جاڭعىرعان قولونەر جوعالمايدى
الماتى وبلىسىنىڭ تۇرعىندارى ۇلتتىق داستۇرلەردى جاڭعىرتىپ كەلەدى. ەڭبەكشىقازاق اۋدانى راحات اۋىلىنىڭ تۇرعىنى جاس شەبەر ابزال اكىمبەك قولونەرگە وزگەلەردى دە ۇيرەتىپ، ۇلتتىق مۋزىكالىق اسپاپتاردىڭ 50-دەن استام ءتۇرىن دايىندايدى. ونىڭ قولدان جاساعان دومبىرا، قوبىزدارى سۇرانىسقا يە. ول بابالار مۇراسىن ساقتاي وتىرىپ، تابىسىن دا مولايتا ءبىلدى. مەملەكەتتىك قولداۋدىڭ ناتيجەسىندە شەبەرحاناسىن كەڭەيتىپ، قاجەتتى قۇرال-جابدىقتارىن جيناقتاپ الدى، دەپ حابارلايدى Almaty-akshamy.kz الماتى وبلىسى اكىمى باسپا ءسوز قىزمەتىنىڭ حابارىنا سىلتەمە جاساپ.
ابزال 23 جاستا، ول جاستىعىنا قاراماستان، كۇندەلىكتى تىنىمسىز ەڭبەك ەتىپ، شەبەرحانا جۇمىسىن جۇرگىزىپ وتىر.
«ۇلتتىق مۋزىكالىق اسپاپتارعا، ولاردىڭ تاريحىن بىلۋگە، جاسالۋىن مەڭگەرۋگە دەگەن قىزىعۋشىلىعىم بالا كۇنىمنەن وياندى. شامامەن 7 سىنىپتا وسى بالالىق قىزىعۋشىلىعىم دومبىرا جاساپ ۇيرەنۋىمە سەبەپ بولدى. مەن مەكتەپتى بىتىرگەنشە بوس ۋاقىتىمنىڭ ءبارىن شەبەرحانادا وتكىزەتىنمىن. كەيىن كوللەدجدە وقىپ، ونى بىتىرگەننەن كەيىن شەبەرحانادا 1 جىلداي جۇمىس ىستەپ، تاجىريبە جينادىم. مۇنان سوڭ جەكە ءىسىمدى اشۋعا بەل بۋدىم. 1 جىل ءوز بەتىممەن جۇمىس ىستەگەننەن كەيىن جەكە بيزنەستى جۇرگىزىپ، دامىتۋ كەرەكتىگىن ءتۇسىندىم. ءسويتىپ، مەملەكەتتىڭ قولداۋىن الۋ ءۇشىن كاسىپكەرلەر پالاتاسىنىڭ وڭىرلىك فيليالىنا كومەككە جۇگىندىم. كوپ وتپەي «جاس كاسىپكەر» باعدارلاماسى بويىنشا 2،5 ملن تەڭگە سوماسىندا گرانت ۇتىپ الدىم. وعان زاماناۋي ستانوكتار، باسقا دا قاجەتتى قۇرال-جابدىقتار ساتىپ الدىم. بۇل مەنىڭ باستاماما ۇلكەن قولداۋ بولدى. سودان بەرى ەرىنبەي ەڭبەكتەنىپ، ۇلتتىق قولونەردى جالعاستىرۋ ءۇشىن جاس بالالاردى اسپاپتار جاساۋعا ۇيرەتىپ كەلەمىن. الداعى ۋاقىتتا وتاندىق جانە حالىقارالىق كورمەلەرگە قاتىسسام دەيمىن»،- دەپ وي ءبولىستى جاس شەبەر ابزال اكىمبەك.
بۇگىندە ابزالدىڭ شەبەرحاناسىندا ۇلتتىق مۋزىكالىق اسپاپتاردىڭ 50-دەن استام ءتۇرى جاسالادى. ولاردىڭ قاتارىندا دومبىرا، پريما دومبىرا، قوبىز، جەتىگەن، داۋىلپاز، سىبىزعى جانە باسقالارى بار. شەبەرحانادا ابزالدان باسقا تاعى 3 جەرگىلىكتى تۇرعىن جۇمىس ىستەيدى. مۋزىكالىق اسپاپتاردى ونەر مەكتەپتەرى، كاسىبي جانە اۋەسقوي مۋزىكانتتار ساتىپ الادى، سول سياقتى ۇلتتىق ستيلدەگى سىيلىق رەتىندە دە ءوتىمدى.
ال قاپشاعاي قالاسىندا تۇراتىن كوپ بالالى انا جانات مەدەت قىزى قۇراق كورپەلەر تىگۋدىڭ كونە تەحنولوگياسىن قايتا جاڭعىرتىپ وتىر. بۇل ىستە 15 جىلدىق تاجىريبەسى بار شەبەر قاپشاعايلىق جاس قىز-كەلىنشەكتەردى وسى ونەرگە باۋلۋدا. ال ورىنداعان تاپسىرىستارى قازاقستاننىڭ تۇكپىر-تۇكپىرىنە جونەلتىلەدى.
