شاھاردىڭ نەگىزگى ونەركاسىپ پەن ساۋدا ورتالىعىنىڭ ءبىرى رەتىندەگى جەتىسۋ اۋدانىنىڭ مارتەبەسى نىعايىپ كەلەدى. 2025 جىلدىڭ العاشقى بەس ايىندا اۋدان بويىنشا ونەركاسىپ ءوندىرىسىنىڭ كولەمى 14،4%-عا ءوسىپ، 161،8 ملرد تەڭگەگە جەتكەن. بۇل كورسەتكىشكە اۋدانداعى 572 كاسىپورىننىڭ بەلسەندى قىزمەتىنىڭ ارقاسىندا قول جەتىپ وتىر. ونىڭ ىشىندە 52ء-سى – ءىرى جانە ورتا، 520-سى – شاعىن كاسىپورىن. وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسىندا اۋدان اكىمى ءلاززات جىلقىبايەۆا وسىلاي دەدى، دەپ حابارلايدى aqshamnews.kz
ونەركاسىپ سالاسىنداعى جوعارى ءوسىم اۋدان ەكونوميكاسىنىڭ تۇراقتىلىعىن قامتاماسىز ەتىپ قانا قويماي، بۇكىل قالانىڭ قارجىلىق ءال-اۋقاتىنا ەلەۋلى ۇلەس قوسىپ وتىر. وسى كەزەڭدە اۋدان ەكونوميكاسىنا قۇيىلعان ينۆەستيسيالار كولەمى شامامەن 65،3 ملرد تەڭگەگە جەتكەن. بۇل – ءبىرقاتار نەگىزگى سالالاردىڭ دامۋىنا سەرپىن بەرگەن نەگىزگى فاكتور بولدى. اتاپ ايتقاندا، قۇرىلىس سالاسى 20،1%-عا ءوسىپ، 11،6 ملرد تەڭگەنىڭ كولەمىن كورسەتتى. بۇل ءوز كەزەگىندە پايدالانۋعا بەرىلگەن تۇرعىن ءۇيدىڭ جالپى اۋدانىنىڭ 15،8%-عا ارتۋىنا ىقپال ەتتى. ەكونوميكالىق بەلسەندىلىكتىڭ سالىق تۇسىمىنە دە وڭ اسەرى ءتيدى: وندىرىستىك جانە ينۆەستيسيالىق كورسەتكىشتىڭ ارتۋىنىڭ ارقاسىندا الماتىنىڭ بيۋدجەتىنە تۇسكەن سالىق 11%-عا ءوسىپ، 149،7 ملرد تەڭگەگە جەتتى.
سونىمەن قاتار، اۋداندا جاڭا جۇمىس ورىندارى دا قۇرىلىپ جاتىر. بۇل سوڭعى جىلدارى ايتارلىقتاي ۇلعايعان جۇيەلى قولداۋ مەن قارجىلاندىرۋدىڭ ارقاسىندا مۇمكىن بولىپ وتىر. ينفراقۇرىلىمدى جاقسارتۋ مەن حالىقتىڭ ءومىر ءسۇرۋ ساپاسىن ارتتىرۋعا باعىتتالعان ورتالىقسىزداندىرۋ ساياساتى اياسىندا جەتىسۋ اۋدانىنىڭ بيۋدجەتى 2023 جىلدىڭ باسىنداعى 7،5 ملرد تەڭگەدەن 2025 جىلى 30 ملرد تەڭگەگە دەيىن ءتورت ەسەگە ءوستى. بۇل قاراجات ەڭ الدىمەن ينجەنەرلىك، الەۋمەتتىك جانە جول ينفراقۇرىلىمىن دامىتۋعا باعىتتالىپ وتىر. بۇل ءوز كەزەگىندە اۋداندى ءومىر ءسۇرۋ مەن ينۆەستيسيا تارتۋعا قولايلى ايماق ەتىپ وتىر.
ونەركاسىپ ءوسىمى، قۇرىلىسقا تارتىلعان ينۆەستيسيالار، سالىقتىق بازا مەن الەۋمەتتىك باعىتتاعى بيۋدجەت كولەمىنىڭ تەڭگەرىمدى ۇلعايۋى جەتىسۋ اۋدانىنىڭ تۇراقتى دامىپ كەلە جاتقانىن جانە تۇرعىنداردىڭ ءومىر ءسۇرۋ ساپاسىن ارتتىرۋ ءۇشىن بەرىك نەگىز قالانىپ جاتقانىن ايقىن كورسەتەدى.