جەتىسۋ وبلىسى قاپال اۋىلىنىڭ تۇرعىنى نۇرجانات ەرداۋلەت قىزى ەرەكشە ءونىم شىعارىپ وتىر. ول ءسۇت ونىمدەرى مەن بالدان سابىن ازىرلەۋدى قولعا العان. كاسىپكەر ءوزى تاۋارىن «جاسىل ءونىم» دەپ اتايدى. سەبەبى ونداعى قوسپالار تازا، تابيعي، - دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
اتاجۇرتقا قىتايدان 2019 جىلى كوشىپ كەلگەن نۇرجانات ەرداۋلەت قىزى كەزىندە كاسىبىن الابوتا شوبىنەن قارا سابىن قايناتىپ باستاعانىن ايتادى. كەيىن سۇرانىسقا قاراي شىعاراتىن ءونىم ءتۇرىن كوبەيتكەن. سونىڭ ىشىندە ءسۇت سابىنى، ايران سابىنى، ساۋمال سابىنى، قيار جانە بال سابىندارى سياقتى تۇرلەرىن دايىندايتىن بولدى. نەگىزى بۇل كاسىپپەن اينالىسۋدى قىتايدا جۇرگەندە باستاعان. كەيىن ەلگەن كەلگەن سوڭ ءىسىن قايتا جانداندىردى. وعان وتاعاسىنىڭ اتتان قۇلاپ، مەرتىگىپ، جۇمىسقا شىعا الماي قالعانى تۇرتكى بولىپتى. ياعني وسى كاسىپتى جۇرگىزىپ، تابىس تابۋعا بەل بايلاعان.
- سابىندى دايىنداۋعا ءوزىمىزدىڭ ساۋمال، ءسۇت، قاتىعىمىز، كوكونىسىمىز، تەكەلىنىڭ بالى قولدانىلادى. ال قاجەتتى كوكوس مايىن قىتايدان العىزامىن. كاسىپتى كەڭەيتۋگە مەملەكەت تاراپىنان بەرىلەتىن گرانتقا تالپىنىپ كورۋگە نيەتتىمىن. ءقازىر وتباسىم بارىنشا قولداۋ كورسەتىپ وتىر. ەكى بالام مەن كەلىنىم ءونىمدى قوراپقا سالىپ قاپتاۋعا، الەۋمەتتىك جەلىلەر ارقىلى تاۋار وتكىزۋ ءىسىن ىلگەرىلەتۋگە جاردەمىن تيگىزەدى، - دەيدى ن.ەرداۋلەت قىزى.
ونىڭ ايتۋىنشا، كىشكەنە بالالار ءۇشىن سابىن جۇرەك، گۇل، مىسىق جانە باسقا دا قىزىقتى ءارى تارتىمدى فورمالاردا قۇيىلىپ دايىندالادى. مۇنداي سابىنمەن نارەستەلەردى شومىلدىرسا، ەشقانداي اللەرگيا بولمايدى. ەرەسەكتەر قولدانسا، بەتتىڭ تەرىسىن جۇمسارتادى، جاڭا تۇسكەن اجىمدەردى، مايلى بەتتىڭ بورىتكەندەرىن، قارا داقتاردى كەتىرۋگە كومەكتەسەدى. ياعني كىشىگىرىم كوسمەتيكالىق ءونىم دەۋگە بولادى. باعاسى سابىننىڭ كولەمى مەن قۇرامىنا قاراي 500 تەڭگەدەن باستالادى. دەگەنمەن كاسىپكەر بەتتەگى داقتاردى مەديسينالىق جاعىنان تەكسەرتۋدى ۇمىتپاۋ كەرەك دەيدى. سەبەبى ول ادامنىڭ ىشكى اعزالارىنىڭ سىرقاتى سالدارىنان با، الدە سىرتقى اسەرلەردەن بە، الدىمەن سونى انىقتاپ العان ءجون.