«ءبىزدىڭ بۇيىمدارىمىزدى قاپشاعايلىقتار عانا ەمەس، اتىراۋ، اقتاۋ، ۋفا قالالارىنىڭ تۇرعىندارى دا ساتىپ الادى، ءتىپتى تۇركيا، جاقىندا چەحيا ەلدەرىنە دە جىبەرىلدى. ءبىز ءۇشىن ساپا - ءبىرىنشى ورىنداعى ماڭىزدى ماسەلە. حالقىمىزدىڭ داستۇرلەرىن ساقتاۋعا ءوز ۇلەسىمىزدى قوسىپ، باي مادەني مۇرامىزدى الەمگە تانىتقىمىز كەلەدى. بۇل رەتتە ينتەرنەتتىڭ مۇمكىندىكتەرىن بەلسەندى پايدالانامىز. ينستاگرامداعى kyz_zhasau.kz پاراقشامىزدا 50 مىڭ جازىلۋشى بار. بۇگىنگى كۇنى بۇل تابىستى ءىستىڭ كورسەتكىشى بولا الادى. بۇل ءىستى جالعىز تىگىن ماشيناسىمەن توسەك جابدىقتارىن تىگۋدەن باستاعان ەدىم. ءقازىر ىرگەسى كەڭەيىپ، بيزنەستىڭ اۋقىمى ۇلكەيىپ كەلەدى. نەگىزگى ماماندىعىم - ۆەتەرينار، ءبىراق ۋاقىتىمنىڭ كوپ بولىگىن الماتىدا قۇرىلىستا جۇمىس ىستەۋمەن وتكىزدىم. جولداسىم قايتىس بولعاننان كەيىن بالالارىمدى قيىندىقسىز اسىراپ، ءارى تۇراقتى قاستارىندا بولۋ ءۇشىن قاپشاعاي قالاسىنان ءوز ءىسىمدى اشسام دەپ شەشتىم. قالالىق اكىمدىك عيمارات جاعىنان كومەكتەستى، ءسويتىپ، Nur Otan پارتياسىنىڭ قالالىق فيليالىنىڭ قولداۋىمەن «عيبرات» قوعامدىق بىرلەستىگىن قۇردىم. مۇنداعى ماقساتىم - ءوزىم سەكىلدى كوپ بالالى انالارعا كومەك كورسەتۋ. ءبىزدىڭ كىشكەنتاي سەحىمىز بىرتە-بىرتە اياعىنان تۇرىپ كەلەدى. العاشىندا 50 ادام جۇمىس ىستەگەن، بارلىق قاجەتتى تەحنيكالاردى ساتىپ العاننان كەيىن 20 ادام جۇمىسقا ورنالاستى. ءقازىر سەحتى كەڭەيتىپ جاتىرمىز. تريكوتاجدان كيىمدەر تىكسەك دەيمىز. 100 ادامعا دەيىن جۇمىسقا تارتساق دەگەن جوسپارىمىز بار»،- دەدى سەح يەسى.
جانات مەدەت قىزىنىڭ ايتۋىنشا، سەح شەبەرلەرى كۇنىنە 40-50 قالىڭدىقتىڭ جاساۋىن تىگە الادى. جاستىقتار، كورپەلەر، جاپقىشتار ءوزىنىڭ ءتۇرلى ويۋ-ورنەكتەرىمەن كوز تارتادى. جالپى، قۇراق قۇراۋ - كوركەمدىك تالعامدى تالاپ ەتەتىن شىعارماشىلىق جۇمىس. قۇراق تۇستەرىن تاڭداۋ، فورمالارىن تابۋ، ولاردى بىر-بىرىمەن ۇيلەستىرۋ - وڭاي ءىس ەمەس. دەگەنمەن شەبەرلەر جۇمىستىڭ كۇردەلىلىگىنە قاراماستان، سەحتا جالپى سانى 20-دان استام بۇيىم دايىندايدى.
«ءاربىر ويۋ-ورنەكتىڭ ءوز ماعىناسى، وزىنە ءتيىستى ورنى بار. نەگىزىنەن ءبىز كورپە، جاستىق، جاپقىشتاردى ۇلتتىق ويۋلارمەن ورنەكتەيمىز. ولاردىڭ باسىم بولىگى اتا-بابالارىمىزدان كەلە جاتقان ورنەكتەر، دەگەنمەن زاماناۋي ناقىشتاردى دا قولدانامىز. جاس جۇبايلارعا ارنالعان جيىنتىقتاردا اققۋ بەينەسىن، عاشىقتاردىڭ بەينەسىن، ەسىمدەرىن جازۋ سياقتى ارلەۋ تۇرلەرىنە جۇگىنەمىز»،- دەيدى شەبەر.
بۇگىنگى كۇنى جانات مەدەت قىزى تابىستى كاسىپكەر عانا ەمەس، 5 بالانىڭ اناسى. قاپشاعاي قالالىق اكىمدىگىنىڭ مالىمەتىنشە، ول قوعامدىق جۇمىستارمەن اينالىسىپ، قايىرىمدىق شارالارىنا بەلسەندى قاتىسىپ، مۇقتاج وتباسىلارىنا، جاعىزباستى ەگدە قاريالارعا ازىق-تۇلىك جانە باسقا دا قاجەتتىلىكتەر جەتكىزىپ كومەكتەسەدى. ءوز قولىمەن جاساعان بۇيىمدى سىيعا تارتاتىن كەزدەرى دە كوپ. كوپ بالالى انا ىندەت ۋشىعىپ تۇرعان كەزدە دە كومەك بەرۋدەن تىس قالعان جوق. ونىڭ سەحىندا 13 مىڭداي قورعانىس بەتپەردەلەرى تىگىلىپ، تەگىن تاراتىلدى.
قۇراق كورپە تىگۋ ونەرى تەكەلى قالاسىندا دا دامىپ كەلەدى. مۇندا بالالار شىعارماشىلىق ورتالىعىندا جەرگىلىكتى وقۋشىلار ۇلتتىق ويۋ-ورنەكتى كورپە-جاستىق تىگۋدى ۇيرەنىپ ءجۇر. قولونەردى جاڭعىرتۋمەن قۇراق كورپە تىگۋ شەبەرحاناسى ستۋدياسىنىڭ يەسى، تالدىقورعاندىق ايمان جولتاي اينالىسادى. جەتىسۋ وڭىرىندە مۇنداي مىسالدار وتە كوپ.