ونىڭ قولىنان شىققان بىرەگەي بۇيىمدارى وزگە ەلدەردە دە جوعارى باعاعا يە.
الماتى وبلىسىنىڭ تۇرعىنى 34 جاسار ەرتاي ومىرتايەۆ ەجەلگى ۇلتتىق ونەردى دامىتۋدا، دەپ حابارلايدى Almaty-akshamy.kz.
«ۇلتتىق مۋزىكالىق اسپاپتار، تۇرمىستىق زاتتار مەن اعاشتان جاسالعان بىرەگەي بۇيىمدار جاساۋ – دارىندى شەبەردىڭ تالانتىنىڭ ءبىر قىرى عانا. بۇگىندە جاستاردى ۇلتتىق ونەرگە ۇيرەتىپ جاتىر. ونىڭ قولىنان شىققان ساندىك اشەكەيلەر مەن قولدانبالى ونەردىڭ بىرەگەي بۇيىمدارى تەك قازاقستاندا عانا ەمەس، جاقىن شەتەل مەملەكەتتەرىندە دە جوعارى باعاعا يە»،– دەلىنگەن الماتى وبلىسى اكىمدىگىنىڭ باسپا ءسوز قىزمەتىنىڭ حابارلاماسىندا.
بۇگىندە جاس قولونەرشى نەگىزگى تۇرمىستىق زاتتاردى دا، ءتۇپنۇسقا مۇسىنشەلەر مەن پاننو-كارتينالاردى دا جاسايدى. مۇندا سۋرەتشىنىڭ شەبەرلىگىنىڭ كومەگى زور. ەرتاي قولونەرمەن قاتار كەسكىندەمەنى دە ۇمىتپاۋعا تىرىسادى. ال ۇرپاقتار مەن داستۇرلەر ساباقتاستىعىن بەينەلەيتىن «جەتى اتا شەجىرە» اعاش كارتينالارى ەرتايدىڭ وزىندىك برەندىنە اينالعان.
«اتا-بابامىز ۇرپاقتان-ۇرپاققا ەجەلگى ونەردى ۇيرەتىپ وتىرعان. سونىڭ ارقاسىندا ءبىز وسى قاسيەتتى ونەردى يگەرىپ كەلەمىز. بۇعان ۇلتتىق مۋزىكالىق اسپاپتاردى تۇتاس اعاشتان ويىپ جاساۋ جاتادى. مەنىڭ اتا-بابالارىمنىڭ اراسىندا قولونەرشىلەر دە بولدى. سوندىقتان مەن ءوز شەبەرحانامدى «بابا جولى» دەپ اتادىم. سودان كەيىن عانا اعاشتان پاننو-كارتينالارىن جاساۋ يدەياسى كەلدى»، – دەيدى شەبەر.
ەرتاي ومىرتايەۆتىڭ شىعارماشىلىعىندا دومبىرا ەرەكشە ورىن الادى. ونىڭ شەبەرحاناسىندا جىلىنا 50-دەن 80 داناعا دەيىن مۋزىكالىق اسپاپتار جاسالادى. بۇل دومبىرا، قوبىز، جەتىگەن، سازگەن، داۋىلپاز جانە ت.ب. تۇركى حالىقتارىنىڭ ءتۇرلى مۋزىكالىق اسپاپتارىنىڭ 45 ءتۇرى بار. ونىڭ ونىمدەرىن قازاقستاندا دا، رەسەيدە دە، قىرعىزستاندا دا، وزبەكستاندا دا كەزدەستىرۋگە بولادى. ەرتاي ومىرتايەۆتىڭ جەتىستىكتەرى - قازاقستاندىق «شەبەر-2017» قولونەرشىلەر بايقاۋىنان «جاڭاشىلدىعى ءۇشىن» ديپلومى، دارىندى جاستار اراسىنداعى «كوشباسشى-2016» وبلىستىق بايقاۋىنا ءمۇسىن جاساعانى ءۇشىن ءى ورىن. وتكەن جىلى ول الەمنىڭ جاس سۋرەتشىلەر وداعىنىڭ مۇشەسى بولدى. ەرتاي ومىرتايەۆ اباي قۇنانبايەۆتىڭ 175 جىلدىعىنا وراي جازعان ابايدىڭ پورترەتى الەمنىڭ جاس سۋرەتشىلەر وداعى شىعارعان كىتاپتىڭ مۇقاباسىندا بەينەلەنگەن.