جەڭىلدەتىلگەن ميكروكرەديتتى قالاي الۋعا بولادى؟

2023 جىلعى 1 شىلدەدەگى جاعداي بويىنشا «اگرارلىق كرەديتتىك كورپوراسيا» اق-عا كاسىپكەرلىك باستامالاردى ىسكە اسىرۋ ءۇشىن جاستارعا بەرىلەتىن جىلدىق 2،5%-بەن جەڭىلدەتىلگەن ميكروكرەديتتەر الۋعا 4،2 مىڭنان استام ءوتىنىم ءتۇستى. بيىل بارلىعى 5 796 ميكروكرەديت بەرۋ جوسپارلانۋدا، دەپ حابارلايدى almaty-akshamy.kz

ميكروكرەديتتىڭ مولشەرى 5 ملن تەڭگەگە دەيىن، ال قاتىسۋدىڭ ەڭ ۇزاق مەرزىمى – 5 جىلعا دەيىن (كەز كەلگەن ماقساتقا) نەمەسە 7 جىلعا دەيىن (مال شارۋاشىلىعى سالاسىنداعى جوبالار ءۇشىن). نومينالدى سىياقى مولشەرلەمەسى – جىلدىق 2،5%-دان اسپايدى.

ميكروكرەديت الۋعا وتىنىمدەردىڭ ەڭ كوبى تۇركىستان (595)، جامبىل (512)، قىزىلوردا (313)، جەتىسۋ (311)، باتىس قازاقستان (278) جانە الماتى (253) وبلىستارىنان ءتۇستى. كونكۋرستىق كوميسسيالاردىڭ شەشىمىمەن 2189 جوبا ماقۇلداندى، ونىڭ ىشىندە 1228 جوبانى ىسكە اسىرۋعا كرەديت بەرىلدى. كرەديت الۋشىلاردىڭ باسىم كوپشىلىگى مال شارۋاشىلىعى، قىزمەت كورسەتۋ، ساۋدا، وسىمدىك شارۋاشىلىعى جانە جەڭىل ونەركاسىپ سالاسىن قامتىدى.

سونداي-اق، ميكروكرەديت 21 جاستان 35 جاسقا دەيىنگى جاستارعا ءوز كاسىبىن اشۋعا نەمەسە ونى كەڭەيتۋگە، 5 جىلدان اسپايتىن مەرزىممەن جەكە كاسىپكەر رەتىندە تىركەلگەن جاعدايدا بەرىلەدى. بۇل رەتتە قاتىسۋشىلاردىڭ «اگرارلىق كرەديتتىك كورپوراسيا» اق-عا وتىنىممەن جۇگىنگەن ۋاقىتتاعى جاسى ەسكەرىلەدى.

ميكروكرەديت الۋشىلار ءۇشىن نەگىزگى بورىش پەن سىياقىنى وتەۋ بويىنشا جەڭىلدىكتى كەزەڭ بەرىلەدى، ول ميكروكرەديت مەرزىمى ۇزاقتىعىنىڭ ۇشتەن بىرىنەن اسپايدى.

كەپىلمەن قامتاماسىز ەتۋدىڭ بولۋى مىندەتتى شارت بولىپ تابىلادى. ول رەتىندە جىلجىمالى (مامانداندىرىلعان تەحنيكا) جانە جىلجىمايتىن مۇلىك قابىلدانادى. كەپىلمەن قامتاماسىز ەتۋ بولماعان جاعدايدا كەپىل بەرۋشىنى (اتا-انالارىن، تۋىستارىن جانە ت.ب.) تارتۋعا بولادى.

ءوتىنىم بەرۋ ءۇشىن قۇجاتتار پاكەتىن «اگرارلىق نەسيە كورپوراسياسى» اق فيليالىنا تاپسىرۋ قاجەت.

