قازاقستانداعى بارلىق سوعىس ارداگەرى مەن تىل ەڭبەككەرى قتج پويىزدارىندا تەگىن جۇرە الادى.
مۇنداي اكسيانى «جەڭىس» باستاماسى اياسىندا «Samruk-Kazyna Trust» الەۋمەتتىك جوبالاردى دامىتۋ قورى قولعا الىپ وتىر، دەپ حابارلايدى Almaty-akshamy.kz
اكسيا قازاقستان مەن تمد ەلدەرى اۋماعىنداعى پويىزداردىڭ قتج قىزمەت كورسەتەتىن باعىتتارىن قامتيدى. بۇل مۇمكىندىكتى 1935 جىلدىڭ 31 جەلتوقسانىنا دەيىن تۋعان سوعىس قاتىسۋشىلارى مەن مۇگەدەكتەرى، تىل ەڭبەككەرلەرى مەن ەڭبەك مايدانىنىڭ قاتىسۋشىلارى پايدالانا الادى.
اكسيا 2014 جىلدان باستاپ جىل سايىن وتكىزىلىپ كەلەدى. تەك وتكەن جىلى تەگىن ساپارلار 550-دەن استام رەت پايدالانىلدى.
2022 جىلعى ناۋقان ماۋسىم ايىنىڭ سوڭىنا دەيىن جارامدى. الايدا ول تاعى ءبىر جىلعا ۇزارتىلۋى ىقتيمال.
"ناۋقان بويىنشا جول ءجۇرۋ قۇجاتتارىن راسىمدەۋ ءۇشىن بيلەت كاسساسىنا جەكە باستى كۋالاندىراتىن قۇجاتتىڭ ءتۇپنۇسقاسىن جانە ەكىنشى دۇنيەجۇزىلىك سوعىسى ارداگەرىنىڭ نەمەسە تىل ەڭبەككەرىنىڭ كۋالىگىن ۇسىنۋ قاجەت. تمد ەلدەرىنە بارعان كەزدە تەگىن جول ءجۇرۋ قۇجاتتارى (بيلەتتەرى) تەك قازاقستان رەسپۋبليكاسىنىڭ اۋماعىندا ورنالاسقان ساتۋ پۋنكتتەرىندە راسىمدەلەدى"، - دەلىنگەن حابارلامادا.
«جەڭىس» جوباسى كومەككە مۇقتاج سوعىس ارداگەرلەرى مەن تىل ەڭبەككەرلەرىنە الەۋمەتتىك-تۇرمىستىق قولداۋ كورسەتۋگە باعىتتالعان. جوبانىڭ باستى ماقساتى – جەڭىستىڭ ءقادىرىن ۇنەمى ەستە ساقتاپ، ارداقتاۋ. جوبا اياسىندا وڭىرلەردە جۇيەلى نەگىزدە ۆولونتەرلىك رەيدتەر ۇيىمداستىرىلادى.
"2021 جىلى 2100-دەن استام ەكىنشى دۇنيەجۇزىلىك سوعىس ارداگەرى مەن تىل ەڭبەككەرىنە ەرىكتىلەر 6700-گە جۋىق رەت باردى. قازاقستاننىڭ 35 قالاسى مەن اۋدانىنداعى 650 ەرىكتى قارت ادامدارعا ازىق-تۇلىك جەتكىزىپ، تۇرمىستىق كومەك كورسەتتى، ۇيلەرىنىڭ اۋلالارىن تازالادى، قورشاۋلاردى سىرلاپ، شاتىرلارىن بۇتىندەدى، قىسقا وتىن دايىندادى. ەرەكشە مۇقتاج ارداگەرلەر قاجەتتى تۇرمىستىق تەحنيكامەن قامتاماسىز ەتىلدى"، - دەلىنگەن حابارلامادا.