كادر تاپشىلىعى بارعان سايىن ارتىپ كەلەدى.
قازاقستان ەلەكتر ەنەرگەتيكاسى قاۋىمداستىعىنىڭ ساراپشىلارى ەلدەگى جىلۋ ەلەكتر ستانسيالارىنا 15 مىڭنان استام قىزمەتكەر جەتىسپەيتىنىن ايتتى، دەپ حابارلايدى Almaty-akshamy.kz
سونىمەن قاتار رەسپۋبليكا بويىنشا جەو جاڭعىرتۋ جانە جاڭادان سالۋ جوبالارى ازىرلەنىپ جاتقانى ايتىلادى. ولارعا ماماندار قاجەت. وسكەمەندە امبەباپ جىلۋەنەرگەتيكتەردى قارقىندى تۇردە دايىنداۋ قولعا الىنىپ جاتىر.
سونىمەن بىرگە باس قالالىق جىلۋ ەلەكتر ورتالىعىندا تەحنيكالىق ستۋدەنتتەرگە ارنالعان وقۋ سىنىپتارى اشىلىپ جاتىر. وقۋ باعدارلاماسىنا ساي، ولار كاسىپورىندا ءبىر وقۋ كۇنىن وتكىزەدى: تالىمگەرلەردىڭ باقىلاۋىمەن، سەحتاردا جۇمىس ىستەيدى، تۋربينالىق جانە ەلەكتر جابدىقتارىنا قىزمەت كورسەتەدى.
وسكەمەندەگى جىلۋ-ەلەكتر ورتالىعى سەحىنىڭ مەڭگەرۋشىسى سەرىك بايسارينوۆ تاجىريبەلى ادامداردىڭ بىرتە-بىرتە كەتىپ بارا جاتقانىن ايتادى.
"ءبىز ءۇشىن ولاردىڭ قاراپايىم ءبىلىم العانى ماڭىزدىراق. ەڭ باستىسى - ەلەكترومونتەر نەمەسە ەلەكتروسلەساردان باستاۋ، ءوسۋ جانە تاجىريبە جيناقتاۋ. بىزدەن كوپ ستۋدەنت تاجىريبەدەن وتەدى."، دەدى سەرىك بايسارينوۆ
كەلەسى جىلى شىعىستاعى جەو ءۇشىن 200-دەن استام سەرتيفيكاتتالعان مامان دايىندالادى، ءبىراق بۇل دا كورسەتكىش ەمەس. ونەركاسىپتە وتكىر كادر تاپشىلىعى بايقالادى — قازاقستاننىڭ جىلۋ ەلەكتر ستانسيالارىندا 15 مىڭنان استام جۇمىسشى جەتىسپەيدى.
تەلەارنانىڭ حابارلاۋىنشا، ەلىمىزدىڭ جىلۋ ەلەكتر ستانسيالارى بۇگىن دە، جاقىن بولاشاقتا دا كادرلىق رەزەرۆكە مۇقتاج. قازاقستاندا بىردەن ءۇش جەس سالۋ جوسپارلانىپ وتىر. ولار وسكەمەندە، سەمەيدە جانە كوكشەتاۋدا. جىلۋ ەنەرگەتيكتەرىنىڭ ايتۋىنشا، ءبىر قازاندىق قوندىرعىسىنا قىزمەت كورسەتۋ ءۇشىن كەمىندە 600 مامان قاجەت.
وسكەمەن مەن ريددەرگە ماماندار ءقازىر قاجەت. وبلىس ورتالىعىنداعى جىلۋ ەلەكتر ورتالىعى 6-قازاندىقتى جاڭعىرتۋعا جانە سالۋعا دايىندالىپ جاتىر. قالادا بۇگىندە 200 گيگاكالوريادان استام جىلۋ ەنەرگياسى جەتىسپەيدى. ەنەرگيا رەسۋرستارىنىڭ تاپشىلىعى تۇرعىن ۇيلەر مەن الەۋمەتتىك نىسانداردىڭ قۇرىلىسىن باسەڭدەتەدى. بۇرىن باس جوسپاردا بەكىتىلگەن عيماراتتار اياقتالىپ جاتىر. ازىرشە جاڭا جوبالار توقتاپ تۇر.
"كادر تاپشىلىعى، سايىپ كەلگەندە، ينفراقۇرىلىمدى كەڭەيتە الماۋىمىزعا اكەلىپ سوقتىرادى. ەكىباستۇز بەن ريددەر قالالارىندا بولعان جاعدايلار وسى سالاعا، كادر دايارلاۋعا كوڭىل ءبولۋدىڭ قانشالىقتى ماڭىزدى ەكەنىن كورسەتتى"، دەدى شىعىس قازاقستان تەحنيكالىق ۋنيۆەرسيتەتىنىڭ رەكتورى ساۋلە راحمەتۋللينا.
2018 جىلى ەلىمىزدىڭ جوعارى وقۋ ورىندارىنا "جىلۋ ەنەرگەتيكاسى" ماماندىعىنا 972 ستۋدەنت قابىلداندى، ولار رەسپۋبليكانىڭ جىلۋ ەلەكتر ستانسيالارىنىڭ ۇجىمىنا قوسىلادى دەپ بولجاندى.