زاڭناماعا گەولوگيالىق سالاداعى راسىمدەردى جاقسارتۋدى جانە وڭايلاتۋدى كوزدەيتىن ءتيىستى وزگەرىستەر ەنگىزۋ كەرەك. بۇل تۋرالى ۇكىمەت وتىرىسىندا ق ر پرەمەر-مينيسترى ءاليحان سمايىلوۆ ايتتى، دەپ حابارلايدى اlmaty-akshamy.kz قازاقپارات-قا سىلتەمە جاساپ.
«گەولوگيالىق بارلاۋ جۇمىستارىن جۇرگىزۋدىڭ جانە جالپى تابيعي رەسۋرستاردى ۇتىمدى پايدالانۋدىڭ تيىمدىلىگىن ارتتىرۋ قاجەت. زاڭناماعا گەولوگيالىق سالاداعى راسىمدەردى جاقسارتۋدى جانە وڭايلاتۋدى كوزدەيتىن ءتيىستى وزگەرىستەر ەنگىزۋ كەرەك. بۇل سالاعا ينۆەستيسيا تارتۋ – وتە ماڭىزدى ماسەلە. يندۋستريا، سىرتقى ىستەر، قارجى جانە ۇلتتىق ەكونوميكا مينيسترلىكتەرى «جەر قويناۋى جانە جەر قويناۋىن پايدالانۋ تۋرالى» كودەكسكە ءتيىستى تۇزەتۋلەر ازىرلەۋى كەرەك»، - دەدى ءا. سمايىلوۆ ۇكىمەت وتىرىسىندا پرەزيدەنتتىڭ ق ر پارلامەنتى سەسسياسىنىڭ اشىلۋىندا بەرگەن تاپسىرمالارىن ىسكە اسىرۋ بارىسىن تالقىلاۋ كەزىندە.
بۇدان بولەك، ۇكىمەت باسشىسى ازىق-تۇلىك قاۋىپسىزدىگىن قامتاماسىز ەتۋ ءۇشىن اگروبيزنەس سۋبەكتىلەرىنە ارنالعان قولداۋ قۇرالدارىن جەتىلدىرۋدى جەدەلدەتۋ قاجەت ەكەنىن ايتتى.
«جەكە قوسالقى شارۋاشىلىقتاردىڭ دامۋىنا جەڭىلدىكپەن نەسيە بەرۋدى كوزدەيتىن «اۋىل اماناتى» باعدارلاماسىن ىسكە اسىرۋ اۋىل تۇرعىندارىنىڭ ءال-اۋقاتىن جاقسارتۋعا مۇمكىندىك بەرەدى. اۋىل شارۋاشىلىعى مينيسترلىگى وسى تاپسىرمالاردىڭ ىسكە اسىرىلۋىن ەرەكشە باقىلاۋعا الۋى كەرەك»، - دەدى پرەمەر-مينيستر.