قىزىلكۇرەڭ بەلبەۋ يەگەرى 48 كەلىگە دەيىنگى سالماقتا بەلدەستى
ابۋ-دابيدە ءوتىپ جاتقان الەم چەمپيوناتىندا 15 جاستاعى قازاقستاندىق جىبەك قۇلىمبەتوۆا تاعى ءبىر «التىن» جەڭىپ الىپ، دجيۋ-دجيتسۋدان التى دۇركىن الەم چەمپيونى اتاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قىزىلكۇرەڭ بەلبەۋ يەگەرى 48 كەلىگە دەيىنگى سالماقتا بەلدەستى. ول 16-17 جاس ارالىعىنداعى سپورتشىلارمەن سىنعا ءتۇستى. Abu Dhabi World Jiu-Jitsu Championship دەپ اتالاتىن چەمپيونات بەلبەۋ جۇيەسى بويىنشا ءوتتى. فينالدا جىبەك ءباا-نىڭ جەرگىلىكتى سپورتشىسىمەن كۇش سىناسىپ، ۇپاي سانىمەن جەڭىسكە جەتتى.
چەمپيوننىڭ ايتۋىنشا، ول اراب قالاسىندا 20 كۇن بولعان. وسى ۋاقىتتا دەيىن جەرگىلىكتى كلۋبتاردىڭ بىرىندە جاتتىققان جىبەك وسى كوماندانىڭ سپورتشىلارىنا ريزاشىلىعىن ءبىلدىردى. سونىمەن قاتار ول جاتتىقتىرۋشى نۇرسۇلتان ورىنباساروۆتىڭ ەرەكشە ەڭبەگىن اتاپ ءوتتى.
«نۇرسۇلتان اعا مەنى دجيۋ-دجيتسۋعا عاشىق ەتىپ، الەم چەمپيونى ەتتى. وعان وتە ريزامىن. سونداي-اق مەنى قولداعان بارشا جۇرتقا العىس ايتامىن»، - دەدى چەمپيون قىز.
بىرەر كۇن بۇرىن ابۋ-دابيدە Ju-Jitsu World Championship Abu Dhabi 2022 چەمپيوناتى ءوتىپ، وندا جىبەك قۇلىمبەتوۆا بەس دۇركىن الەم چەمپيونى اتاندى. جارىس «نە-ۆازا» ءتارتىبى بويىنشا ءوتتى.
جىبەك قۇلىمبەتوۆا – الماتى وبلىسىنان ساعادات نۇرماعامبەتوۆ اتىنداعى «ساعادات باتىر – QTT» سپورت كلۋبىنىڭ تاربيەلەنۋشىسى. سونداي-اق گرەپپلينگتەن الەم چەمپيونى، سامبودان الەم چەمپيوناتىنىڭ قولا جۇلدەگەرى، كوپتەگەن حالىقارالىق جانە رەسپۋبليكالىق جارىستاردىڭ جەڭىمپازى، جۇلدەگەرى. قازان ايىنىڭ باسىندا ول ابۋ-دابيدە وتكەن ەڭ ءىرى AJP Tour Asia Continental PRO - GI تۋرنيرىندە جەڭىسكە جەتتى.
چەمپيوناتتا س.نۇرماعامبەتوۆ اتىنداعى كلۋبتىڭ باسقا سپورتشىلارى دا ونەر كورسەتىپ، 25 التىن، 15 كۇمىس جانە 5 قولا مەدال جەڭىپ العان.