جەتىسۋ وبلىسىندا لاۋازىمدى تۇلعالارىنا ايىپپۇل سالىندى

جالپى سوماسى 8590500 تەڭگەدەن استام.

جەتىسۋ وبلىسىندا جولدى كۇتىپ ۇستاۋ جونىندەگى تالاپتاردى ورىنداماعان 249 لاۋازىمدى تۇلعا جاۋاپقا تارتىلدى، – دەپ حابارلايدى Almaty-akshamy.kz Polisia.kz-كە سىلتەمە جاساپ.

پوليسەيلەر وڭىردەگى جولداردىڭ جاعدايىن مۇقيات تەكسەرۋدى جالعاستىرىپ جاتىر. انىقتالعان كەمشىلىكتەر بويىنشا جىل باسىنان بەرى جول ۇيىمدارىنا 1360 ۇيعارىم جولداندى.

«جالپىعا ورتاق پايدالاناتىن جولدار تەكسەرۋدەن وتەدى. اۆتوموبيل جولدارىن كۇتىپ ۇستاۋ جونىندەگى تالاپتاردى ورىنداماعانى ءۇشىن 249 لاۋازىمدى تۇلعا جالپى سوماسى 8590500 تەڭگەدەن استام ايىپپۇل سانكسيالارىن سالا وتىرىپ، اكىمشىلىك جاۋاپكەرشىلىككە تارتىلدى. سونىمەن قاتار كوشە-جول جەلىسىندەگى كەمشىلىكتەر ءۇشىن ءبىرقاتار اۋدانداردىڭ تۇرعىن ۇي-كوممۋنالدىق شارۋاشىلىق باسشىلارى جازالاندى»،– دەدى جەتىسۋ وبلىسى پد اكىمشىلىك پوليسيا باسقارماسىنىڭ باستىعى دياس ايناقۇلوۆ.

جىل باسىنان بەرى وڭىردە 2081 جول بەلگىسى، 24 باعدارشام نىسانى، 24 بيلبورد، 92 ونەركاسىپتىك وندىرىستەگى جاساندى تەگىس ەمەستىكتەر ورناتىلدى. سونداي-اق 6،9 كم كوشە جارىعى جانە 45،4 كم تروتۋار جولى جابدىقتالعان.

«ازاماتتاردىڭ قاۋىپسىزدىگىن قامتاماسىز ەتۋ، جول كولىك وقيعالارىن الدىن الۋ ماسەلەلەرى پوليسيانىڭ تۇراقتى باقىلاۋىندا. ايتالىق، ءبىرقاتار اۋدانداردا ءاپاتتى-قاۋىپتى ۋچاسكەلەرگە 18 مۋلياج بەينەكامەرا مەن 36 جول بەلگىسىن ورناتۋ تۋرالى شەشىم قابىلداندى. بۇل جۇرگىزۋشىلەردى ءتارتىپتى بولۋعا جانە جول قاۋىپسىزدىگىن قامتاماسىز ەتۋگە شاقىرۋ ءۇشىن جاسالادى»،– دەپ اتاپ ءوتتى ءوڭىردىڭ اكىمشىلىك پوليسيا باسقارماسىندا.