جابىق باسسەيننىڭ جالپى كولەمى 3644،20 شارشى مەتردى قۇرايدى.
ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ستۋدەنتتەرى ەندى ءوز باسسەيندەرىندە ءجۇزىپ ۇيرەنەتىن بولادى. جاڭا گيدروتەحنولوگيالىق نىسان ۋنيۆەرسيتەت قارجىسىنا سالىندى، دەپ حابارلايدى Almaty-akshamy.kz.
«جاقىندا تالدىقورعان قالاسىندا وليمپيادالىق ۇلگىدەگى جابىق باسسەين اشىلعان ەدى. جاتتىعۋعا 3 مىڭنان اسا بالا جازىلىپ، مىڭنان استامى ءجۇزۋ ۇيىرمەسىندە دايىندالۋدا. جاتتىقتىرۋشىلار قۇرامىن كەڭەيتۋ جاعى قاراستىرىلۋدا. ەلباسى تاپسىرماسى اياسىندا ايماقتا 13 دەنە شىنىقتىرۋ-ساۋىقتىرۋ كەشەنى قولدانۋعا بەرىلدى. تاعى تورتەۋىنىڭ جانە 150 ۆوركاۋت-نىساننىڭ قۇرىلىسى جۇرگىزىلۋدە. بۇگىن، مىنە، ستۋدەنتتەرگە ارنالعان ءجۇزۋ باسسەينى پايدالانۋعا بەرىلدى. باسسەين بۇقارالىق سپورتتى دامىتۋ جانە سالاۋاتتى ءومىر سالتىن ناسيحاتتاۋ ماقساتىندا سالىندى»، - دەپ اتاپ ءوتتى الماتى وبلىسى اكىمىنىڭ ورىنباسارى باتىرجان بايجۇمانوۆ.
ول ۋنيۆەرسيتەت باسشىلىعىنا وقۋ ساپاسىنىڭ جوعارىلىعى، وقۋ عيماراتىنىڭ ماتەريالدىق-تەحنيكالىق بازاسىنىڭ جاڭارتۋ باعىتىنداعى جۇمىستارى ءۇشىن العىسىن ءبىلدىردى.
باتىرجان بايجۇمانوۆ، سونداي-اق، بۇگىندە ۋنيۆەرسيتەت قابىرعاسىندا 6 مىڭنان استام ستۋدەنت ءبىلىم الىپ جاتقانىن جەتكىزدى. ونىڭ 450ء-ى - وبلىس اكىمى گرانتىنىڭ يەگەرى.
ءوز كەزەگىندە ۋنيۆەرسيتەت رەكتورى قۋات بايمىرزايەۆ وبلىس اكىمىنىڭ قولداۋىنىڭ ارقاسىندا سالىنعان ستۋدەنتتەرگە ارنالعان زاماناۋي جاتاقحانانىڭ ارقاسىندا جەتىسۋ ۋنيۆەرسيتەتى رەسپۋبليكا بويىنشا ستۋدەنتتەردى الەۋمەتتىك قامتۋ بويىنشا ءبىرىنشى ورىن يەلەنگەنىن ايتتى. سونداي-اق ول وبلىس اكىمىنە ۋنيۆەرسيتەتكە كورسەتىلىپ جاتقان كومەك ءۇشىن العىسىن ءبىلدىردى.
ستۋدەنتتەر اتىنان ءسوز العان دەنە شىنىقتىرۋ جانە سپورت فاكۋلتەتىنىڭ 4-كۋرس ستۋدەنتى، كوركەم گيمناستيكادان سپورت شەبەرى ديانا بەيسەنوۆا ريزاشىلىعىن جەتكىزىپ، باسسەيننىڭ اشىلۋى ستۋدەنتتەردىڭ سپورتقا دەن قويۋىنا سەرپىن بەرەتىنىن جەتكىزدى.
«جابىق باسسەيننىڭ جالپى كولەمى 3644،20 شارشى مەتردى قۇرايدى. نىسان قۇرىلىس تالاپتارىنا جانە سانيتارلىق-ەپيدەميولوگيالىق ستاندارتتارعا ساي سالىنعان. بايسسەينگە كىرەتىن جەكە كىرە بەرىس، كيىم اۋىستىراتىن ورىن، ساۋنا، ۆاننا، جاتتىقتىرۋشى مەن جۇمىسشىلارعا ارنالعان بولمە، سپورت ينۆەنتارىن تازالاپ، ساقتاۋعا ارنالعان ارنايى بولمە، دەزينفەكسيالىق زاتتار بارلىعىمەن قامتىلعان. اكىمشىلىك جانە مەديسينالىق كابينەتتەر دە بار. ودان بولەك سۋدى تەستىلەۋدەن وتكىزۋگە ارنالعان زەرتحانامەن قامتىلعان»، – دەلىنگەن الماتى وبلىسى اكىمدىگىنىڭ باسپا ءسوز قىزمەتىنىڭ حابارلاماسىندا.
نىسان قۇرىلىسى بىلتىر باستالعان. اشىلعان بويدا ۋنيۆەرسيتەت قىزمەتكەرلەرى مەن ستۋدەنتتەرى ارنايى بەكىتىلگەن كەستە بويىنشا باسسەينگە كەلىپ، جاتتىعا الادى.