وڭىردە جۇمىسپەن قامتۋدىڭ بەلسەندى شارالارىنا جۇمىسسىز جۇرگەندەر مەن ءوزىن-وزى جۇمىسپەن قامتىعاندار تارتىلعان.
اعىمداعى جىلدىڭ التى ايىندا الماتى وبلىسىنداعى جۇمىسسىز جۇرگەن 30 مىڭ ادام جۇمىسپەن قامتىلعان، دەپ حابارلايدى Almaty-akshamy.kz.
«وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ مالىمەتىنە قاراعاندا، «جۇمىسپەن قامتۋ جول كارتاسى» باعدارلاماسىن جۇزەگە اسىرۋعا بيىلعى جىلى وبلىسقا 31،8 ملرد. تەڭگە بولىنگەن. بيىلعى جىلدىڭ ءبىرىنشى جارتىسىندا حالىقتى جۇمىسپەن قامتۋدىڭ بەلسەندى شارالارىمەن وڭىردە 30 مىڭ ادام قامتىلعان. سونىڭ ىشىندە «جۇمىسپەن قامتۋ جول كارتاسى» باعدارلاماسى ارقىلى 3،3 مىڭ ادام جۇمىسقا ورنالاسقان»، – دەلىنگەن الماتى وبلىسىنىڭ اكىمدىگى باسپا ءسوز قىزمەتىنىڭ حابارلاماسىندا.
رەسمي دەرەك بويىنشا، بيىلعى جىلى «جۇمىسپەن قامتۋدىڭ جول كارتاسى»، «بيزنەستىڭ جول كارتاسى»، «ەڭبەك» باعدارلامالارى مەن «جەتىسۋ» وڭىرلىك باعدارلاماسى شەڭبەرىندە قارجى كولەمى 23 ملرد تەڭگەگە دەيىن ۇلعايتىلعان.
ءبىرىنشى جارتىجىلدىقتا 7،5 ملرد تەڭگەگە 990 جوبا قارجىلاندىرىلىپ، 2 750 تۇراقتى جۇمىس ورنى قۇرىلعان. بيىلعى جىلى جالپى ىشكى ونىمدەگى شاعىن جانە ورتا بيزنەستىڭ ۇلەسى 34،3% جەتەدى.