جەتىسۋ وبلىسىندا ادام ولىمىمەن اياقتالعان جول اپاتى الەۋمەتتىك جەلىگە تاراعان ۆيدەوعا ءتۇسىپ قالدى، دەپ حابارلايدى Aqshamnews.kz ءتىلشىسى. قايعىلى وقيعا 31 قاڭتاردا ەسكەلدى اۋدانىنداعى قارابۇلاق اۋىلىندا (مەلكومبينات اۋماعى) بولعان.
كادرلاردان ءبىر اۆتوكولىكتىڭ باسىپ وزۋ كەزىندە وزگە كولىككە سوعىلىپ، سوققى سالدارىنان قارسى باعىتقا شىعىپ كەتىپ، تاعى ەكى كولىكپەن سوقتىعىسقانى كورىنەدى. وقيعا سالدارىنان بەس ادام اۋداندىق اۋرۋحاناعا جەتكىزىلىپ، مەديسينالىق كومەك كورسەتىلگەن. كەيىن العان جاراقاتتارىنان Nissan كولىگىنىڭ جۇرگىزۋشىسى كوز جۇمعانى بەلگىلى بولدى.
جەتىسۋ وبلىسى پوليسيا دەپارتامەنتىنىڭ مالىمەتىنشە، تالدىقورعان – تەكەلى تاسجولىندا ءتورت اۆتوكولىك قاتىسقان جول-كولىك وقيعاسى بويىنشا سوتقا دەيىنگى تەرگەۋ باستالعان. Mercedes جۇرگىزۋشىسى قاماۋعا الىندى.
پوليسيا جۇرگىزۋشىلەردى جول ەرەجەسىن قاتاڭ ساقتاۋعا، جىلدامدىقتى اسىرماۋعا، اراقاشىقتىقتى ۇستانىپ، جولدا بارىنشا مۇقيات بولۋعا شاقىردى.