الماتى قالاسىندا قاراماعىنداعى قىزمەتكەرلەردىڭ سىبايلاس جەمقورلىق قىلمىسى ءۇشىن 32 لاۋازىمدىق تۇلعا تارتىپتىك جاۋاپكەرشىلىككە تارتىلدى. ونىڭ ىشىندە 10 لاۋازىمدىق تۇلعا اتقارىپ وتىرعان لاۋازىمىنان بوساتىلدى.
2020 جىلدان باستاپ ەلىمىزدە وتستاۆكاعا كەتۋ جانە ءبىرىنشى باسشىلاردىڭ قاراماعىنداعى قىزمەتكەرلەردىڭ سىبايلاس جەمقورلىق قىلمىستار جاساعانى ءۇشىن دەربەس جاۋاپكەرشىلىگى ينستيتۋتى جۇمىس ىستەي باستادى.
سىبايلاس جەمقورلىققا قارسى الدىن الۋ شارالارىن قولدانباعانى ءۇشىن مەملەكەتتىك ورگانداردىڭ ءبىرىنشى باسشىلارىن، ورتالىق جانە جەرگىلىكتى مەملەكەتتىك ورگانداردىڭ قۇرىلىمدىق بولىمشەلەرىنىڭ باسشىلارىن تارتىپتىك جاۋاپتىلىققا تارتۋدى قامتاماسىز ەتۋ جونىندەگى مەملەكەتتىك ورگانداردىڭ جۇمىسىنا مونيتورينگ جۇرگىزۋ قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنە جانە ونىڭ اۋماقتىق بولىمشەلەرىنە جۇكتەلگەن بولاتىن.
مونيتورينگ كۇندەلىكتى جۇرگىزىلۋدە جانە ونىڭ قورىتىندىسىنا سۇيەنسەك، الماتى قالاسىندا اعىمداعى جىلدىڭ 9 ايىندا قاراماعىنداعى قىزمەتكەرلەردىڭ سىبايلاس جەمقورلىق قىلمىس جاساعانى ءۇشىن 32 لاۋازىمدى تۇلعا تارتىپتىك جاۋاپكەرشىلىككە تارتىلدى. ونىڭ ىشىندە «ەسكەرتۋ» – 1، «سوگىس» تۇرىندە تارتىپتىك جازاعا 6 ادام تارتىلدى، «قاتاڭ سوگىس» – 7، «قىزمەتكە تولىق سايكەس ەمەستىگى تۋرالى ەسكەرتۋ» العاندار – 8، ال 10 لاۋازىمدى تۇلعا اتقارىپ وتىرعان قىزمەتىنەن بوساتىلدى.
باسشىلاردى تارتىپتىك جاۋاپكەرشىلىككە تارتۋدى قامتاماسىز ەتۋدەن باسقا، دەپارتامەنتپەن بىرلەسىپ سىبايلاس جەمقورلىقتىڭ الدىن الۋ جۇمىستارى جۇرگىزىلۋدە. جەمقورلىقتىڭ الدىن الۋعا باعىتتالعان ءىس-شارالار ازىرلەۋ ادەپ جونىندەگى كەڭەستىڭ نەگىزگى مىندەتتەرىنىڭ ءبىرى بولىپ تابىلادى.
وسىعان وراي، اتالعان ماسەلە بويىنشا جۇمىستى ۇيلەستىرۋ بارىسىندا الماتى قالاسىنىڭ ادەپ جونىندەگى كەڭەسىنىڭ وتىرىسىندا سىبايلاس جەمقورلىق قىلمىس جاساۋ فاكتىلەرى ورىن العان مەملەكەتتىك ورگانداردىڭ باسشىلارى تىڭدالىپ، قورىتىندىسى بويىنشا باعىنىشتى قىزمەتكەرلەردىڭ سىبايلاس جەمقورلىق قۇقىق بۇزۋشىلىقتار جاساۋىنىڭ الدىن الۋعا باعىتتالعان ناقتى ۇسىنىمدار بەرىلدى.
دەپارتامەنت باعىنىشتى قىزمەتكەرلەردىڭ سىبايلاس جەمقورلىققا جول بەرگەنى ءۇشىن باسشىلاردىڭ جاۋاپكەرشىلىگى تۋرالى زاڭنامالىق نورمانىڭ ورىندالۋىنا مونيتورينگتى جالعاستىرۋدا.