جالپى وبلىس بويىنشا اكىم بولۋعا 279 ادام نيەتتى.
الماتى وبلىسىندا اۋىلدىق وكرۋگ اكىمدەرىنىڭ سايلاۋىنا ساياسي پارتيالاردان جانە ءوزىن-وزى ۇسىنۋ ارقىلى 279 ۇمىتكەر ۇسىنىلعان. ورتاشا باسەكەلەستىك دەڭگەيى 3،9 ادامنان كەلەدى، دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
ۇسىنىلعان 279 ۇمىتكەردىڭ 249-ى - ەر، 30-ى - ايەل ازاماتشالار.ۇمىتكەرلەردىڭ ورتاشا جاسى - 41،3 جاس.
وبلىستىق اۋماقتىق سايلاۋ كوميسسياسىنىڭ مۇشەسى قاھارمان جاقسىلىقتىڭ سوزىنە سۇيەنسەك، جالپى، الماتى وبلىسىندا 71 اۋىلدىق وكرۋگتە اكىمدەر سايلاۋى وتەدى. بۇل رەتتە 60 اكىم وكىلەتتىك مەرزىمىنىڭ اياقتالۋىنا بايلانىستى، 11ء-ى وكىلەتتىكتەرىن مەرزىمىنەن بۇرىن توقتاتۋعا بايلانىستى سايلانادى. ءوز كانديداتتارىن ۇسىنعان ساياسي پارتيالار قاتارىندا Nur Otan پارتياسى، «اۋىل» حدپپ، «اق جول» قدپ، «اDAL» سپ، قحپ، جسدپ بار.
«ۇسىنىلعاندار اراسىندا 154 ۇمىتكەر - جۇمىس ىستەپ جۇرگەن مەملەكەتتىك قىزمەتشىلەر، 32ء-سى - كوممەرسيالىق قۇرىلىمداردىڭ وكىلدەرى، 70ء-ى - بيۋدجەتتىك ۇيىمداردىڭ قىزمەتكەرلەرى، 10-ى ۋاقىتشا جۇمىس ىستەمەيدى، 3-ەۋى - قوعامدىق بىرلەستىكتەردىڭ وكىلدەرى، 6-ۋى - ءوزىن-وزى جۇمىسپەن قامتىعاندار، 3-ەۋى - ىشكى ىستەر جانە اسكەري سالالاردىڭ زەينەتكەرلەرى. اراسىندا عىلىمي دارەجەسى بار كانديدات تا بار»، - دەدى قاھارمان جاقسىلىق.
بيىلعى جىلعى 10 شىلدەدەگى دەرەك بويىنشا، 159 ۇمىتكەر تىركەلگەن (56،6%).ءتۇرلى سەبەپتەر بويىنشا 23 ۇمىتكەر الىنىپ تاستالدى، ونىڭ 16-سى تالاپتارعا سايكەس كەلمەيدى، 7-ەۋى ءوز كانديداتۋراسىن الىپ تاستاۋ تۋرالى وتىنىشتەرىنە سايكەس شىعارىلدى.