايىزعا قامتىلعان. بۇل كورسەتكىش تۇركىستان وبلىسىندا تومەن (86،8%).
وسى جىلدىڭ ءقاڭتار-ساۋىر ايىنىڭ قورىتىندىسى بويىنشا وتاندىق وندىرۋشىلەر اس ءۇي جيھازىنا دەگەن سۇرانىستى (ىشكى نارىقتا ساتۋ جانە ەكسپورت) 64،8%-عا قامتاماسىز ەتتى. يمپورت – 35،2%. بۇل رەتتە سايكەس كەزەڭدە ءوندىرىس ءبىر جىلدا 28،4%-عا قىسقاردى. وتاندىق ءوندىرىس ۇلەسى جيھاز يمپورتى وندىرىسكە قاراعاندا ايتارلىقتاي ازايعاندىقتان عانا وسكەن.
ىشكى نارىقتا 43،3 مىڭ بىرلىك اس ءۇي جيھازى ساتىلدى. بۇل بىلتىرعىعا قاراعاندا 49،6%-عا از. سەكتوردا ەكسپورت ءىس جۇزىندە جوق: 4 اي ىشىندە سىرتقى نارىققا 36 بىرلىك ءونىم جونەلتىلدى.
بيىلعى ماۋسىم ايىنىڭ قورىتىندىسى بويىنشا جيھاز بەن تۇرمىستىق زاتتاردىڭ باعاسى ءبىر ايدا 2،6%-عا، ءبىر جىلدا 20،3%-عا ارتتى.
رەسپۋبليكا بويىنشا باعانىڭ ەڭ جوعارى جىلدىق ءوسىمى شىعىس قازاقستان (41،8%)، قاراعاندى (33،1%) جانە قوستاناي (31،5%) وبلىستارىندا تىركەلدى.
بۇل رەتتە باعانىڭ ەڭ تومەن جىلدىق ءوسىمى ماڭعىستاۋ (4،3%)، پاۆلودار (7،7%) جانە ۇلىتاۋ (10،6%) وبلىستارىندا بايقالدى.