قاجەتتى قۇجاتتار ءتىزىمى:

1. جەكە باسىن كۋالاندىراتىن قۇجات؛


2. جوبا بويىنشا بيزنەس-جوسپار؛


3. شوتتىڭ بولۋى تۋرالى قىزمەت كورسەتەتىن بانكتەن انىقتاما؛


4. كرەديتتىك بەرەشەكتىڭ، ونىڭ ىشىندە قارجى ۇيىمدارىنان مەرزىمى وتكەن بەرەشەكتىڭ بولۋى تۋرالى انىقتاما (كرەديتتەر بولعان كەزدە)؛


5. قاتىسۋشىنىڭ/ۇمىتكەردىڭ جالاقىسىن جانە (نەمەسە) وزگە دە تابىستارىن راستايتىن قۇجات (جيناقتاۋشى زەينەتاقى قورىنان ءۇزىندى كوشىرمە) بولعان كەزدە؛


6. كەپىلدى قامتاماسىز ەتۋ رەتىندە بەرىلەتىن مۇلىكتى باعالاۋ تۋرالى ەسەپ؛


7. كەپىل بەرۋشى جانە كەپىلمەن قامتاماسىز ەتۋ جونىندەگى قۇجاتتار.

ميكروكرەديتتەر تومەندە كورسەتىلگەن تىزىمدەگىلەردى قوسپاعاندا:

- تۇرعىن جىلجىمايتىن مۇلىكتى (ونىڭ ىشىندە مالشىلار ءۇشىن ۋاقىتشا/تۇراقتى تۇرعىن ۇيلەردى) ساتىپ الۋ، سالۋ نەمەسە جوندەۋ، جەر ۋچاسكەلەرىن ساتىپ الۋ (كەز كەلگەن نىسانالى ماقساتپەن)؛

- باعالى قاعازداردى ساتىپ الۋ (پورتفەلدىك ينۆەستيسيالار)؛

- قارۋدى (ونىڭ ىشىندە قارۋ وندىرۋگە ارنالعان قۇرامداس بولىكتەردى)، قۇرامىندا ەسىرتكى بار زاتتاردى نەمەسە ازاماتتىق اينالىمنان الىنعان باسقا دا مۇلىكتى ءوندىرۋ نەمەسە ساتىپ الۋ؛

- ويىن بيزنەسىن ۇيىمداستىرۋ جانە (نەمەسە) دامىتۋ؛

- قازاقستان رەسپۋبليكاسىنىڭ زاڭناماسىندا تىيىم سالىنعان تەرروريستىك جانە كەز كەلگەن وزگە دە قىزمەتكە بايلانىستى قىزمەت؛

- موتورلى كولىك قۇرالدارىن شىعارۋدى جانە ءوز وندىرىسىندەگى جۇزىمنەن شاراپ ءوندىرۋدى، سونداي-اق تەمەكى جانە\نەمەسە الكوگول ونىمدەرىن ساتىپ الۋدى كوزدەيتىن جوبالار، اكسيزدەلەتىن تاۋارلاردى/ونىمدەردى شىعارۋ؛

- كرەديتورلىق بەرەشەكتى وتەۋ؛

- بيزنەستى جۇرگىزۋگە بايلانىستى ەمەس جەكە تۇتىنۋشىلىق ماقساتتاردان باسقا كەز كەلگەن ماقساتقا بەرىلەدى.

ميكروكرەديتتەر ارنايى كوميسسيانىڭ شەشىمى نەگىزىندە بەرىلەدى، ونىڭ وتىرىستارىندا ۇمىتكەرلەر وزدەرىنىڭ بيزنەس-جوبالارىن تانىستىرادى.

وسىلايشا، ميكروكرەديت بەرۋ تۋرالى شەشىم كوميسسيالىق جانە ناقتى ءىس-قيمىل جوسپارىمەن وزەكتى، دالەلدى، ەكونوميكالىق نەگىزدەلگەن، قوعامدىق ماڭىزى بار، ومىرشەڭ بولۋى ءتيىس جوبانىڭ پىسىقتالۋىن باعالاۋدىڭ ناقتى كريتەرييلەرى نەگىزىندە قابىلدانادى.

قازىرگى ۋاقىتتا ميكروكرەديتتەر الۋعا وتىنىمدەر بارلىق وبلىستارمەن استانا، الماتى جانە شىمكەنت قالالارىندا قابىلدانۋدا.

«اگرارلىق نەسيە كورپوراسياسى» اق فيليالدارىنىڭ مەكەنجايلارى مىنا سايتتا كورسەتىلگەن https://www.agrocredit.kz.