بيىلعى جىلدىڭ اقپان ايىندا جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ تالىمگەرلەرىن وقىتۋدى مىندەتتەيتىن زاڭعا قول قويىلدى.
وقىتۋدى تالىمگەرلىك جونىندەگى ۇيىمدار جەكە قاراجاتى ەسەبىنەن جۇرگىزەدى، دەپ حابارلايدى aqshamnews.kz.
وقۋ-اعاتۋ مينيسترلىگىنىڭ مالىمەتىنشە، 2024 جىلى قازاقستاندا جەتىم بالالار مەن اتا-اناسىنىڭ قامقورلىعىنسىز قالعان بالالارعا قولداۋ كورسەتۋگە باعىتتالعان تالىمگەرلىك ينستيتۋتى ەنگىزىلگەن بولاتىن. اتالعان مەحانيزم ءبىلىم بەرۋ ۇيىمدارىنىڭ تاربيەلەنۋشىلەرىن 10 جاستان باستاپ ءوز بەتىنشە ءومىر سۇرۋگە دايىنداۋعا مۇمكىندىك بەرەدى.
«تالىمگەرلەردى دايارلاۋ اتا-اناسىنىڭ قامقورلىعىنسىز قالعان بالالارعا ساپالى قولداۋ مەن كومەك كورسەتۋدە ماڭىزدى قادام بولىپ تابىلادى. ءبىز بۇل شارا بالالاردى الەۋمەتتەندىرۋگە جانە ءوز بەتىنشە ءومىر سۇرۋگە دايىنداۋعا ىقپال ەتەتىن تالىمگەرلىكتىڭ ءتيىمدى جۇيەسىن قۇرۋعا مۇمكىندىك بەرەتىنىنە سەنىمدىمىز»، - دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
تالىمگەر بولۋعا ەلىمىزدىڭ كامەلەت جاسىنا تولعان جانە قورعانشىلارعا قويىلاتىن تالاپتارعا سايكەس كەلەتىن ازاماتتارى ۇمىتكەر بولا الادى. مىندەتتى وقىتۋدان وتكەننەن كەيىن تالىمگەرلەرگە بىلىكتىلىگىن راستايتىن سەرتيفيكات بەرىلەدى. ودان كەيىن تالىمگەر، قورعانشىلىق جانە قامقورشىلىق ورگانى، سونداي-اق ءبىلىم بەرۋ ۇيىمى اراسىندا رەسمي كەلىسىم جاسالادى.
الداعى ۋاقىتتا تالىمگەرلىك جۇيەسى قيىن ومىرلىك جاعدايعا تاپ بولعان بالالاردى قولداۋ جۇيەسىنىڭ ماڭىزدى بولىگىنە اينالادى.