جەتىسۋلىق كاسىپكەرلەر اۋىلدى كوركەيتۋگە ۇلەس قوسىپ جاتىر

مەدسەناتتار مەدپۋنكت پەن سپورتى مەكتەبىن سالىپ بەردى

جەتىسۋ وبلىسىندا كاسىپكەرلەر جەرگىلىكتى جەرلەردىڭ الەۋمەتتىك ماسەلەلەرىن شەشۋگە بەلسەنە قاتىسۋدا. ماسەلەن، لەسنوۆكا اۋىلىندا كۇرەس تۇرلەرىنە ارنالعان سپورت مەكتەبى پايدالانۋعا بەرىلدى. ال اقسۋ اۋدانىنىڭ تاراس اۋىلىندا دەمەۋشىلىك قارجىعا مەديسينالىق پۋنكت سالىندى، دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ. 

تاراس اۋىلىندا 1973 جىلى تۇرعىزىلعان عيماراتتىڭ ورنىنا جاڭا مەديسينالىق پۋنكت اشىلدى. ونى جەرگىلىكتى «ءقىدىرالى» شارۋا قوجالىعىنىڭ جەتەكشىسى تولەگەن ماقاشيەۆ سالىپ بەردى. مۇندا فەلدشەر كابينەتى، ەكپە بولمەسى بار. كابينەتتەردە قاجەتتى قۇرال-جابدىقتار تۇگەل. ەندى تاراس اۋىلىنىڭ 400 تۇرعىنى وسى جاڭا مەدپۋنكتتە مەديسينالىق كومەك الاتىن بولادى. 

«بۇگىن اۋىل تۇرعىندارىمەن قاتار مەديسينالىق قىزمەتكەرلەر دە قۋانىپ وتىرمىز. ەندى مۇندا دەنساۋلىعىنا شاعىمدانعان جاندارعا كۇندەلىكتى كومەك كورسەتەمىز. قانداي شۇعىل جاعدايدا دا كۇندىز-تۇنى قىزمەت ەتۋگە دايىنبىز»، - دەدى مەديسينالىق پۋنكتتىڭ مەدبيكەسى اقمارال نۇرالينوۆا. 

وسى ماڭىزدى جاڭالىقپەن تاراستىقتاردى اۋدان اكىمى ەسىم بازارحانوۆ قۇتتىقتادى. ال پانفيلوۆ اۋدانى لەسنوۆكا اۋىلىنىڭ بالالارىنا ارناپ كاسىپكەر ايدىن سۇلتانوۆ ءوز قاراجاتىنا جاڭا سپورت كەشەنىن تۇرعىزدى. «تالدى» سپورت مەكتەبىنىڭ اۋماعى 354 شارشى مەتر. مۇندا ءبىر مەزگىلدە 50 بالا كۇرەس تۇرلەرىمەن اينالىسا الادى. 

سىرتىندا جاتتىعۋ الاڭدارى جاسالعان، ءىشى تولىقتاي قاجەتتى قۇرالدارمەن جابدىقتالعان. ءقازىر ەكى جاتتىقتىرۋشى شاكىرتتەرىن ءتۇرلى جارىستارعا دايىنداپ جاتىر. بۇعان دەيىن بالالاردىڭ كۇرەسپەن اينالىسۋىنا ارنايى جاعداي جاسالماعان ەدى. 

«ءبىز بۇرىن ەسكى مەشىتتە جاتتىعاتىنبىز. سوعان قاراماستان اۋداندا، وبلىستا چەمپيون بولدىم. ەندى بۇدان دا زور جەتىستىككە جەتەمىن. مىناداي سپورت زال سالىپ بەرگەن اعالارعا راحمەت»، - دەيدى جاس سپورتشى ءالي قالياقىن. 

اۋدان اكىمى مارات ساعىمبەكتىڭ ايتۋىنشا، بۇل - اۋداندا اشىلىپ وتىرعان ءتورتىنشى سپورت كەشەنى. بارلىعىن اۋىلدىڭ قالتالى ازاماتتارى وزدەرى سالىپ بەرۋگە نيەت بىلدىرگەن. 

«بالالار جىلى» اياسىندا اتقارىلعان وسىنداي كەرەمەت تارتۋعا اۋىل حالقى ءدان ريزا. بۇدان بولەك وڭىردە مەملەكەتتىك باعدارلامامەن پەنجىم اۋىلىندا 100 ورىندى جانە ۇلكەنشىعان اۋىلىندا 90 ورىندى سپورت كەشەندەرى سالىنۋدا.