الماتىداعى №7 قالالىق كلينيكالىق اۋرۋحانانىڭ نەيرورەابيليتاسيا بولىمىندە ينسۋلت پەن جاراقات العان 2 مىڭنان استام ادام دەنساۋلىعىن قالپىنا كەلتىردى، دەپ حابارلايدى اۋرۋحانانىڭ باسپا ءسوز قىزمەتى.
بولىمشە وڭتۇستىك استانانىڭ عانا ەمەس، ەلىمىزدىڭ تۇپكىر-تۇپكىرىنەن كەلگەن ناۋقاستاردى قابىلدايدى. سونىڭ ءبىرى – 58 جاستاعى بايان قوناقبايەۆا الماتى وبلىسىنىڭ قاراساي اۋدانىنان كەلگەن. ينسۋلتتەن كەيىن وڭ جاعى تولىق جانسىزدانىپ قالعان ول وزدىگىنەن تاماق ءىشىپ، ءجۇرىپ-تۇرا المايتىن. ءقازىر وسىندا ءمامس شەڭبەرىندە مەديسينالىق وڭالتۋدىڭ ءۇشىنشى كۋرسىنان ءوتىپ جاتىر.
«ءبىرىنشى كۋرستان كەيىن سال بولىپ قالعان قولىمدى قوزعالتىپ جاتتىعا باستادىم. مۇندا سال كەلگەن ەدىم، وڭالتۋدىڭ ەكىنشى كۋرسىنان سوڭ تاياققا سۇيەنبەي ءوزىم ءجۇرىپ كەتتىم. ەستە ساقتاۋ قابىلەتى ناشار بولاتىن. بەرىلگەن جاتتىعۋلاردى كينەزيوتەراپيا كابينەتىنەن شىققان بويدا ۇمىتىپ قالاتىندىقتان باستان-اياق تەلەفونعا ءتۇسىرىپ الىپ ءجۇردىم. ەندى مىنە، ءۇشىنشى كەزەڭ بىتۋگە جاقىن قالدى، ءقازىر ءۇشبۇرىش، شەڭبەر، شارشى، جۇلدىز سىندى پىشىندەردى سالۋدى ۇيرەندىم. جازۋدى قايتا ۇيرەنۋگە دەگەن قۇلشىنىس پايدا بولدى، دارىگەرلەرگە دەگەن العىسىمدى ءوز قولىممەن جازىپ وتىرمىن»، - دەيدى پاسيەنت.
ەمدەۋشى دارىگەر، نەيرورەابيليتاسيا بولىمشەسى مەڭگەرۋشىسى اينۇر دوسىبايەۆانىڭ ايتۋىنشا، ءۇشىنشى كۋرستان كەيىن ناۋقاستىڭ اياعى مەن قولداعى بۇلشىق ەتتەرىنىڭ كۇشى 4 بالعا دەيىن ارتقان (نورما بويىنشا 5،0 بالل).
جالپى، رەابيليتاسيا – ءمامس قاراجاتى ەسەبىنەن جۇرگىزىلەتىن قىمبات مەديسينالىق قىزمەتتەردىڭ ءبىرى. پاسيەنتتەر بولىمشەدە كۇن سايىن جەكە كينەزيوتەراپيا، پنف، بوبوت ادىستەرىمەن ەمدىك دەنە شىنىقتىرۋ، ماسساج، ماگنيتتى تەراپيا، بۇلشىق ەتتى ەلەكتر توگىمەن ستيمۋلياسيالاۋ، لوگو-پسيحيكالىق رەتتەۋ سىندى ەم تۇرلەرىن قابىلدايدى.
«ينسۋلت العان پاسيەنتتەر بىزگە تولىق تەكسەرىلىپ، ەم كۋرسىن بىتىرگەننەن كەيىن كەلەدى. ءبىزدىڭ اۋرۋحانادا ولارمەن ءتۇرلى سالالىق دارىگەرلەر، ادىستەمەشى-ينسترۋكتور، ەمدىك دەنە شىنىقتىرۋ ماماندارى، لوگوپەدتەر مەن پسيحولوگتاردان قۇرالعان مۋلتيديسيپلينارلىق كوماندا جۇمىس ىستەيدى. ءبىزدىڭ بۇگىنگى كەيىپكەرىمىزبەن اراي ەسەتاي دەيتىن ينسترۋكتورىمىز اينالىستى»، - دەيدى اينۇر دوسىبايەۆا.
ينسۋلت العاننان كەيىن ءبىر ساعات ىشىندە اۋرۋحاناعا جەتكىزىلگەن پاسيەنتتى ەمدەپ جازۋ مۇمكىندىگى جوعارى. سوندىقتان ءتىلدىڭ كۇرمەلۋى، اياق-قولدىڭ ۇيۋى، بەتتىڭ جانسىزدانۋى سىندى بەلگىلەر بايقالعان كەزدە بىردەن جەدەل جاردەم شاقىرۋ قاجەت، دەپ اتاپ ءوتتى مامان.
مىندەتتى الەۋمەتتىك مەديسينالىق ساقتاندىرۋ شەڭبەرىندە 2-كەزەڭدەگى وڭالتۋدان ينسۋلت العاننان كەيىن جارتى جىل ىشىندە وتۋگە بولادى. جولدامانى جەرگىلىكتى ەمحانا دارىگەرلەرى بەرەدى.